Jajes 6 - Bislama Bible Revised 2012

Ol man Midian oli stap spolem ol man blong Hae God

1Nao ol laen* blong Isrel* oli stap mekem ol fasin nogud bakegen agens long Hae God, mo from samting ya, hem i putum olgeta oli stap seven yia long han blong ol man Midian, blong ol man Midian ya oli rulum olgeta.

2Be from we ol man Midian ya oli strong tumas, ol laen blong Isrel ya oli ronwe long olgeta, oli go stap haed long ol hol blong ston, mo long ol gudfala ples blong haed antap long hil.

3Mo oltaem, taem we olgeta oli stap planem garen blong olgeta, ol man Midian wetem ol laen blong Amalek, mo ol man blong draeples saed i go long is, oli stap joen wanples blong kam mekem faet long olgeta.

4Ol enemi ya oli stap kam putumap ol haos tapolen blong olgeta long kantri ya, mo oli stap spolem ol garen blong olgeta ya olbaot long kantri ya, go kasem ol ples ya long saot klosap long taon ya Gasa. Oli no save livim wan samting nating i stap blong ol laen blong Isrel oli kakae, mo oli stap stilim ol sipsip mo ol buluk mo ol dongki blong olgeta tu.

5Oli stap kam wetem ol anamol blong olgeta, mo ol haos tapolen blong olgeta we oli plante we plante, mo oli kavremap olgeta ples olsem anis. Ol man ya wetem ol kamel blong olgeta oli plante tumas, man i no save kaontem olgeta. Oli stap kam spolem olgeta ples ya,

6mo ol laen blong Isrel ya oli no save blokem olgeta. Nao from samting ya, oli krae i go long Hae God blong hem i givhan long olgeta.

Wan profet i kam talemaot tok blong Hae God long olgeta

7Nao taem we ol laen* blong Isrel* oli krae i go long Hae God blong i givhan long olgeta from we ol man Midian ya oli stap spolem olgeta,

8hem i sanem wan profet i kam blong talemaot tok blong hem long olgeta. Profet ya i talem se, “!Olgeta! Hae God i God blong yumi, mo hem i talem se, ‘Bifo, taem we ol olfala blong yufala oli stap long han blong ol man Ijip, we oli slef* nomo blong olgeta, be mi mi tekemaot olgeta.

9Mi mi mekem ol man Ijip ya oli lego olgeta, mo biaen, taem we ol man Kenan* oli stap faet long olgeta, mi mi stap givhan long olgeta. Long taem ya we ol olfala blong yufala oli stap kam insaed long kantri ya, mi mi ronemaot ol enemi ya blong olgeta long fes blong olgeta, mo mi givim kantri ya i go long olgeta.

10Long taem ya, mi talem long ol olfala blong yufala se, ‘Mi mi Hae God, mi God blong yufala. Mo bambae yufala i no mas go mekem wosip long ol god blong ol laen blong Amoro,* we yufala i stap finis long graon blong olgeta. Be yufala i no harem tok blong mi nating.’ ”

Hae God i kamtru long Gideon i toktok wetem hem

11Nao i gat wan man i stap long vilej ya Ofraha, we nem blong hem Joas. Hem i wan laen* blong Abiesa, mo i gat wan bigfala oktri* i stap long graon blong hem. Nao pikinini blong hem Gideon, hem i stap kilim ol hed blong wit* blong tekemaot kakae blong hem. Be hem i wantem haedem kakae ya blong ol man Midian oli no luk, nao i stap wokem long wan hol we oli katem long ston blong mekem waen long hem. Nao Hae God i kam olsem man blong karem tok, mo i kam sidaon aninit long oktri ya.

12Mo taem Gideon i luk hem, man ya i talem long hem se, “!Strong man blong faet! !Naoia Hae God i stap wetem yu!”

