Eksodas 15 - Bislama Bible Revised 2012

Singsing blong Moses

1

6“Hae God.

Yu yu King, mo raethan blong yu i gat bigfala

paoa.

Mo long raethan ya blong yu, yu stap brebrekem ol enemi blong

yu

long ol smosmol pis.

7Long bigfala paoa ya blong yu, yu stap smasem olgeta

we oli girap agens long yu.

Mo taem yu yu kros long ol man, yu faerap, yu gohed long olgeta

olsem we faea i kakae gras we i

drae.

8Taem yu yu blu long solwota, win blong yu i mekem

solwota i seraot long tu haf,

i stanap stret olsem stonwol, mo botom blong hem daon i kam drae, i kam strong.

9“Enemi blong mifala i talem se, ‘Bambae mi biaen long olgeta,

mi kasem olgeta. Bambae mi kilim olgeta oli ded long naef blong faet blong mi,

mo bambae mi tekemaot

olting blong olgeta.

Bambae mi seraot olting ya long ol man blong mi,

mo bambae mi holem

olsem we mi mi wantem.’

10Be yu yu blu wantaem nomo, nao ol man Ijip ya evriwan

oli draon long solwota.

Olgeta oli draon wantaem nomo, olsem led blong huk

we i draon long medel solwota.

11“Hae God.

I gat plante narafala god long wol ya, be i no gat wan long olgeta

we i olsem yu.

Yu yu gudfala tumas, mo yu tabu we yu tabu.

Yu yu stap mekem ol merikel mo ol bigbigfala wok,

mo ol man oli fraet tumas long yu.

I no gat narafala god nating we i olsem yu.

12Yu yu leftemap raethan blong yu nao graon i open,

i solemdaon ol enemi blong mifala.

13Mifala i man blong yu, mo oltaem yu stap lavem mifala,

nao yu yu mekem mifala i fri, mo yu stap lidim mifala.

Long paoa blong yu, yu stap soemaot rod,

blong mifala i go long ples ya we yu yu makemaot se i tabu,

i blong yu nomo.

14Taem ol man blong ol narafala kantri oli harem nius blong ol samting ya,

oli fraet, oli seksek.

Ol man Filistia oli fraet tumas, oli stap harem nogud from,

15mo ol lida blong ol man Edom oli fraet we i fraet.

Ol strong man blong faet long Moab oli fraet gud, oli seksek tumas,

mo ol laen blong Kenan,* tingting blong olgeta i foldaon

olgeta.

16Olgeta ya oli fraet tumas, tingting blong olgeta i kam nogud

olgeta.

Hae God, fastaem mifala i slef* nomo,

be yu yu pemaot mifala, yu mekem mifala i fri, mo taem olgeta ya oli luk bigfala

paoa blong yu,

oli fraet we i fraet, we oli no save mekem wan

samting.

Long taem ya, olgeta oli stap stanap nomo,

oli stap lukluk mifala, gogo mifala evriwan i wokbaot i

go.

17“Hae God.

Yu yu jusumaot hil ya finis

we yu yu stap long hem, mo long han blong yu nomo, yu wokem tabu ples blong yu long hem,

nao bambae yu tekem mifala

i go stap long hil ya blong yu.

18Yu bambae yu King oltaem nomo, gogo i no save finis.”

19Long taem ya we ol laen blong Isrel oli gokros long narasaed solwota ya, oli wokbaot long drae graon nomo. Be taem ol man Ijip oli tekem ol kat blong faet blong olgeta, oli biaen long olgeta, Hae God i mekem solwota i kambak, i kavremap olgeta, nao oli draon evriwan, wetem ol hos blong olgeta mo ol draeva blong olgeta.

Sing blong Meriam

20Nao Meriam we i sista blong Eron, mo i woman profet, hem i tekem tamborin blong hem, mo olgeta narafala woman tu oli tekem ol tamborin blong olgeta, oli biaen long hem, nao oli stap plei long ol tamborin ya, mo oli stap danis.

21Nao Meriam i stap lidim olgeta long wan sing. Ol toktok blong sing ya i olsem,

“Yumi sing blong presem Hae God, from we hem i win gud long faet ya,

nao nem blong hem i go antap.

Ol hos wetem ol man blong olgeta, hem i sakem olgeta finis

oli go draon long solwota.”

Wota we i konkon

22Nao Moses i lidim olgeta, oli aot long Red Si bakegen, oli go long draeples ya long Suru. Oli wokbaot tri dei long draeples ya, be oli no luk wan wota we oli save dring.

23Nao oli kamtru long wan ples we i gat wota long hem, be oli no save dring wota ya, from we i konkon. Taswe nem blong ples ya Mara, we i min se Konkon.

24Nao olgeta oli stap tok agens long Moses, oli talem se, “?Bambae yumi dring wanem nao?”

25Nao Moses i prea strong long Hae God, mo Hae God i soem wan stik long hem. Nao hem i tekem stik ya, i sakem i go long wota ya, nao wota ya i kam gud, i no moa konkon.

Nao taem olgeta oli stap long ples ya, Hae God i talemaot ol loa blong hem mo ol tingting blong hem long olgeta blong oli folem long laef blong olgeta, mo i traem bilif blong olgeta tu.

26Hem i talem se, “Mi mi Hae God, mo taem yufala i sik, mi ya nao mi stap mekem yufala i oraet bakegen. Sipos yufala i stap obei gud long mi, mo yufala i stap mekem ol samting ya we mi mi luk se i stret, mo yufala i stap folem ol tok blong mi, bambae mi no save letem ol sik ya oli kam kasem yufala, we mi panisim ol man Ijip ya long hem.”

27Nao biaen, olgeta oli aot, oli go kasem ples ya Elim. Long ples ya i gat twelef springwota mo seventi pamtri* i stap long hem. Nao oli putumap ol haos tapolen blong olgeta long ples ya, klosap long ol springwota ya.