2 Pita Sotfala stori blong buk ya - Bislama Bible Revised 2012

Sotfala stori blong buk ya SEKEN LETA BLONG PITA, Pita i raetem i go long ol Kristin man long taem blong hem. Long taem ya i gat ol tija oli stap, we ol tijing blong olgeta i no stret, mo ol man we oli folem olgeta oli stap foldaon long sin. Nao Pita i wonem ol Kristin man ya blong oli mas lukaot gud blong ol man olsem oli no trikim olgeta.Be blong blokem ol rabis fasin ya, man i mas savegud God, mo i mas letem we Jisas Kraes*, we i Masta* blong yumi, i kam nambawan long laef blong hem. Ol Kristin man long taem ya, oli harem gud nius ya long ol man we oli luk Jisas long ae blong olgeta, mo we oli harem ol tok blong hem, taem hem i stap tijim ol man. Pita i raetem leta ya blong leftemap tingting blong ol Kristin man, from we long taem ya, ol tija ya we tijing blong olgeta i no stret, oli stap talemaot se Jisas bambae i no save kambak bakegen. Be Pita i talem se Jisas i no kambak yet from we God “i no wantem se bambae wan man i lus. Hem i wantem blong olgeta man bambae oli tanem tingting blong olgeta from ol sin blong olgeta.” (3.9). Be bambae hem i mas kambak bakegen i no longtaem.Ol haf blong buk yaFastok 1.1-2

Laef blong ol Kristin man 1.3-21

Ol tija we tijing blong olgeta i no stret 2.1-22

Jisas bambae i kambak bakegen 3.1-18