PROVERBIOS 2 - Guarani Bible with DC

Arakuaa katu iñemoñee

1Cheraɨ, eipɨɨ cheñee reta; eñovatu ndepɨa pe cheporookuai reta.

2Eyeapɨsaka arakuaa re;

eñono ndepɨa yeandu katu re.

3Esapúkai täta

arakuaa katu jare yeandu katu pe;

4eeka opaete ndepɨa ndive,

oro reeka rami ani mbae jepɨ vae reeka rami.

5Jayave reikuaata kërai ko yaipoɨu yandeYa güi vae;

¡reikuaata kërai ko Tumpa yaikuaa vae!

6Echa yandeYa ko omee arakuaa katu;

mbae yaikuaa vae jare arakuaa katu chugüiño ko ou.

7Jae omee arakuaa kavi sɨmbi vae reta pe,

jae ko yeopiaka sɨmbi vae reta peguarä;

8oyangareko oiko jupi rupi vae reta re,

oyangareko imbae vae reta re.

9Jayave peikuaata yembojupi, yembosɨmbi

jare yae yaeiñombae vae, jare opaete teko kavi.

10Arakuaa katu oï yave ndepɨa pe,

jare mbae yaikuaa vae ikavi yae yave ndeve,

11ndepoki reve reyapo vae neovatuta

jare arakuaa katu ndeangarekota;

12jókuae ndereepɨta teko kavimbae güi,

jare kuimbae reta ipɨapochɨ vae güi,

13teko kavi oeya vae reta güi,

jókuae oguata reta teko kavimbae rupi vae güi,

14oyerovia ikavimbae oyapo vae reta güi,

jare ipöra teko pɨ̈chɨi chupe reta vae güi,

15jeko kavimbae reta, teko kavi oeya vae reta güi.

16Ndereepɨta vi kuña iyaguasa pota vae güi,

jókuae kuña iñee mbokere vae güi.

17Taɨrusu güive omenda jae ndive vae güi ojo vae,

iñakañɨ morogüɨrökuavee päve oyapo Tumpa jovake vae güi vae.

18Kuae jeko pegua iñemuña reta ñogüɨnoi mano peguarä,

jape ojo omano vae reta kotɨ.

19Opaete oasa jae ndive vae ngaraa ye ma oyerova,

ngaraa ye ma oguata reta tape tekove pegua rupi.

20Jayave, emomoe teko kavi,

emomoe jupi vae reta jeko.

21Echa jupi vae reta jare jekombae reta

yogüɨreko aveita ɨvɨ pe;

22ërei iyoa vae reta jare ipɨapochɨ vae reta,

opata oñemokañɨteiuka ɨvɨ güi.