Levitikas 13 - Bislama Bible Revised 2012

Fasin we pris i mas mekem long man we i gat boela no wanem long bodi blong hem

1Nao Hae God i givim ol rul ya long Moses mo Hae Pris Eron, i talem se,

2“Moses mo Eron. Sipos wan man i gat wan soa no wan boela, no skin blong hem i solap lelebet mo i kam red, we maet samting ya i save kam wan rabis sik blong skin we i save mekem man i doti long fes blong mi, bambae ol man oli mas tekem man olsem i kam pas long hae pris no long pris.

3Nao pris bambae i mas lukluk gud long soa ya, mo sipos ol hea blong ples ya i waet, mo soa ya i no stap long skin nomo, i kakae mit blong hem i go insaed, hemia i min se soa ya i wan rabis sik blong skin. Nao pris i mas talemaot se man ya i doti long fes blong mi.

4Be sipos pris i luk we soa ya i waet, mo i no kakae mit blong ples ya, mo ol hea blong ples ya i no waet, hem i mas talem long man ya blong i go stap hem wan go kasem seven dei.

5Nao long namba seven dei blong hem, pris i mas lukluk gud long man ya bakegen, mo sipos i luk we soa ya i no kam bigwan, i stap sem mak nomo, bambae i mas talem long hem blong i go stap hem wan go kasem seven dei bakegen.

6Nao long namba seven dei ya blong hem, pris i mas lukluk gud long hem bakegen, mo sipos soa ya i no go olbaot, i stap kam smol, pris i mas talemaot we man ya i klin, from we samting ya i wan soa nomo. Be man ya i mas wasem ol klos blong hem, blong kam klin olgeta long fes blong mi.

7Be sipos soa ya i stat go olbaot long bodi blong man ya biaen long taem ya we pris i luk hem, i talemaot we i klin, bambae hem i mas kam pas long pris bakegen.

8Nao pris bambae i mas lukluk gud long hem bakegen, mo sipos i luk we soa ya i stap go olbaot bakegen, bambae i mas talemaot we man ya i doti long fes blong mi, from we soa ya i wan rabis sik blong skin.”

Fasin we pris i mas mekem long man we maet i gat rabis soa long bodi blong hem

9“Mo sipos wan man i gat wan rabis soa long bodi blong hem, ol man oli mas tekem hem i kam pas long pris,

10blong pris i lukluk gud long hem. Sipos soa blong hem i waet, mo i stap mekem ol hea blong ples ya i kam waet, mo i fulap long doti blong soa,

11hemia i min se soa ya i wan rabis sik we i save stap oltaem, i no save finis. Nao pris ya i mas talemaot we man ya i doti long fes blong mi. Bambae i no gat nid blong pris i talem se hem i mas go stap hem wan, from we i klia long fes blong evri man we hem i no klin long fes blong mi.

12Be sipos sik ya i wokem olgeta bodi blong man ya, i stat long hed blong hem i godaon kasem leg blong hem, nao sik ya i finis long evri ples we pris i save luk,

13bambae pris i mas lukluk gud long man ya bakegen. Mo sipos hem i luk we sik ya i finis gud, hem i mas talemaot se sik blong man ya i finis, mo hem i kam klin bakegen.

14Be sipos wan soa i kamaot long man ya bakegen, wantaem nomo bambae hem i kam doti bakegen long fes blong mi.

15Nao pris i mas lukluk gud long hem bakegen, mo sipos i luk wan soa olsem, hem i mas talemaot we man ya i kam doti bakegen long fes blong mi. Wan soa olsem i min se sik ya i stap yet long man ya, mo hem i kam doti long fes blong mi.

16Be sipos soa ya i finis, man ya i mas kam pas long pris bakegen,

17mo pris i mas lukluk gud long hem bakegen. Sipos soa blong hem i finis olgeta, man ya i kam klin bakegen, mo pris bambae i mas talemaot we sik blong hem i finis mo hem i kam klin.”

Fasin we pris i mas mekem long man we i gat soa bakegen long trak blong boela

18“Mo sipos wan man i gat boela, mo boela ya i finis finis,

19be biaen, trak blong hem i kam waet mo i solap bakegen, no i gat wan mak long hem we i waet, mo i red lelebet, man ya i mas kam pas long pris from.

20Nao pris i mas lukluk gud long hem, mo sipos i luk we soa ya i no stap long skin nomo, i go insaed, mo ol hea blong ples ya i waet, hem i mas talemaot we man ya i doti long fes blong mi. Soa ya i wan rabis sik blong skin we i kamaot long ples blong boela.

