Dutronome 30 - Bislama Bible Revised 2012

Sipos ol laen blong Isrel oli gowe long Hae God be oli kambak long hem bakegen, bambae oli save stap gud

1Nao Moses i talem se, “!Olgeta! Tede, mi mi talemaot tufala tok ya long yufala, blong yufala i jusumaot se yufala i wantem blong Hae God i blesem yufala, no yufala i wantem blong hem i givim panis long yufala. Hae God i God blong yumi, mo sipos olgeta samting ya oli kamtru long yufala, no long olgeta we bambae oli kamaot biaen long yufala, nao hem i ronemaot olgeta oli go stap wanwan olbaot long ol narafala kantri, bambae olgeta oli mas tingbaot tufala tok ya bakegen we mi mi talemaot long yufala tede.

2Be long taem ya, sipos olgeta ya evriwan, wetem ol pikinini blong olgeta oli tanem tingting blong olgeta, oli kambak long Hae God, nao oli obei long hem long olgeta tingting blong olgeta, mo oli folem ol loa ya blong hem we mi mi givim long yufala tede,

3hem bambae i gat sore long olgeta. Hem bambae i tekemaot olgeta bakegen long ol ples ya we i ronemaot olgeta i go long hem. Bambae hem i tekem olgeta i kambak long stret ples blong olgeta, mo i mekem olgeta oli gat gudfala laef bakegen.

4Be hem i God blong yumi, mo nating sipos hem i ronemaot olgeta i go longwe, long narasaed wol, be bambae hem i mas tekem olgeta i kambak,

5nao bambae olgeta oli kam holem kantri ya bakegen, we fastaem yufala i stap long hem. Mo bambae hem i mekem we olgeta oli gat gudfala laef, mo oli kam plante moa, i winim yufala.

6Nao long taem ya, hem bambae i mekem olgeta evriwan wetem ol pikinini blong olgeta oli glad blong obei long hem, nao bambae oli lavem hem long olgeta tingting blong olgeta, mo bambae oli stap oltaem long kantri ya blong yufala.

7Olgeta trabol ya we i blong spolem olgeta, bambae hem i tanem blong i spolem ol enemi ya blong olgeta bakegen, we oli stap mekem i strong tumas long olgeta.

8Nao bambae olgeta oli obei long hem bakegen, mo oli holemgud ol loa ya blong hem, we mi mi givim long yufala tede.

9Hem bambae i mekem olgeta ya we bambae oli kamaot biaen long yufala oli stap gud, oli gat gudfala laef, mo bambae oli gat plante pikinini blong olgeta, mo plante anamol blong olgeta, mo ol garen blong olgeta bambae oli gat plante kakae long hem. Bambae hem i glad blong mekem olgeta ya oli gat gudfala laef bakegen, olsem we i glad blong mekem long yufala.

10Be bambae oli mas tanem tingting blong olgeta blong oli biaen long hem olwe, mo oli mas obei long hem, mo oli mas folem olgeta loa ya blong hem, we i stap long buk ya blong Loa blong hem.

“?Yufala i wantem laef, no yufala i wantem ded?”

11Nao Moses i talem se, “Ol loa ya we mi mi stap givim long yufala tede oli no strong tumas, mo oli no stap longwe we yufala i no save go blong tekem.

12Rom 10.6-8Oli no stap long skae, we bambae yufala i save talem se, ‘?Hu nao bambae i go antap blong tekem i kamdaon long yumi, blong yumi save harem, nao yumi obei long hem?’

13Mo oli no stap narasaed solwota, we bambae yufala i save talem se, ‘?Hu nao bambae i gokros long bigfala solwota ya blong tekem i kam long yumi, blong bambae yumi save harem, nao yumi obei long hem?’

14Ol loa ya i stap nomo wetem yufala. Yufala i save olgeta finis, yufala i stap ridim olgeta baehat, mo yufala i mas obei gud long olgeta.

15“Tede, mi mi talemaot ol tok ya long yufala blong yufala nomo i jusumaot se yufala i wantem folem ol gudfala fasin, no yufala i wantem folem ol fasin we i nogud. Yufala i mas jusumaot se yufala i wantem laef, no yufala i wantem ded.

16Hae God i God blong yumi, mo sipos yufala i obei gud long ol tok ya blong hem we mi mi givim long yufala tede, mo yufala i lavem hem, mo yufala i obei long hem, mo yufala i holem olgeta loa blong hem, hem bambae i mekem yufala i gat gudfala laef, mo yufala i kam plante we plante, mo bambae i blesem yufala taem yufala i go long kantri ya we bambae yufala i holem i blong yufala.

17Be sipos yufala i no wantem lesin long hem, nao yufala i gowe long hem, mo yufala i go mekem wosip long ol narafala god,

18bambae hem i spolem yufala. Naoia mi mi talem strong long yufala se sipos yufala i mekem olsem, bambae yufala i no save stap longtaem long kantri ya we bambae yufala i holem, long narasaed Jodan Reva i go.

19Naoia mi mi talem stret long yufala se yufala nomo i mas jusumaot. ?Yufala i wantem laef, no yufala i wantem ded? ?Yufala i wantem blong Hae God i blesem yufala, no blong hem i givim panis long yufala? Mi mi singaot heven mo wol, blong tufala ya nao bambae i witnes blong mi, we mi talem long yufala se yufala i mas jus. !Mi mi wantem tumas blong yufala i jusumaot laef!

20Jen 12.7; Jen 26.3; Jen 28.13Hae God i God blong yumi, mo yufala i mas lavem hem, yufala i mas obei long hem, mo oltaem, tingting blong yufala i mas strong long hem. Sipos yufala i mekem olsem, bambae yufala wetem ol pikinini blong yufala mo olgeta we bambae oli kamaot biaen long yufala, bambae yufala evriwan i laef, mo bambae yufala i save stap longtaem long kantri ya we hem i promes* long trifala bubu ya blong yumi bifo, Ebraham, mo Aesak, mo Jekob,* se bambae i givim long yumi.”