1 Aes 25.10-12; Jer 48.1-47; Esik 25.8-11; Amos 2.1-3; Sef 2.8-11 Nao Profet Aesea i talem long ol man blong hem se, “Olgeta. Mi mi luk wan vison* we Hae God i soemaot long mi, mo long vison ya, mi luk ol samting we i hapen long Moab. Mi luk we olbaot long kantri ya, i gat bigfala trabol i kasem ol man. Long wan naet nomo, taon ya Ara mo taon ya Kiri, tufala i kam nogud olgeta, nao olbaot long kantri ya, i no moa gat wan samting nating i mekenoes.
2Long taon ya Dibon, ol man oli stap wokbaot blong go long ples blong wosip blong olgeta antap long hil, blong krae long ples ya. Ol man Moab oli harem nogud, oli stap krae bigwan from taon ya Neboho mo taon ya Medebaha, we tufala i taon blong olgeta. Olgeta oli pulum resa long hed blong olgeta mo long mustas blong olgeta, from we oli harem nogud tumas.
3Insaed long ol taon, olbaot long ol big rod, ol man oli stap putum rabis klos nomo, mo long ol ples blong storian, ol man oli stap krae tumas, we oli stap singaot bigwan from.
4Long taon ya Hesbon mo taon ya Eleale, ol man oli stap krae bigwan, mo raonabaot long tufala taon ya, go kasem taon ya Jahaj we i longwe, ol man oli stap harem bigfala noes blong olgeta. Nating we ol soldia blong Moab, be oli fraet, oli seksek, tingting blong olgeta i no moa strong.
5Be mi mi harem nogud, mi sore tumas long ol man Moab. Olgeta oli ronwe, oli go long taon ya Joha, mo long taon ya Eglatselisia. Sam long olgeta oli folem rod ya we i go antap long taon ya Luhit, mo taem oli wokbaot, oli stap krae. Mo sam oli ronwe olgeta, oli go olwe long taon ya Horonaem, mo taem oli wokbaot, oli stap krae bigwan.
6Reva ya Nimrim i no moa ron, mo gras long saed blong hem i drae olgeta. Olbaot long kantri ya, i no moa gat wan grin samting nating i stap, olgeta samting i drae.
7Sam man oli karem ol gudgudfala samting blong olgeta, oli gokros long Wilo Reva, blong traem ronwe blong go long hil long narasaed.
8Olbaot long kantri ya, ol man oli save harem ol man Moab oli stap krae bigwan tumas. Long taon ya Eglaem, mo long taon ya Beherelim, oli save harem olgeta.
9Long taon ya Dibon, reva i kam red long blad blong man, be plan blong Hae God blong spolem ol man Dibon i mowas olgeta. Ol man Moab we oli ronwe long ol trabol ya, wetem olgeta we oli laef i stap, wan laeon i kilim olgeta evriwan i ded.
Who We AreWhat We EelieveWhat We Do
2025 by iamachristian.org,Inc All rights reserved.
