Efesas Sotfala stori blong buk ya - Bislama Bible Revised 2012

Sotfala stori blong buk yaStamba tingting we Pol i tokbaot long leta ya we hem i raetem i go long ol Kristin man long Efesas, hemia tok blong japta 1 vas 10 we i tokbaot plan blong God. Hem i talem se God “i wantem se olgeta samting we hem i mekem, bambae oli kam joen wanples. Hem i wantem we olgeta samting long heven mo long wol bambae oli kam joen long Kraes*, we hem i olsem hed blong olgeta samting.” Mo Pol i tokbaot bigfala plan blong God, we plan ya i blong olgeta man long evri ples oli joen gud long wan kampani nomo, mo oli save mekem olsem sipos oli bilif long Jisas Kraes. Mo hem i talemgud long olgeta man blong God blong oli soemaot plan ya long laef blong olgeta.Long fas haf blong leta ya, Pol i tokbaot rod we God Papa blong yumi i yusum blong mekem olgeta man oli kam wan. Hem i tokbaot fasin ya we God i jusumaot ol man blong hem, mo i tokbaot we long Jisas Kraes Pikinini blong God, God i fogivim ol man ya blong hem, i tekemaot sin blong olgeta, i mekem olgeta i fri. Mo hem i tokbaot tu we God i givim Tabu Spirit long ol man blong hem, blong soemaot we hem bambae i givim ol samting long olgeta, olsem we hem i promes blong mekem. Long seken haf blong leta ya, Pol i talem long ol man we bambae oli ridim leta ya, se olgeta oli mas soemaot we oli wan wetem Kraes, long fasin ya we oli save joen gud wetem ol narafala Kristin man.Pol i yusum ol parabol, blong soemaot fasin ya we ol man blong God oli stap joen gud long Kraes. Hem i talem se jos i olsem bodi we Kraes i hed blong hem, mo i olsem haos we Kraes i nambawan pos blong kona blong hem, mo i olsem woman we Kraes i man blong hem. God i lavem tumas olgeta man long wol, mo ol man oli luk lav ya long Kraes. Bigfala lav ya blong God i stikim tingting blong Pol, nao hem i talemaot bilif blong hem long leta ya. Leta ya i soemaot fasin blong Kraes we hem i lavem yumi, mo i ded blong pemaot yumi, mo i fogivim yumi, mo i stap givhan long yumi long gladhat blong hem, mo we hem i stret gud long fes blong God.Ol haf blong buk yaFastok 1.1-2

Kraes mo jos blong hem 1.3—3.21

Niufala laef long Kraes 4.1—6.20

Lastok 6.21-24