Eksodas 32 - Bislama Bible Revised 2012

Eron i wokem pija blong bul long gol(Dutronome 9.6-29)

1 Wok 7.40 Nao taem ol man oli luk we Moses i no moa kamdaon, i stap longtaem tumas antap long hil ya, olgeta oli kam hivap raon long Eron, oli tok strong long hem, oli talem se, “Moses ya i tekemaot yumi long Ijip, i lidim yumi i kam long ples ya, be naoia yumi no moa save wanem i mekem hem. Mifala i wantem yu yu wokem wan god blong yumi, blong i lidim yumi.”

2Nao Eron i talem long olgeta se, “Ale, yufala i go tekemaot olgeta iaring ya we oli wokem long gol we ol woman blong yufala wetem ol pikinini boe mo gel blong yufala oli stap werem, yufala i tekem olgeta i kam long mi.”

3Nao olgeta oli go tektekemaot ol iaring ya, oli tekem i kam long Eron.

41 King 12.28; Wok 7.41Nao Eron i kukum olgeta blong gol i ronaot, nao i kafsaedem gol ya i go long wan spesel hol we oli wokem long sanbij, mo taem gol ya i kam strong bakegen, hem i kam pija blong bul. Nao hem i stanemap bul ya, mo ol man oli talem se, “!Olgeta! Hemia nao God blong yumi, we i tekemaot yumi long Ijip.”

5Nao Eron i wokem wan olta long fran blong bul ya, mo i talemaot long olgeta se, “Tumora, bambae yumi mekem wan lafet blong ona long Hae God ya.”

61 Kor 10.7Nao long nekis dei, long eli moning, ol man oli tekem ol anamol i kam, nao oli mekem sakrefaes long bul ya, we sam, oli bonem we i bon evriwan, mo sam, oli bonem haf, oli kakae haf blong soemaot we oli stap fren gud wetem hem. Be taem oli sidaon blong kakae haf blong ol sakrefaes ya, oli kakae mo oli dring gogo oli drong, nao oli stap slip wetem woman olbaot long klia ples nomo.

7Nao Hae God i talem long Moses se, “Moses. Yu godaon bakegen kwiktaem, from we ol man ya blong yu we yu tekemaot olgeta long Ijip, naoia oli tanem baksaed finis long mi, oli stap mekem sin.

8Fasin ya we mi mi talem long olgeta blong oli folem, olgeta oli lego finis. Olgeta oli girap, oli wokem pija blong bul long gol, nao oli stap mekem wosip long hem, mo oli stap mekem sakrefaes long hem tu. Mo oli stap talem se bul ya nao i god blong olgeta we i tekemaot olgeta long Ijip.

9Mi mi save we ol man ya oli stronghed tumas.

10Mi mi kros finis. I nogud yu traem blokem mi. Naoia mi mas spolem olgeta. Nao bambae mi mekem yu nomo wetem olgeta we oli kamaot biaen long yu oli kam plante we plante.”

11 Nam 14.13-19 Be Moses i krae long hem, i talem se, “Hae God, yu yu God blong mi. Ol man ya oli man blong yu. Yu nomo yu tekemaot olgeta long Ijip, long bigfala paoa blong yu. ?From wanem yu kros tumas olsem, yu wantem spolem olgeta?

12Yu no save mekem olsem, from we ol man Ijip bambae oli talem se yu yu trikim ol man ya nomo blong oli kam long ol hil ya blong yu kilim olgeta, yu finisimgud olgeta. Naoia, plis yu no moa kros long olgeta, yu jenisim tingting blong yu. Olgeta oli man blong yu ya. Plis yu no letem wan bigfala trabol i kam kasem olgeta.

13Jen 22.16,17; 17.8Yu mas tingbaot trifala man ya blong wok blong yu bifo, Ebraham, mo Aesak, mo Jekob,* mo yu mas tingbaot promes* ya we yu mekem wetem trifala. Yu yu bin talem long trifala, se olgeta we bambae oli kamaot biaen long trifala bambae oli kam plante we plante, olsem ol sta long skae. Mo yu talem tu long trifala, se olgeta we bambae oli kamaot biaen long trifala, yu bambae yu givim graon long olgeta we bambae oli holem i blong olgeta oltaem, gogo i no save finis.”

14Nao Hae God i jenisim tingting blong hem, i no moa mekem bigfala trabol ya i kam kasem ol man blong hem, olsem we hem i talem fastaem, se bambae i mekem.

15Nao Moses i aot long hil ya, i kamdaon, mo i karem tufala flat ston ya we Hae God i bin raetem Tenkomanmen blong hem finis long tu saed blong tufala.

16Hae God nomo i bin mekem tufala ston ya, mo hem nomo i katem ol tok ya long tufala.

