Sam 114 - Bislama Bible Revised 2012

Sing blong Lafet blong Pasova(Tok i go long ol man.)

1-2 Eks 12.51 Yumi ya,

we yumi ol man Juda,*

yumi ol laen* blong Isrel,*

we narafala nem blong hem Jekob.*

Be taem yumi aot long Ijip,

ples ya we i no ples blong yumi,

God i mekem yumi kam tabu,

yumi man blong hem nomo,

we hem nomo i God blong yumi.

3 Eks 14.21; Jos 3.16 Red Si i lukluk, nao i ronwe,

mo Jodan Reva tu, hem i no moa ron.

4Ol bigbigfala hil wetem ol smosmol hil

oli fraet, oli stap seksek,

oli olsem ol sipsip wetem ol pikinini blong olgeta

we oli fraet,

oli stap resis olbaot.

5Red Si.

?Wanem nao i mekem yu yu ronwe?

Jodan Reva.

?From wanem yu no moa ron?

6!Ol bigbigfala hil wetem ol smosmol hil!

?From wanem yufala i fraet,

yufala i seksek olsem?

Yufala i olsem ol sipsip wetem ol pikinini blong olgeta

we oli fraet,

oli stap resis olbaot.

7-8 Eks 17.1-7; Nam 20.2-13 Graon.

!God blong Jekob,

hem i Masta* blong yumi!

Hem i save mekem ol ston oli kam hol blong wota,

mo i save mekem ol klif oli kam springwota.

Taem hem i kamtru,

i gud yu ona long hem, yu seksek,

yu foldaon long fes blong hem.