2 Kronikel 19 - Bislama Bible Revised 2012

Wan profet i tok strong long King Jehosafat

1Nao King Jehosafat blong Juda* i gobak long Jerusalem* we i no karekil nating.

2Be wan profet we nem blong hem Jehu we papa blong hem Profet Hanani, hem i kam luk king ya, nao i tok strong long hem, i talem se, “!King! !Man ya we yu go givhan long hem, fasin blong hem i nogud olgeta! !Hem i no laekem Hae God nating, i agens long hem! ?Olsem wanem? ?Yu ting se i stret blong yu mekem olsem? !Ol samting ya we yu yu mekem i mekem Hae God i kros tumas long yu!

3Be i gud we i gat samfala samting we yu stap mekem we oli gud. Yu bin tekemaot ol pija blong woman god ya Asera* we bifo ol man oli stap mekem wosip long hem, mo yu stap traehad blong mekem ol samting we Hae God i wantem.”

King Jehosafat i stretem ol fasin blong mekem wosip

4Nating we King Jehosafat i gat ol wok blong hem long Jerusalem,* be oltaem hem i stap wokbaot blong go luk ol man blong hem, i stat long Bereseba long saot, i go kasem en blong ples blong hil long distrik ya Efrem* long not. Oltaem hem i stap talem long ol man, se Hae God i God blong ol bubu blong olgeta bifo, mo oli mas kambak bakegen long hem.

5Long taem ya, hem i putumap ol jaj long ol taon ya long Juda* we oli gat bigfala stonwol i goraon long olgeta,

6mo i talem long olgeta se, “Sipos yufala i jajem man, bambae yufala i mas lukaot gud, from we yufala i no wok long nem blong man, yufala i wok long nem blong Hae God. Taem yufala i jajem man nao yufala i talemaot se hem i mekem i stret, no i mekem i no stret i mas kasem panis from, be Hae God i stap wetem yufala.

7Hem i God blong yumi, mo yufala i mas ona long hem, mo yufala i mas tinghevi long hem. Yufala i mas lukaot gud blong mekem ol wok blong yufala long stret fasin, from we hem i no wantem luk fasin ya we man i wokem trik blong stilim man, no we man i laekem sam man, be sam man, hem i no laekem olgeta, no we man i wantem mekem wan samting we i no stret, nao i go pem narafala man blong i mekem samting ya.”

8Mo long Jerusalem, king i putumap sam pris wetem sam Livaet* mo sam narafala lida blong taon ya, blong oli stap mekem hae kot long taon ya blong jajem ol man we oli brekem Loa* blong Hae God, mo blong stretem ol rao blong olgeta.

9Mo hem i givim tok long olgeta se, “Sipos yufala i mekem wok ya, bambae yufala i mas ona gud long Hae God, mo yufala i mas tinghevi long hem. Oltaem yufala i mas obei gud long hem long evri samting we yufala i mekem.

10Mo taem ol man blong yumi oli aot long ol taon blong olgeta, oli kam long yufala blong yufala i stretem ol trabol blong olgeta, olsem we man i kilim man i ded, no man i brekem wan loa blong Hae God, no man i no obei long ol tok blong Hae God, yufala i mas tijimgud olgeta blong oli folem ol stret fasin long kot, blong oli no mekem sin agens long Hae God. Sipos yufala i no mekem samting ya, bambae hem i kros long yufala wetem ol man ya blong yumi tu. Be sipos yufala i stap tijim olgeta olsem, bambae yufala i no save kasem trabol from.

11Ol man we oli brekem ol loa blong Hae God, Hae Pris* ya Amaria bambae i gat raet blong jajem olgeta laswan. Mo ol man we oli brekem ol loa blong gavman, gavman blong distrik ya Juda, we nem blong hem Sebadia we papa blong hem Ismael, hem bambae i gat raet blong jajem olgeta laswan. Mo i wok blong ol Livaet* blong oli jekemap se oltaem ol man oli stap mekem olsem we yufala i talem. Yufala i mas stanap strong, mo yufala i mas folem ol tok ya we mi mi talem, mo prea blong mi, we Hae God bambae i givhan long ol man we oli mekem i stret.”