21Be sipos pris i lukluk gud long soa ya, nao i luk we ol hea blong ples ya i no waet, mo soa ya i stap long skin nomo, mo i stap kam gud lelebet, bambae hem i mas talem long man ya blong i go stap hem wan go kasem seven dei.

22Nao long namba seven dei blong hem, sipos pris i luk we soa ya i stap kam bigwan, mo i go olbaot long bodi blong hem, hem i mas talemaot we man ya i kam doti long fes blong mi. Hemia i sik ya blong skin bakegen.

23Be sipos hem i luk we soa ya i no jenis, mo i no go olbaot long bodi blong man ya, hemia i min se samting ya i trak blong boela nomo we i finis finis, mo pris i mas talemaot we man ya i no doti long fes blong mi.”

Fasin we pris i mas mekem long man we rabis soa i kamaot long ples we faea i bin bonem hem

24“Mo sipos faea i bonem wan man, nao soa long ples ya i gat mak long hem we i waet mo i red lelebet, no i waet olgeta,

25bambae pris i mas lukluk gud long man ya. Sipos ol hea blong ples ya i kam waet, mo soa i no stap long skin nomo, i go insaed, hemia i min se wan rabis sik blong skin i stat long ples ya we faea i bonem, mo pris i mas talemaot we man ya i kam doti long fes blong mi.

26Be sipos ol hea blong ples ya i no kam waet, mo soa ya i stap long skin nomo, mo mak ya i stap kam gud lelebet bakegen, pris i mas talem long hem blong i go stap hem wan go kasem seven dei.

27Nao long namba seven dei blong hem, pris i mas lukluk gud long hem bakegen, mo sipos soa ya i stap kam bigwan, mo i go olbaot long bodi blong hem, hemia i min se soa ya i wan rabis sik blong skin, mo pris i mas talemaot we man ya i kam doti long fes blong mi.

28Be sipos soa ya i stap sem mak nomo olsem, i no jenis, mo i no go olbaot long bodi blong man ya, mo i stap kam gud lelebet, hemia i min se i no wan rabis sik blong skin. Nao pris i mas talemaot we man ya i no doti long fes blong mi, from we soa ya i trak blong faea nomo we i bonem.

Fasin we pris i mas mekem long man we i gat ringwom long hed blong hem no long fes blong hem

29“Sipos wan man no wan woman i gat soa long hed blong hem, no long fes blong hem,

30pris i mas lukluk gud long soa ya. Sipos soa ya i no stap long skin nomo, i go insaed, mo ol hea blong ples ya i yala mo i sofsof, hemia i min se soa ya, hem i ringwom, mo pris ya i mas talemaot we man ya i kam doti long fes blong mi.

31Be sipos pris i lukluk gud long soa ya, mo i luk we hem i stap long skin nomo, be ol hea long ples ya i no stret kala blong hem, hem i mas talem long man ya blong i go stap hem wan go kasem seven dei.

32Nao long namba seven dei blong hem, pris i mas lukluk gud long soa ya bakegen, mo sipos soa ya i no go olbaot long bodi blong man ya, mo ol hea blong ples ya i no moa yala, mo soa i stap long skin nomo,

33man ya i mas katemaot olgeta hea blong hed blong hem, ol hea raon long soa ya nomo i stap, mo pris i mas talem long hem blong i go stap hem wan go kasem seven dei bakegen.

34Nao long namba seven dei ya blong hem, pris i mas lukluk gud long soa ya bakegen, mo sipos soa ya i no go olbaot long bodi blong man ya, mo i no go insaed, i stap long skin nomo, pris i mas talemaot we hem i no doti long fes blong mi. Be man ya i mas wasem ol klos blong hem blong kam klin olgeta long fes blong mi.

35Be sipos soa ya i stat kam bigwan bakegen biaen long taem ya we pris i talem se man ya i no doti long fes blong mi,

36pris i mas lukluk gud long hem bakegen. Nao sipos soa ya i stap go olbaot long bodi blong man ya, i no nid blong pris i traem faenemaot se ol hea blong ples ya i kam yala, from we i klia nomo we ringwom i stap long man ya, mo hem i doti long fes blong mi.

37Be sipos pris i luk we soa ya i no kam bigwan, mo ol gudfala hea i stap gru bakegen long ples blong soa ya, hemia i min se soa ya i finis, mo pris i mas talemaot we man ya i no doti long fes blong mi.”

