Hibrus 9 - Bislama Bible Revised 2012

1Long promes* ya we God i mekem wetem ol man blong hem bifo, i gat ol fasin blong mekem wosip, mo i gat ples blong mekem wosip, we ples ya i blong wol ya nomo.

2 Mo Haos Tapolen ya we hem i stap long hem blong mekem ol wok blong hem blong pris*, hem i moa gud, mo i stret olgeta, i winim hemia blong fastaem. Haos ya i no wan samting we ol man oli stanemap, mo i no wan samting blong wol ya we God i mekem.

12Nao taem Kraes i go insaed long Haos Tapolen ya, hem i go stret insaed long Rum we i Tabu we i Tabu, be hem i no mekem olsem we ol narafala hae pris oli mekem. Hem i no tekem blad blong man nani mo blad blong smol bul blong tekemaot ol sin blong ol man, nogat. Hem i tekem blad blong hem nomo, nao i go insaed wan taem nomo, i mekem wok ya blong tekemaot ol sin blong yumi, mo i mekem yumi fri, nao bambae yumi fri gogo i no save finis.

13Lev 16.15,16; Nam 19.9,17-19Blad blong man nani mo blad blong ol bul mo asis blong ol yang kao we oli bonem long Olta, oli gat wok blong olgeta. Ol pris oli saksakem smosmol i go long ol man we oli no klin long fes blong God. Nao long fasin ya olgeta oli kam klin bakegen.

14Be blad blong Kraes i save mekem wok we i strong moa, i winim wok blong ol samting ya blong bifo. Kraes i olsem wan anamol we i no gat wan samting nating i rong long bodi blong hem, we oli kilim blong tekemaot sin blong man. Long paoa blong Tabu Spirit ya we i stap oltaem nomo, hem i givim laef blong hem i go long God. Blad ya blong hem i stap mekem tingting blong yumi i klin long ol samting we yumi mekem we i blong ded nomo, blong yumi save mekem ol wok blong God ya we i laef, i stap we i stap.

15From samting ya, Kraes i prapa man blong stanemap niufala promes* ya blong God, from we taem hem i ded, hem i mekem wok blong tekemaot ol sin blong ol man we oli brekem ol loa blong fas promes ya we God i mekem wetem ol man. Ol man ya we God i singaot olgeta, hem i mekem olgeta oli fri finis, nao oli save kasem ol gudgudfala samting we oli no save lus samtaem, we God i promes finis blong givim long olgeta.

16Sipos wan man i mekem promes, se taem hem i ded, bambae ol samting blong hem oli blong narafala man, i klia gud long ol man, we man ya i mas ded fastaem, blong promes ya bambae i stanap.

17Promes olsem i no save stanap long taem ya we man we i mekem i stap laef yet. Promes olsem i save stanap long taem ya nomo we man we i mekem i ded finis.

18Nao long fasin ya, taem fas promes ya blong God i stap, be wan anamol no wan pijin i mas ded fastaem, blad blong hem i mas ron blong mekem promes ya i stanap.

19Eks 24.6-8Long taem ya bifo, Moses i toktok long olgeta man fastaem, i talemaot olgeta rul ya we i stap long Loa* blong God, stret olsem we Loa ya i talem. Nao biaen, i tekem blad blong smol bul wetem blad blong man nani, mo i miksimap wetem wota. Nao hem i tekem lif blong smol wud ya hisop* wetem hea blong sipsip we i red, i pusum i go long blad ya, nao i sakem blad ya i go smosmol olbaot long buk* ya blong Loa blong God, mo long olgeta man tu.

20Nao hem i talem se, “Hemia blad blong mekem promes ya blong God i stanap. Promes ya, God i talem finis se yufala i mas ona long hem.”

21Lev 8.15Mo long sem fasin, Moses i sakem blad ya i go smosmol olbaot long Haos Tapolen, mo long olgeta samting we oli stap yusum blong mekem wosip.

22Lev 17.11Long fasin blong Loa ya, klosap olgeta samting, be pris i mas yusum blad blong anamol no pijin blong mekem olgeta oli klin long fes blong God. Mo sipos i no gat blad i ron, bambae God i no save tekemaot sin blong man.