Jeremaea 29 - Bislama Bible Revised 2012

Profet Jeremaea i raetem wan leta i go long ol laen blong Isrel we oli stap long Babilonia

1 2 King 24.12-16; 2 Kron 36.10 Nao Profet Jeremaea i raetem wan leta i go long ol pris,* mo ol profet, mo ol lida blong ol man, mo long ol narafala man ya we King Nebukadnesa i bin tekemaot olgeta long Jerusalem* blong oli go wok slef* long Babilonia.

2Hem i raetem leta ya, biaen long taem ya we ol man Babilonia oli tekemaot plante man oli go wok slef long ples blong olgeta. Ol man ya, i gat King Jehoeakin wetem mama blong hem, mo ol haeman blong hem, mo ol lida blong Jerusalem, mo ol lida blong ol narafala taon long Juda,* mo olgeta ya we oli gat gudhan blong wokem ol samting, mo ol blaksmit.

3Nao hem i givim leta ya long tufala man ya, Elasa, we papa blong hem Safan, mo Gemaria, we papa blong hem Hilkia, we King Jedekia blong Juda i sanem tufala i go long King Nebukadnesa. Nao tok blong leta ya i talem olsem.

4“Ol laen* blong Isrel.* Hae God ya we i gat olgeta paoa, hem i God blong yumi, mo hem i talem se, ‘Yufala ya we mi bin letem King Nebukadnesa i kam tekemaot yufala long Jerusalem, yufala i go stap long Babilonia,

5naoia, i gud yufala i wokem ol haos blong yufala, blong yufala i stap gud long hem, mo yufala i wokem ol garen blong yufala.

6Mo i gud yufala i gohed, yufala i mared, blong yufala i gat plante pikinini blong yufala. Mo ol pikinini blong yufala tu, i gud olgeta oli mared, oli gat pikinini blong olgeta. Namba blong yufala i no mas godaon, yufala i mas kam plante.

7Yufala i mas wok strong, blong givhan long ol taon ya we mi mi mekem yufala i kam wok slef long olgeta. Yufala i mas prea long mi from olgeta, from we sipos oli stap gud, oli gat plante samting, be bambae yufala tu i stap gud, yufala i gat plante samting.

8Mi mi talem strong long yufala, se yufala i mas lukaot gud long ol man ya we oli stap talem se oli profet blong yufala, wetem ol man ya we oli stap talemaot ol samting we bambae i hapen long fiuja, blong oli no giaman long yufala. Bambae yufala i no mas bilif long ol drim blong olgeta.

9Oli stap yusum nem blong mi nomo blong giaman long yufala, be mi mi no sanem olgeta nating. Mi mi Hae God, mo hemia tok blong mi.’

10 2 Kron 36.21; Jer 25.11; Dan 9.2 “ ‘Bambae yufala i stap long Babilonia gogo kasem seventi yia, mo biaen, bambae mi kam tekemaot yufala, mi tekem yufala i kambak long stret ples blong yufala bakegen, olsem we mi promes finis long yufala.

11Mi nomo mi save ol plan we mi mekem finis from yufala. Mi mi wantem we bambae yufala i stap gud olwe, trabol bambae i no kasem yufala, mo bambae yufala i stap gogo, yufala i kasem ol samting ya we tingting blong yufala i stap long hem.

12Nao long taem ya, bambae yufala i kam long mi, yufala i prea long mi, mo mi bambae mi harem yufala.

13Dut 4.29Sipos yufala i lukaot mi long olgeta tingting blong yufala, bambae yufala i save faenem mi.

14Bambae yufala i faenem mi, mo bambae mi mekem i gud long yufala. Mi mi bin ronemaot yufala i go wok slef long medel blong ol man blong ol narafala kantri, be bambae mi tekemaot yufala bakegen long olgeta ples ya. Bambae mi tekem yufala i kambak long kantri ya we yufala i stap long hem fastaem. Mi mi Hae God, mo hemia tok blong mi.’

15“Yufala i stap talem se, ‘Long ples ya, long Babilonia, Hae God i givim ol profet long mifala.’

16Be yufala i mas lesin long tok we Hae God i givim from King Jedekia we hem i rul long ples blong King Deved ya bifo, mo from ol man blong taon ya blong hem. Olgeta ya oli famle blong yufala, be hem i no tekemaot olgeta i kam wok slef wetem yufala.

17Hae God ya i gat olgeta paoa, mo hem i talem se, ‘Bambae mi letem faet, mo hadtaem blong kasem kakae, mo bigfala sik we i nogud we i nogud, i kam kasem olgeta, mo bambae mi mekem olgeta oli kam nogud, olsem frut blong fig we i roten finis, i no moa stret blong man i kakae.

