1Jókuae ara yandeYa oyukata
ikɨsepuku täta yae vae, yavaete jare tuicha vae pe
Leviatán iñäkua yae vae,
ipire jaimbe vae;
oyukata jókuae mbaeporou ɨguasu pe oï vae.
2Jókuae ara yandeYa jeita:
“Petairari uvarupa ikavi yae vae re.
3Che, peYa ko ayangareko avei jese,
amboɨu avei ko,
ayangareko ko jese ara pe jare pɨ̈tu rupi,
agüɨye vaerä kia maratu oyapo.
4Mbaetɨ chearasɨ aï ikotɨ,
oime yave ñurati jare ñana pɨpe,
opata ko aekɨ,
jare opaeteita ko aapɨ.
5Oipota reta yave ayangareko jese,
toñeñono kavi reta che ndive;
toyapo reta jökorai.”
6Outa oväe metei ara Jacob iñemuña reta oyembojapo vaerä,
Israel iñemuña reta jokɨ pɨau yeta jare ipotɨta,
jare ia omotɨnɨeta opaete ɨvɨ.
7Tumpa mbaetɨ ko oiporarauka Israel pe,
Israel jovaicho reta pe oiporarauka rami,
mbaetɨ ko oyuka Israel,
Israel jovaicho reta oyuka rami.
8Tumpa oiporarauka tëta imbae vae pe, omondo ɨvɨ ambuae kotɨ,
opa omoë omondo ɨvɨtuai pe rami,
ɨvɨtuakuvo yae vae pe rami.
9Jare Jacob iñemuña reta pe iñɨ̈rota iyoa reta re,
oiporu chupe reta vae oyapo yave, jae ko:
Opa vaerä omonguruvi ita reta, itumpa reta pe mbota omee jese vae,
tövati oyemonguruvi vae rami,
agüɨye vaerä ma oyapo reta Asera iä,
ani kuaraɨ iä reta yepe.
10Echa tëta guasu jëguambae vae opa oyemboai,
opɨtata o oyeeyagüe rami,
ñuu ipombae rami,
mɨmba reta ikaruarä,
jokoropi okaruta jare oyapakuata oputuu.
11Ɨvɨra jäka yɨpi yave opë,
jökorai yave, kuña reta omonoota oapɨ vaerä.
Jökorai ko kuae tëta mbaetɨ iyarakuaa.
Jáeramo ko, Tumpa jae reta iYapoa,
ngaraa oiparareko omae jese reta.
12Jókuae ara yandeYa opovɨvɨ eteita
ɨ̈aka Éufrates güive Egipto iɨ̈aka pe,
kia oyevɨka trigo re rami;
jökorai, pe Israel iñemuña reta peyemboatɨta metei metei rupi.
13Jare jókuae ara oñemoñeeta temimbɨguasu,
jare opa oñemoai ñogüɨnoi Asiria rupi vae reta,
jaeramiño vi Egipto pe ñogüɨnoi vae reta,
yogüeruta omboete yandeYa tëta Jerusalén pe,
jae ko ɨvɨtɨ oñeñono tee vae re.
Who We AreWhat We EelieveWhat We Do
2025 by iamachristian.org,Inc All rights reserved.
