Levitikas 24 - Bislama Bible Revised 2012

Ol Laet blong Haos Tapolen blong Hae God(Eksodas 27.20-21)

1Nao Hae God i givim tok blong hem long Moses bakegen,

2blong i go talemaot long ol laen* blong Isrel.* Hem i talem se, “Yufala i mas tekem olifoel* we i klin gud, i beswan, blong putum long ol laet insaed long Haos Tapolen blong mi, blong ol laet long ples ya bambae oli save stap laet oltaem.

3Evri naet, Hae Pris Eron i mas laetem olgeta, mo i mas lukaot long olgeta, blong oli stap laet long fes blong mi go kasem long moning. Ol laet ya oli mas stap long fes blong mi insaed long Haos Tapolen blong mi, long fran blong kaliko ya we i blong blokem Bokis ya we i Saen blong Promes* blong mi. Rul ya, ol pikinini blong yufala wetem olgeta we bambae oli kamaot biaen long yufala oli mas holem olwe, gogo i no save finis.

4Ol laet ya oli gat wan spesel stamba blong olgeta we oli wokem long gol, mo hae pris ya i mas lukaot gud long olgeta, blong oli stap laet gud oltaem long fes blong mi.”

Bred we i tabu, i blong Hae God

5 Eks 25.30 Bakegen, Hae God i talem se, “Bambae yufala i mas tekem twelef kilo flaoa, nao yufala i mas wokem twelef bred* long hem we i no gat is long hem,

6nao yufala i mas tekem ol bred ya i kam long fes blong mi, yufala i mas putum olgeta long Tebol ya blong Bred we oli blokem ol wud blong hem long gol we i klin gud, i beswan. Yufala i mas putum ol bred ya long tu laen, we i gat sikis long wan, sikis long wan.

7Mo yufala i mas tekem insens* we i klin gud, yufala i mas putum wetem ol bred ya long tufala laen ya. Nao taem yufala i bonem insens ya, bambae hem i olsem saen blong soemaot we yufala i givim ol bred ya i kam long mi.

8Nao evri wik, long Sabat* dei, yufala i mas putum ol bred olsem i stap long fes blong mi, mo yufala i mas mekem samting ya oltaem nomo gogo i no save finis.

9Mat 12.4; Mak 2.26; Luk 6.4Ol bred ya i blong hae pris ya wetem ol pikinini blong hem mo olgeta we bambae oli kamaot biaen long hem, mo oli mas kakae insaed long tabu ples ya from we hem i haf blong ol kakae ya we i blong bonem long Olta blong givim i kam long mi, mo hem i tabu we i tabu.”

Wan man i kasem panis from we i tok nogud long nem blong Hae God

10-11Nao i gat wan man i stap we papa blong hem i wan man Ijip mo mama blong hem i laen* blong Isrel,* we nem blong hem Selomit. Hem i dota blong wan man nem blong hem Dibri, we i laen blong Dan.* Nao wan dei, man ya wetem wan man we i stret laen blong Isrel, tufala i rao long ples ya we ol haos tapolen blong olgeta oli stap long hem, mo taem tufala i stap rao, hem i tok nogud long nem blong Hae God. Nao ol man oli holem hem, oli tekem hem i go long Moses.

12Nao oli putum ol man oli stap gad long hem, mo oli wet long Hae God blong i talemaot long olgeta wanem samting we bambae oli mas mekem long hem.

13Nao Hae God i talem long Moses se,

14“Yufala i tekem man ya i gowe long ples ya we ol haos tapolen blong yufala i stap long hem, yufala i karem hem i go afsaed, nao bambae olgeta we oli harem tok nogud ya we hem i talem oli mas kam putum han blong olgeta long hed blong hem, blong talemaot we hem i mekem samting nogud ya, nao yufala evriwan i mas joen blong stonem hem i ded.

15Mo biaen, yu yu mas talemaot long ol laen blong Isrel we mi mi talem se, ‘Man we i spolem nem blong mi, bambae hem i mas kasem panis.

16Bambae yufala evriwan i mas kilim hem i ded. Nating we hem i wan long yufala no wan narafala man we i stap wetem yufala, be sipos hem i spolem nem blong mi, bambae yufala evriwan i mas joen blong stonem hem i ded.’ ”

17 Eks 21.12 Mo Hae God i talem se, “Sipos wan man i kilim wan narafala man i ded, bambae yufala i mas kilim hem i ded.

18Mo sipos wan man i kilim wan anamol blong wan narafala man i ded, bambae hem i mas givim jenis blong anamol ya long man ya blong tekem ples blong hem. Stamba blong ol bisnes ya, jenis blong laef, laef.

19Sipos wan man i mekem narafala man i karekil, bambae yufala i mas go mekem man ya tu i karekil long sem fasin we hem i mekem long hem.

20Eks 21.23-25; Dut 19.21; Mat 5.38Sipos wan man i brekem bun blong narafala man, bambae yufala i mas go brekem bun blong hem tu. Sipos man i spolem ae blong narafala man, bambae yufala i mas go spolem ae blong hem tu. Sipos wan man i faetem narafala man nao i brekem wan tut blong hem, bambae yufala i mas go brekem wan tut blong hem tu. Nomata wanem samting we man i mekem blong mekem narafala man i karekil, be yufala i mas mekem sem samting long man ya blong mekem hem tu i karekil.

21Man we i kilim anamol blong narafala man bambae i mas tekem jenis blong anamol ya i kam blong givim long hem. Be man we i kilim wan narafala man i ded, bambae yufala evriwan i mas kilim hem tu i ded.

22Nam 15.16Mi mi Hae God, mi God blong yufala, mo loa ya i blong yufala evriwan. Nating we man ya i laen blong yufala, no i narafala man we i stap wetem yufala, be loa ya i kavremap yufala evriwan.”

23Nao taem Moses i go talemaot ol tok ya blong Hae God long ol man, olgeta oli tekem man ya we i tok nogud long nem blong Hae God, oli aot long ples ya we oli stap long hem oli go afsaed, nao oli stonem hem gogo i ded. Long fasin ya, oli mekem olgeta samting ya we Hae God i talem long hem.