1Nao King Nahas blong Amon i tekem ol soldia blong hem, oli kam long distrik ya Gilead, nao oli hivap raon long taon ya Jabes blong mekem faet agens long ol man blong hem. Be ol man blong taon ya oli talem long hem se, “Mifala i wantem blong yumi mekem wan promes naoia, se sipos yu no kam mekem faet long mifala, bambae mifala i kam man blong yu.”
2Be hem i talem se, “!Nogat! !Mi mi no save mekem promes wetem yufala! Sipos mi pulumaot raet ae blong yufala evriwan blong mekem olgeta laen* blong Isrel* oli sem, hemia nomo rod blong mi blong mekem promes wetem yufala.”
3Nao ol lida blong taon ya oli talem se, “Plis yu wet seven dei fastaem, yu letem mifala i sanem ol man i goraon long ol man ples blong mifala blong talemaot nius ya. Sipos i no gat man i wantem givhan long mifala, ale, bambae mifala i save putum mifala long han blong yu.”
4Nao taem ol man ya blong karem tok oli kam talemaot nius ya long Gibea, we i ples blong King Sol, tingting blong ol man ples ya i foldaon, nao oli krae we oli krae.
5Be stret long taem ya, king i aot long garen* blong hem i stap kamhom wetem ol buluk blong wok blong hem. Nao hem i askem se, “?Wanem samting ya? ?Yufala evriwan i stap krae from wanem?” Nao oli talemaot nius ya long hem we ol man Jabes ya oli kam talem.
6Mo taem hem i harem nius ya, Spirit blong God i kam long hem, i holem hem, nao hem i kros tumas.
7Nao hem i tekem tu buluk, i katkatem tufala long ol smosmol pis, mo i givim long ol man blong hem. Nao i sanem olgeta oli karem i goraon long evri ples long kantri ya, blong oli talemaot se, “!Man we i no kam wetem King Sol mo Profet Samuel blong go faet long ol man Amon, bambae ol buluk blong hem oli kam olsemia nao!”
Taem ol man oli harem samting ya, oli fraet tumas se Hae God bambae i spolem olgeta, nao olgeta evriwan oli kam joen, i no gat wan i stap.
8Nao king i tekem olgeta evriwan i kam wanples long Besek. Long taem ya, i gat toti taosen man blong distrik ya Juda,* mo tri handred taosen man blong ol narafala distrik long Isrel oli kam.
9Nao oli talem long ol man Jabes ya we oli karem tok i kam se, “Yufala i go talem long ol man ples blong yufala, se tumora bambae mifala i sevem yufala we i no kasem medel dei yet.”
Taem ol man Jabes oli harem nius ya, oli glad we i bitim mak.
10Nao oli talem long King Nahas se, “King. Tumora nao, bambae mifala i putum mifala long han blong yu, mo long taem ya, bambae yu save mekem long mifala olsem we yu yu wantem.”
11Nao long nekis dei, long eli moning, King Sol i seraot ol man blong hem long tri kampani, mo taem i haf tudak yet, oli resis i go long ol haos tapolen blong ol man Amon ya, oli mekem faet long olgeta. Nao oli stap kilim olgeta gogo, i no kasem medel dei yet, be klosap oli kilim olgeta evriwan i ded. Mo olgeta we oli no ded oli ron wanwan.
12Nao ol man oli talem long Profet Samuel se, “!Profet! ?Wehem olgeta ya we oli talem se i no stret blong Sol i kam king blong yumi? !Tekem olgeta i kam! !Yumi kilim olgeta i ded!”
13Be king i talem se, “No, yumi no save mekem olsem. Yumi no save kilim wan man blong yumi tede, from we yumi ol man blong Hae God, mo tede hem i sevem yumi.”
14Nao profet i talem long olgeta se, “Yumi evriwan i go long Gilgal, blong yumi talemaot bakegen we King Sol ya, hem i king blong yumi.”
15Nao olgeta evriwan oli wokbaot i go long Gilgal, mo long ples ya, long fes blong Hae God, oli talemaot se King Sol, hem i king blong olgeta. Mo oli kilim plante anamol, blong mekem sakrefaes ya we oli bonem haf, oli kakae haf blong soemaot we oli stap fren gud wetem Hae God. Mo long taem ya, King Sol wetem olgeta man ya blong hem oli mekem bigfala lafet we oli glad we oli glad.
Who We AreWhat We EelieveWhat We Do
2025 by iamachristian.org,Inc All rights reserved.