Fasin we pris i mas mekem long man we i gat ol waet spot long skin blong hem

38“Mo sipos wan man no wan woman i gat ol waet spot long skin blong hem,

39pris i mas lukluk gud long hem. Mo sipos ol spot ya oli waet be oli no waet gud, hemia i min se ol spot ya oli samting nating nomo, mo man ya no woman ya i klin, ol spot ya i no mekem hem i doti long fes blong mi.”

Fasin we pris i mas mekem long man we i stap kam bolhed

40-41“Mo sipos wan man i stap kam bolhed long bak blong hed blong hem, no long fored blong hem, hemia i no mekem hem i doti long fes blong mi.

42Be sipos i gat soa i kamaot long bolhed ya blong hem, we soa ya i waet mo i red lelebet, soa ya i wan rabis sik blong skin.

43Pris i mas lukluk gud long hem, mo sipos soa ya i waet mo i red lelebet,

44bambae i mas talemaot we man ya i kam doti long fes blong mi, from we soa ya long hed blong hem i wan rabis sik blong skin.”

Fasin we man i mas mekem taem pris i talem se hem i gat wan rabis sik long skin blong hem

45“Sipos wan man i gat wan rabis sik olsem, bambae hem i mas putum ol rabis klos nomo we i brobrok, mo i no mas komem hea blong hem. Hem i mas kavremap maot blong hem, mo sipos i luk narafala man, i mas singsingaot se, ‘!Mi mi doti! !Mi mi doti!’

46Nating we sik ya i stap long hem longtaem olsem wanem, be bambae hem i stap doti long fes blong mi, go kasem we sik ya i finis long hem. Bambae hem i mas gowe long ples we ol man oli stap long hem, nao i mas stap hem wan afsaed olgeta.”

Doti mak we i stap gru long ol klos

47-49Bakegen, Hae God i talem long tufala se, “Sipos i gat doti mak we i olsem hea blong rat i stap gru long wan klos blong yufala, no long wan narafala samting blong yufala, bambae yufala i mas tekem samting ya i kam, blong pris i lukluk. Nating we doti mak ya i stap long wan klos we oli wokem long wul, no long linen,* no i stap long wan pis kaliko we oli wokem long wul, no long linen, no i stap long wan pis leta, no long wan samting we oli wokem long leta, be sipos mak ya i stap gru mo kala blong hem i stap kam grin, no i stap kam red, maet hemia i olsem wan sik we i save kam bigwan moa long samting ya, mo yufala i mas kam soemaot mak ya long pris.

50Bambae pris i mas lukluk gud long mak ya, mo i mas putum samting ya i stap hem wan samples go kasem seven dei.

51-52Nao long namba seven dei blong hem, hem i mas go lukluk gud long samting ya bakegen. Sipos mak ya i stap go olbaot long hem, hemia i min se mak ya i olsem wan rabis sik, mo samting ya i doti long fes blong mi, nao pris i mas bonem blong kilim sik ya.

53Be sipos pris i lukluk gud long samting ya, mo i luk we mak ya i no go olbaot long hem,

54hem i mas talem long man ya blong i go wasem samting ya fastaem, nao biaen, pris i mas putum i stap hem wan samples go kasem seven dei bakegen.

55Nao long namba seven dei ya blong hem, pris i mas go lukluk gud long hem bakegen, mo sipos mak ya i no jenisim kala blong hem be i stap long hem yet, nating we i no go olbaot long samting ya, be samting ya i stap doti yet long fes blong mi. Nating we mak ya i stap long afsaed blong samting ya, no long insaed blong hem, be pris i mas bonem.

56Be sipos pris i lukluk gud long samting ya bakegen, nao i luk we mak ya klosap i finis long hem, nating we kaliko no leta, be bambae hem i mas teremaot haf ya we mak i stap long hem.

57Be biaen, sipos wan mak olsem i kamaot bakegen long samting ya, hemia i min se sik ya i stap long hem yet, mo man blong hem i mas tekem samting ya, i go bonem long faea.

58Sipos man ya i wasem samting ya olsem, nao mak ya i finis olgeta long hem, hem i mas wasem bakegen wan taem moa, blong samting ya i kam klin olgeta.

59“Hemia nao ol rul we pris i mas folem blong lukluk gud long ol samting olsem we i gat doti mak i stap gru long hem blong makemaot se i klin no i no klin long fes blong mi.”