1Atalía oikuaa omano imembɨraɨe Ocozías yave, ojo oyuka opaete mburuvicha iñemuña reta.
2Ërei Josaba, mburuvicha guasu Joram tayɨ, Ocozías jeindɨ, oipɨɨ Joás, Ocozías taɨ jare güɨnoe mburuvicha guasu taɨ reta Atalía oyuka güɨnoi vae ipɨte güi, jare oñomi iyangarekoa ndive Atalía güi metei o pe. Jökorai mbaetɨ oyuka reta.
3Jökorai Joás oñemi oiko iyangarekoa ndive yandeYa jo pe ova año. Atalía oiko ramboeve mburuvicharä jókuae ɨvɨ pe.
4Ërei chiúa año pe sacerdote tenondegua Joiada omondo oenɨiuka cien sundaro vae juvicha reta, sundaro ruvicha reta jare sundaro öke iyangarekoa reta, jare omoingeuka reta Tumpa jo pe. Joko pe oyapo ñemoïru Tumpa jee re jae reta ndive; jare oechauka chupe reta mburuvicha guasu Ocozías taɨ.
5Javoi jei chupe reta: “Kuae jae pe reta peyapo vaerä: Peyemboyao mboapɨ yemboyao pe; metei yemboyao toñogüɨnoi öke iyangarekoarä mburuvicha guasu jo pe, ara mbutuu pegua pe.
6Mokoía yemboyao toñogüɨnoi öke Shur kotɨ ojo vae pe; jare mboapɨa yemboyao toñogüɨnoi sundaro reta ñogüɨnoia jöke ikupe kotɨgua kotɨ. Jökorai peyangareko peiko mburuvicha guasu jöke re, agüɨye vaerä kia oñemopüa jese.
7Añave pegüi, mókoi yemboyao vae ara mbutuu pegua pe oë vae reta, toñogüɨnoi yandeYa jo jöke iyangarekoarä, mburuvicha guasu iyɨ́vɨri rupi.
8Pe reta peïta mburuvicha guasu iyɨ́vɨri rupi, metei ñavo togüɨnoi ipo pe tembiporu ñeraro pegua, jare oipotagüe oike pota yave pepɨte pe, tomano. Peyangareko mburuvicha guasu re, jae ojoa rupi ou ye regua.”
9Jare cien sundaro vae juvicha reta oyapo opaete sacerdote tenondegua Joiada oyókuai vae. Metei ñavo isundaro reta oñono jókuae oïtaa pe, ara mbutuu pegua pe oike öke iyangarekoarä vae, jare oë vae reta; oyeokuai reta chupe.
10Jare jókuae sacerdote omee cien sundaro vae juvicha reta pe mii jare yeopiaka reta mburuvicha guasu David imbaegüe reta, yandeYa jo pe oï vae.
11Jare sundaro reta opa oñeñono tupao iyɨ́vɨri, tupao iyakatu kotɨgua güive ojoi oväe iyasu kotɨgua jembeɨ iyapɨ pe, jare mɨmba oyeyuka oyeapɨ jese vae iyɨ́vɨri rupi, güɨnoi reve metei ñavo ipo pe tembiporu ñeraro pegua, jökorai oyangareko reta vaerä mburuvicha guasu re.
12Jayave Joiada güɨnoe mburuvicha guasu taɨ, oñono jese äka-regua jare omee chupe tembikuatía mborookuai güɨnoi vae,Dt 17.17-18. jare opɨyere asaite jese jökorai oñono mburuvicha guasurä. Javoi opaete vae oyepopete jare osapúkai jese reta.
13Atalía oendu opaete vae isapúkai yave, jae ojo tupao guasu kotɨ jeta vae reta ñogüɨnoia pe.
14Oecha joko pe mburuvicha guasu oyemboɨ oï, okɨta iyɨpɨ pe, oyeapoñoi rami. Iyɨ́vɨri ñogüɨnoi mburuvicha reta jare temimbɨguasu imoñeea reta, jare opaete oyerovia yae, jare omoñee reta temimbɨguasu. Jayave Atalía omondoro jemimonde jare osapúkai.
—¡Ikavimbae yae ko kuae! ¡Ikavimbae yae ko kuae!
15Ërei sacerdote tenondegua Joiada oyókuai cien sundaro vae juvicha reta, sundaro iyangarekoa reta, jei chupe reta:
—¡Penoe jókuae kuña pepɨte güi, jare oñemoïru jae ndive vae reta, opa peyuka kɨsepuku pe!
Sacerdote oyókuai agüɨye vaerä oyuka reta yandeYa jo pe jeko pegua,
16oipɨɨ reta jare güɨnoe reta, kavayu regua reta oike mburuvicha guasu jo kotɨ vae rupi, joko pe oyuka reta.
17Jaɨkue rupi Joiada oyapo morogüɨrökuavee päve yandeYa ndive, mburuvicha guasu ndive jare opaete vae ndive, jae reta yogüɨreko vaerä yandeYa imbaerä; jökoraiño vi mburuvicha guasu opaete vae ndive.
18Javoi yogüɨraja opaete vae omboai Baal itupao, jökoraiño vi omboai reta opaetei mɨmba oyeyuka oyeapɨ jese vae jare mbae iä reta; oyuka reta Matán, Baal isacerdote mɨmba oyeyuka oyeapɨ jese vae jóvai. Javoi sacerdote tenondegua Joiada oñono yandeYa jo re oyangareko vaerä vae reta.
19Javoi omboatɨ jókuae cien sundaro vae juvicha reta, sundaro ruvicha reta, sundaro öke iyangarekoa reta, jare opaete vae reta, jare güɨnoe reta mburuvicha guasu yandeYa jo güi, güɨraja regua güɨroväe reta mburuvicha guasu jo pe, oike reta sundaro öke iyangarekoa reta ñogüɨnoia rupi. Javoi Joás oguapɨ mburuvicha guasu reta iguapɨa pe,
20jare opaete tëta pegua reta oyerovia; jare yogüɨreko pɨagüive reta, Atalía omano güire kɨsepuku pe mburuvicha guasu jo iyɨpɨ pe.
21Jökorai Joás güɨnoi chiu año, omboɨpɨ oï mburuvicha guasurä yave.
Who We AreWhat We EelieveWhat We Do
2025 by iamachristian.org,Inc All rights reserved.