18Bambae mi ronem olgeta blong spolem olgeta long faet, mo long hanggri mo long bigfala sik we i nogud we i nogud, mo taem olgeta man long wol oli luk samting ya, bambae oli seksek, oli harem nogud tumas. Long evri ples we mi mi ronemaot olgeta i go long hem, taem ol man ples ya oli luk olgeta, bambae oli sek, oli fraet gud long ol samting we i kasem olgeta ya. Ol man bambae oli mekem plei long olgeta, mo bambae oli stap yusum nem blong olgeta blong singaot* trabol i kam long man.

19Ol samting ya bambae i kasem olgeta, from we oli no obei long ol tok blong mi we ol profet blong mi oli stap gohed blong talem long olgeta. Oli no wantem lesin nating.

20Yufala evriwan we mi mi bin sanem yufala i go wok slef long Babilonia, yufala i mas lesin long ol samting ya we mi mi talem long yufala.’

21“Hae God ya we i gat olgeta paoa, hem i God blong yumi, mo hem i talem se, ‘Ehab, we papa blong hem Kolaea, mo Jedekia, we papa blong hem Mahasea, tufala i stap giaman long yufala long nem blong mi. Nao from samting ya, bambae mi letem tufala ya i go long han blong King Nebukadnesa, nao bambae hem i kilim tufala i ded, stret long fes blong yufala.

22Nao taem yufala ya we oli tekemaot yufala long Juda, yufala i kam wok slef long Babilonia, yufala i wantem singaot trabol i kam long wan man, bambae yufala i save yusum nem blong tufala ya se, “Hae God bambae i mekem long yu, olsem we hem i mekem long Jedekia mo Ehab, we hem i letem king blong Babilonia i bonem tufala long faea, we tufala i laef nomo.”

23Panis blong tufala bambae i olsem, from we tufala i mekem ol samting we i nogud we i nogud. Tufala i stap stilim woman blong narafala man, mo tufala i stap talem ol giaman toktok long nem blong mi, we mi mi no talem long tufala nating. Ol samting we tufala i stap mekem, mi mi save finis, mo mi nao mi witnes agens long tufala. Mi mi Hae God, mo hemia tok blong mi.’ ”

Leta blong Semaea

24-25Nao Profet Jeremaea i talem se, “Olgeta. Yumi ol laen* blong Isrel,* mo Hae God ya we i gat olgeta paoa, hem i God blong yumi, mo hem i givim wan tok long mi, blong mi talemaot long Semaea we i man Nehelam. Man ya i bin raetem wan leta blong hem, nao i sanem i go long ol man Jerusalem,* mo long pris* ya Sefanaea, we papa blong hem blong Mahasea, mo long ol narafala pris tu long Jerusalem. Tok blong leta ya i talem olsem.

26‘Sefanaea. Hae God i mekem yu yu pris blong tekem ples blong Jehoeada, mo naoia, yu yu kam wan haeman finis long haos* blong Hae God. Mo wok blong yu i blong holem olgeta we hed blong olgeta i krangke, we oli stap talem se oli profet, mo blong fasemgud olgeta, mo blong putum bigfala aean long nek blong olgeta.

27?Be from wanem yu no mekem olsem long man Anatot ya Jeremaea, we hem i stap toktok long yufala olsem we hem i profet?

28Hem i mas lego fasin ya, from we hem i talem long mifala ya we i stap wok slef* long ples ya long Babilonia, se bambae mifala i stap long ples ya longtaem yet, mo mifala i mas wokem ol haos blong mifala, mo mifala i mas wokem ol garen blong mifala.’ ”

29Taem Sefanaea i ridimaot leta ya long Profet Jeremaea finis,

30Hae God i talem long profet ya

31-32blong i sanem tok i go long olgeta man we oli stap wok slef long taon ya Babilon blong talemaot panis we Semaea bambae i kasem. Tok blong leta ya i talem olsem.

“Ol laen blong Isrel. Hae God i talem se, ‘Mi bambae mi panisim Semaea wetem ol pikinini blong hem, mo ol smol bubu blong hem. Man ya, mi mi no sanem hem nating, be hem i kam toktok long yufala olsem we hem i wan profet, mo hem i mekem yufala i bilif long ol giaman toktok blong hem. Yufala i man blong mi, be bambae i no moa gat wan long ol laen blong hem i stap laef, blong luk ol gudgudfala samting we mi bambae mi mekem long yufala, from we hem i stap talem long yufala, blong yufala i girap agens long mi. Mi mi Hae God, mo hemia tok blong mi.”