17Nao Josua i harem noes blong ol man ya we oli stap singsingaot, nao i talem long Moses se, “Mi mi harem noes olsem we ol enemi blong yumi oli kam mekem faet long ol man blong yumi.”

18Be Moses i talem se, “No, hemia i no noes blong man we i win long faet, mo i no noes blong man we i lus tu. Hemia olgeta ya nomo. Oli stap singsing from we oli harem gud.”

19Nao Moses i kam long botom blong hil, mo taem hem i kam klosap lelebet, we i save luk bul ya, wetem ol man ya we oli stap danis, hem i kros we i kros, nao hem i sakem tufala ston ya we hem i stap holem, i godaon long graon, nao tufala i brok.

20Mo hem i tekem bul ya we oli bin wokem, i bonem long faea, mo taem gol i ronaot finis, hem i tekem, i graenem i kam paoda, nao i miksimap wetem wota, mo i mekem olgeta ya oli dring wota ya.

21Nao hem i tok long Eron, i talem se, “!Sin ya we yufala i mekem i nogud olgeta! ?Olgeta oli mekem wanem long yu, blong yu lidim olgeta oli mekem fasin ya?”

22Nao Eron i talem se, “No, yu no kros long mi. Yu yu save finis. Oltaem ol man ya oli wantem tumas blong mekem ol fasin we i no stret.

23Oli kam tok strong long mi, oli talem se, ‘Moses ya we i tekemaot yumi long Ijip, i lidim yumi i kam long ples ya, naoia yumi no moa save wanem i mekem hem. Mifala i wantem yu yu wokem wan god blong yumi blong i lidim yumi.’

24Nao mi talem long olgeta se, ‘Yufala we i gat ol flas samting we oli wokem long gol, yufala i go tekemaot, yufala i karem i kam long mi,’ mo oli mekem olsem. Nao mi sakem ol samting ya i go long faea, mo taem i ronaot, pija ya blong bul i kamaot long hem.”

25Be Moses i luk we Eron i no bin traehad nating blong blokem ol man ya, i jes letem olgeta oli mekem hed blong olgeta nomo, nao oli mekem ol rabis fasin long ples we ol enemi blong olgeta oli save luk olgeta.

26Nao hem i go stanap long rod blong go insaed long ol haos tapolen blong olgeta, i singaot i go long olgeta se, “!Man we i stap yet long saed blong Hae God, hem i mas kam long ples ya!” Nao ol laen* blong Livae* oli girap, oli go stanap long ples ya.

27Nao hem i talem long olgeta se, “Yumi ol laen blong Isrel,* mo Hae God i God blong yumi, be hem i talem se, ‘Naoia yufala evriwan i mas holem naef blong faet blong yufala, yufala i go kilim ol brata blong yufala, mo ol fren blong yufala, mo ol man we oli stap raonabaot long yufala, i stat long ples ya, i go finisim olgeta ples ya blong yumi.’ ”

28Nao olgeta oli mekem olsem we hem i talem, mo long dei ya, oli kilim klosap tri taosen man oli ded.

29Nao hem i talem long olgeta se, “Tede, yufala i kam tabu, yufala i kam man blong wok blong Hae God. Tede, yufala i mekem wok blong hem, from we olgeta ya we yufala i kilim olgeta, oli pikinini blong yufala mo oli brata blong yufala. From samting ya, tede, Hae God i blesem yufala.”

30Nao long nekis dei, Moses i tok long olgeta man, i talem se, “!Olgeta! !Sin ya we yufala i mekem i nogud we i nogud! Naoia bambae mi go antap long hil ya bakegen blong toktok wetem Hae God. Maet mi save mekem rod, blong hem i tekemaot sin ya blong yufala.”

31Nao hem i go antap long hil ya bakegen blong toktok wetem Hae God, mo i talem long hem se, “Hae God. Ol man ya oli mekem wan sin we i nogud olgeta. Oli wokem wan narafala god long gol, mo oli stap mekem wosip long hem.

32Sam 69.28; Rev 3.5Plis yu fogivim olgeta, yu tekemaot sin ya blong olgeta. Be sipos yu no save mekem olsem, i gud yu tekemaot nem blong mi tu long buk* ya we yu raetem nem blong ol man blong yu long hem.”

33Be Hae God i talem se, “No, olgeta ya nomo we oli mekem sin, bambae mi tekemaot nem blong olgeta long buk ya.

34Naoia yu gobak, yu tekem ol man ya, yu lidim olgeta gogo yufala i kasem kantri ya we mi bin talem long yu bifo. Bambae yu no foget we enjel blong mi bambae i go fastaem long yufala, be i gat taem i stap kam, we bambae mi givim panis long olgeta ya from sin ya blong olgeta.”

35Nao biaen, Hae God i sanem wan sik i kam kasem ol man ya from we oli bin fosem Eron blong i wokem pija ya blong bul.