13Be Gideon i talem long hem se, “Yes fren, be yu luk. ?Sipos Hae God i stap wetem mifala, be from wanem ol samting ya oli stap kam long mifala olsem? ?Weswe long ol tok ya we ol olfala blong mifala bifo oli stap talem? Oli talem se taem Hae God i tekemaot olgeta long Ijip bifo, hem i wokem ol bigbigfala wok blong givhan long olgeta. Be naoia hem i lego mifala finis, i livim mifala i stap long han blong ol man Midian ya.”

14Be Hae God i talem long hem se, “Gideon. Mi nao mi sanem yu. Yu yu wan man we yu gat paoa. Yu mas go tekemaot ol man ples ya blong yu we oli stap long han blong ol man Midian ya, yu mas sevem olgeta.”

15Be Gideon i talem se, “?Masta,* bambae mi mi sevem olgeta olsem wanem? Mifala ya ol laen blong Manase,* be long laen ya, famle blong mifala ya we i laen blong Abiesa, hem i smol moa long ol narafala famle blong laen ya. Mo bakegen, mi, long famle blong mi, oli no kaontem mi nating.”

16Be Hae God i talem long hem se, “Bambae yu yu save wokem ol samting ya, from we mi bambae mi stap givhan long yu. Bambae yu flatem ol man Midian ya olsem we yu flatem wan man nomo.”

17Nao Gideon i talem se, “Sipos yu luk se mi save wokem olgeta samting ya, i gud yu mekem wan saen long mi, blong soemaot we yu yu Hae God tru, we yu stap toktok wetem mi.

18Plis, mi wantem blong yu stap wet long ples ya fastaem. Bambae mi go tekem sam kakae blong givim long yu, blong mekem wosip long yu.”

Nao hem i talem se, “I gud nomo, yu go. Bambae mi mi stap wet long yu long ples ya.”

19Nao Gideon i go, i kilim wan yang nani, i kukum, mo i tekem ten kilo flaoa, i wokem bred* we i no gat is long hem. Hem i putum mit ya long wan basket, mo i putum supsup blong hem long wan sospen. Nao i karem ol kakae ya i kam long man ya we i stap wet long hem aninit long oktri ya, mo i givim long hem.

20Nao man ya i talem long hem se, “Ale, yu putum mit wetem bred ya long ston ya, mo yu kafsaedem supsup i go long hem.” Mo hem i mekem olsem.

21Man ya i gat wan stik long han blong hem, mo i pusum stik ya we en blong hem i go kasem mit mo bred ya, nao wantaem nomo, faea i laet long ston ya, i kakae ol samting ya. Mo semtaem nomo, man ya i lus, Gideon i no moa luk hem bakegen.

22Nao Gideon i jes savegud se man ya i man blong karem tok blong Hae God, mo hem i fraet we i seksek tumas from. Hem i talem se, “Hae God, yu yu Masta* blong mi. Mi mi harem nogud tumas, from we mi luk man blong karem tok blong yu, stret long ae blong mi.”

23Be Hae God i talem long hem se, “Yu no fraet. I gud nomo. Yu no save ded.”

24Nao Gideon i girap, i wokem wan olta blong mekem wosip long Hae God long ples ya, mo i putum nem blong hem se “Hae God i Givim Pis.” Mo olta ya i stap yet long Ofraha, long graon blong ol laen blong Abiesa.

Gideon i brekemdaon olta blong god ya Bal

25Nao long naet ya, Hae God i talem long Gideon se, “Gideon. Yu tekem seken bul ya blong papa blong yu, we i gat seven yia blong hem, nao yu go brekemdaon olta ya we papa blong yu i wokem blong mekem wosip long god ya Bal.* Mo yu katemdaon tabu pos ya we i stanap klosap long hem, we i blong woman god ya Asera.*

26Biaen, yu wokem wan narafala olta long stret fasin blong wokem, antap long smol hil ya, blong mekem wosip long mi. Nao yu kilim bul ya, mo yu katkatem pos ya we yu katemdaon finis, yu yusum blong bonem bul long olta ya, blong mekem wosip long mi.”

