1 Hib 11.31; Jem 2.25 Nao taem Josua wetem ol narafala laen* blong Isrel* oli stap long Sitim, hem i sanem tu man i go long Kenan* blong lukluksave taon ya Jeriko mo ol ples raonabaot long hem. Mo taem tufala i go, ol man Kenan oli no save tufala. Tufala i go insaed long taon ya, nao long naet, tufala i go slip long haos blong wan woman blong rod, nem blong hem Rehab.
2Nao king* blong taon ya i kasem nius we i gat sam man blong Josua oli kam insaed long taon ya blong lukluksave ples ya.
3Nao hem i sanem tok i go long woman ya, i talem se, “!Ol man ya we oli stap long haos blong yu, oli kam blong lukluksave ples blong yumi ya! !Yu tekem olgeta oli kam long mi!”
4Be woman ya i haedem tufala finis, nao hem i giaman long olgeta, i talem se, “Yes, i tru i gat tu man i kam long haos blong mi tede, be mi mi no save se tufala i man wea.
5Tufala i aot long ples ya taem san i stap godaon, we oli no satem doa* blong bigfala stonwol blong taon ya yet. Mi mi no save weples tufala i go long hem. Ating sipos yufala i hareap naoia, bambae yufala i save kasem tufala.”
6Be hem i haedem tufala antap long haos blong hem, aninit long ol gras ya flakis* we hem i putumgud blong draemap long san.
7Nao ol man blong king ya oli aot long taon blong go lukaot tufala, mo biaen ol gad oli satem doa. Nao ol man ya oli stap lukaot tufala gogo oli kasem ples we rod i gokros long Jodan Reva.
8Nao taem tufala ya i no slip yet, woman ya i go luk tufala,
9i talem long tufala se, “Tufala. Mi mi save we Hae God i givim kantri ya finis long yufala. Mo olgeta evriwan long kantri ya oli fraet finis long yufala.
10Eks 14.21; Nam 21.21-35Mifala i harem nius blong yufala finis, we taem yufala i aot long Ijip, Hae God i mekem Red Si ya i drae, nao yufala i kamkros long hem. Mo mifala i harem nius tu, blong tufala king ya blong ol laen blong Amoro* we oli stap long narasaed Jodan Reva ya i go. Tufala king ya King Sihon mo King Og, yufala i kilim tufala wetem ol man blong tufala, olgeta evriwan oli ded.
11Mo taem mifala i harem nius blong ol samting ya, mifala i seksek tumas. Naoia tingting blong mifala i lus finis. Hae God ya we i God blong yufala, hem i God blong heven mo blong wol ya tu.
12Mi mi wantem blong yutufala i mekem wan strong promes naoia long nem blong hem, se bambae yufala i save mekem i gud long mi wetem ol famle blong mi, stret olsem we mi mi mekem i gud long yutufala. Yutufala i mas givim wan saen long mi blong makem se promes we yutufala i mekem i tru.
13Mo yutufala i mas mekem wan promes tu se bambae yufala i mas sevem papa mo mama blong mi, wetem ol brata mo sista blong mi mo olgeta famle blong mi. !Bambae yufala i no mas kilim mifala i ded!”
14Tufala i talem long hem se, “Mitufala i promes naoia, se sipos yu no talemaot ol samting ya we mitufala i mekem, bambae mifala i mekem i stret gud long yu. Taem Hae God i givim kantri ya long mifala, bambae mifala i kaen gud long yu wetem olgeta famle blong yu. Mo sipos mifala i no holem ol promes ya we mitufala i mekem, i gud Hae God i kilim mitufala i ded.”
15Haos blong woman ya i stap antap, insaed long bigfala stonwol blong taon ya, nao hem i mekemrere blong slakem tufala i gotru long windo blong stonwol ya, i godaon.
16Hem i talem long tufala se, “Yutufala i mas go kwik blong haed samples antap long hil. Sipos no, bambae ol man blong king oli faenem yutufala. Yutufala i mas stap long ples ya tri dei, nao biaen, taem ol man ya oli kambak finis, bambae yutufala i save gobak.”
17Nao tufala i talem long woman ya se, “Bambae mifala i holem promes ya we mitufala i mekem, we yu yu wantem.
18Be i gat wan samting we yu yu mas mekem. Yu tekem red string ya, nao taem mifala i kam insaed long kantri ya blong yufala, yu mas hangem string ya long windo ya, blong soemaot haos ya blong yu. Mo yu mas tekem papa mo mama blong yu, wetem ol brata blong yu, mo olgeta famle blong olgeta, oli kam stap wanples long haos ya.
19Nao sipos wan long olgeta i kamaot long haos ya nao mifala i kilim hem i ded, be bambae i no fol blong mifala, i blong hem nomo. Be sipos wan long mifala i kilim wan long olgeta ya we oli stap long haos blong yu, bambae mifala nomo i karem panis blong hem.
20Mitufala i mekem promes ya we yu yu wantem. Be sipos yu yu talemaot samting ya we mitufala i mekem, bambae mifala i no moa save holem promes ya.”
21Hem i agri long tok ya we tufala i talem, nao i slakem tufala i godaon, i sanem tufala i go. Mo taem tufala i aot finis, hem i hangem red string ya long windo ya.
22Nao tufala ya i go antap long hil, tufala i haed. Mo ol man blong king oli stap lukaot tufala olbaot long ples ya gogo kasem tri dei, be oli no faenem tufala, nao oli gobak long taon.
23Nao biaen, tufala i kamdaon bakegen, tufala i gokros long Jodan Reva, tufala i kam long Josua bakegen, nao tufala i talemaot olgeta samting we tufala i kasem.
24Mo tufala i talem se, “Naoia yumi savegud we Hae God i givim kantri ya finis long yumi. Olgeta man blong Jeriko oli seksek finis long yumi.”
Who We AreWhat We EelieveWhat We Do
2025 by iamachristian.org,Inc All rights reserved.
