Hosea 5 - Bislama Bible Revised 2012

1“Ol man Isrel. !Yufala i lesin! !Ol pris*! !Yufala i lesin long ol tok ya! !Ol famle blong king! !Yufala i harem tok ya blong mi! Wok blong yufala i blong jajem man long stret fasin, be yufala i no mekem nating. Nao from samting ya, i stret blong mi mi givim panis long yufala from ol rabis fasin ya blong yufala. Long ples ya Mispa, fasin blong yufala i olsem trap we i stap holem ol man, mo long bigfala hil ya Taboro, i olsem net we i hang long ples ya, blong ol man oli stap fas long hem.

2Mo long taon ya Kasis, fasin ya i olsem bigfala hol we ol man oli stap foldaon long hem. Bambae mi panisim yufala evriwan from ol rabis fasin ya we yufala i stap mekem.

3Mi mi savegud yufala. Yufala i no save haed nating long fes blong mi. Yufala i no moa stret blong mekem wosip long mi, from we yufala i lego mi finis blong biaen long ol narafala god.”

Profet i tok strong long olgeta blong oli no mekem wosip long ol narafala god

4Nao Profet Hosea i talemaot long ol man Isrel* we Hae God i talem se, “Mi mi Hae God, mo yufala i man blong mi, be yufala i no save kambak long mi, from we ol rabis fasin blong yufala i stap blokem yufala. Fasin blong mekem wosip long ol narafala god ya i fulap gud long tingting blong yufala, nao from samting ya yufala i no moa luksave se mi mi Hae God.

5Fasin ya we tingting blong yufala i go antap tumas bambae i stap jajem yufala bakegen. Mo ol sin blong yufala i stap mekem yufala i stambol, yufala i stap folfoldaon. Mo ol man Juda* oli folem fasin blong yufala, nao olgeta tu oli foldaon.

6Yufala i stap tekem ol sipsip mo ol buluk blong yufala i kam, mo yufala i bonem blong mekem sakrefaes long mi, be yufala i no save faenem mi, from we mi mi lego yufala finis.

7Tingting blong yufala i no stap strong long mi nating. Yufala i ronwe long mi, yufala i go stap wetem ol narafala god ya, nao ol pikinini blong yufala oli pikinini blong rod nomo. From samting ya, bambae i no longtaem, mi mi spolem kantri ya blong yufala.”

Ol man Juda bambae oli faet agens long ol man Isrel

8Mo Profet Hosea i talemaot bakegen we Hae God i talem se, “Ol laen* blong Benjamin.* Yufala i mas rere blong go mekem faet. Yufala i mas blu pupu, blong ol man Gibea oli kam. Mo yufala i mas blu long trampet blong ol man Rama oli harem, oli kam. Yufala i mas sanem tok i go long ol man Betaven, blong oli kam joen wetem yufala.

9Ol man Isrel.* I gat dei blong yufala i stap kam, we mi bambae mi panisim yufala long hem, mo long dei ya, bambae mi mi spolemgud yufala. Mi talem stret long yufala, se dei ya bambae i mas kamtru.

10“Mo mi mi kros tu long ol lida blong Juda,* from we oli kam insaed long ples blong yufala, nao oli stilim graon blong yufala. Panis we olgeta ya bambae oli kasem, bambae mi letem i kam bigwan long olgeta olsem reva we i ron bigwan.

11Naoia yufala i stap harem nogud tumas, from we yufala i lusum graon ya we i blong yufala stret. Be yufala i lusum from we yufala i mekem hed, yufala i stap folem tumas ol man ya we oli no gat paoa blong givhan long yufala.

12Bambae mi spolemgud ples blong yufala, mo mi mekem ples blong ol man Juda tu i kam nogud olgeta.

13“Taem yufala i luk we sik i kasem kantri blong yufala, mo ol man Juda oli luk we kantri blong olgeta i gat fulap soa long hem, yufala i girap, yufala i go long Asiria, yufala i askem long king blong ples ya blong i givhan long yufala. Be hem i no save tekemaot sik ya blong yufala, mo i no save mekem ol soa blong Juda i kam gud bakegen tu.

14Bambae mi mi kam spolemgud yufala, mo bambae mi spolem ol man Juda tu. Bambae mi kakae yufala evriwan olsem laeon, we bambae mi tereterem yufala long ol smosmol pis, mi livim yufala i stap. Mo taem mi kam blong pulum yufala i go, bambae i no gat man i save sevem yufala.

15“Nating we yufala i man blong mi, be bambae mi mi lego yufala, mi livim yufala i stap harem nogud longtaem from ol sin ya blong yufala, gogo yufala i save girap, yufala i save kam lukaot mi bakegen. Taem we yufala i stap harem nogud tumas olsem, hemia bambae i save mekem yufala i kam lukaot mi bakegen.”