27Nao Gideon i tekem ten man blong hem, blong go mekem olsem we Hae God i talem, be oli no go mekem long dei, oli go mekem long naet nomo, from we hem i fraet tumas long ol famle blong hem, mo long ol man blong vilej.

28Be long moning, taem ol man long vilej oli wekap, oli luk we olta blong Bal wetem tabu pos blong Asera, sam man oli brekemdaon finis. Mo oli luk we i gat wan narafala olta i stanap, we ol man oli bonem bul long hem finis.

29Mo taem oli luk, oli stap asaskem long olgeta se, “?Hu i mekem samting ya?”

Nao oli lukaot gogo, oli faenem se Gideon ya we papa blong hem Joas, hem i mekem.

30Nao oli talem long Joas se, “!Yu tekem pikinini blong yu i kam long ples ya! !Bambae mifala i kilim hem i ded! Hem nao i brekemdaon olta ya blong Bal, mo i katemdaon tabu pos ya blong Asera we i stap klosap long hem.”

31Be Joas i talem long olgeta ya we oli kros long hem se, “?Olsem wanem? ?Yufala i kros from Bal? ?Yufala i wantem givhan long hem? Sipos wan man i traem givhan long Bal, bambae mifala i kilim hem i ded i no brok delaet yet. Sipos Bal i god, i gud hem i faet from bisnes blong hem, from we olta ya i blong hem ya.”

32Nao i stat long taem ya, ol man oli no moa singaot Gideon long nem blong hem, oli stap singaot hem se Jerubal, we i min se “I gud Bal i faet from olta blong hem.”

Gideon i singaot ol man blong hem

33Nao ol man Midian wetem ol laen* blong Amalek, mo ol man blong draeples saed i go long is, olgeta oli kamkros long Jodan Reva, mo oli putumap ol haos tapolen blong olgeta long bigfala levelples ya Jisrehel, we i stap daon, long medel blong ol hil.

34Long taem ya, Spirit blong Hae God i kam long Gideon, i holem hem. Nao Gideon i girap, i blu pupu blong singaot ol laen blong hem blong oli kam folem hem.

35Mo hem i sanem ol man oli go olbaot long distrik ya Manase* blong singaot ol narafala man blong distrik ya tu oli kam joen wetem hem. Mo hem i sanem ol man oli go singaot ol laen blong Asere,* mo ol laen blong Sebulun,* mo ol laen blong Naftali,* blong olgeta ya tu oli kam joen wetem hem.

Gideon i prea blong God i wokem wan saen

36Nao Gideon i prea, i talem se, “God, yu yu talem se yu wantem yusum mi blong sevem mifala ol laen* blong Isrel.*

37Oraet, be long naet ya, bambae mi go putum wan skin blong sipsip long graon, long ples ya we mifala i stap klinim ol kakae blong wit* long hem. Sipos long moning, skin blong sipsip ya i wetwet, be graon raonabaot long hem i drae, hemia bambae mi save stret we yu yu wantem yusum mi blong sevem mifala.”

38Nao samting ya i kamtru stret olsem we hem i askem. Long moning, hem i luk we skin blong sipsip ya nomo i wetwet. Hem i tekem skin ya i skwisim, mo wota we i kamaot long hem i naf blong fulumap wan besin.

39Nao hem i prea bakegen, i talem se, “God, mi wantem toktok bakegen wan taem nomo, mo plis yu no kros long mi. Yu letem mi mi traem skin blong sipsip ya wan taem bakegen. Mi wantem blong yu mekem we skin blong sipsip ya bambae i stap drae gud, be graon raonabaot long hem bambae i wetwet.”

40Nao long naet ya, God i wokem olsem we hem i askem. Skin blong sipsip ya i drae gud nomo, be ol graon raonabaot long hem oli wetwet gud long wota blong naet.