Sekaraea 14 - Bislama Bible Revised 2012

God bambae i sevem Jerusalem

1-2Nao Profet Sekaraea i talem long ol laen* blong Isrel* se, “Olgeta. Dei blong Hae God i stap kam klosap we hem bambae i jajem olgeta man. Long taem ya, hem bambae i tekem ol man blong ol narafala kantri oli kam wanples long Jerusalem,* nao i letem olgeta oli mekem faet agens long yufala. Bambae oli winim yufala, oli holem taon ya, nao oli go insaed long ol haos blong yufala, oli tekemaot olting blong yufala, mo bambae oli seraot ol samting ya stret long fes blong yufala. Mo bambae oli fosem ol woman blong yufala blong slip wetem olgeta, mo bambae oli tekemaot haf blong ol man mo woman oli go stap wok slef* long ol kantri blong olgeta, be narahaf bambae oli stap nomo long taon ya.

3Nao Hae God bambae i go faet agens long ol kantri ya long fasin blong hem we i stap mekem long taem blong faet.

4Long dei ya, bambae hem i stanap long Hil blong ol tri ya Olif afsaed long Jerusalem, long saed i go long is, nao bambae hil ya i split long medel. Haf bambae i muv i go long not, mo narahaf bambae i muv i go long saot, mo bigfala levelples bambae i stap long medel, we bambae i stat long is i go kasem long wes.

5Nao bambae yufala i pas long levelples ya, yufala i ronwe i go kasem narasaed. Bambae yufala i ronwe olsem we ol bubu blong yufala bifo oli bin ronwe, long taem ya we graon i seksek bigwan, long taem blong King Usia, we i king blong Juda* bifo. Long taem ya nao, Hae God we i God blong yumi, hem bambae i kamtru wetem ol tabu man blong hem.”

Hae God bambae i King

6Mo Profet Sekaraea i talem se, “Taem dei ya i kamtru, bambae ples i no moa kolkol, mo bambae i no moa save kolkol we i kolkol tumas.

7Bambae i delaet olwe nomo, bambae i no moa save tudak. Dei blong ol samting ya, i no gat man i save, Hae God nomo i save.

8 , i go kasem “Doa long Kona”, long ples ya we bifo i gat olfala doa long hem. Mo bambae i stat long wajhaos ya blong Hananehel, i go kasem ples blong mekem waen blong king.

11Rev 22.3Nao ol man blong ples ya bambae oli stap gud oltaem. Bambae i no moa gat wan samting blong oli fraet long hem se bambae i kam spolem olgeta.

12“Olgeta man blong ol narafala kantri we oli bin mekem faet agens long Jerusalem, Hae God bambae i letem wan rabis sik i kam kasem olgeta. Taem oli stap laef yet, be ol bodi blong olgeta bambae i roten i sting. Ol ae blong olgeta mo tang blong olgeta bambae i roten tu.

13“Long taem ya, Hae God bambae i mekem olgeta oli fraet, oli lusum hed. Nao sipos wan man i sidaon wetem narafala man we i fren blong hem nomo, man ya bambae i girap i holem fren ya blong hem, nao i kilim hem i ded.

14Mo ol man Juda* bambae oli faet long ol enemi ya blong olgeta, blong blokemgud Jerusalem. Nao ol gudgudfala samting ya, ol gol mo ol silva, mo ol klos we i plante we plante, we i blong ol man ya blong ol narafala kantri we oli stap raonabaot long Jerusalem, ol man Juda bambae oli kam karemaot evriwan i blong olgeta.

15“Mo semkaen sik ya, bambae i kasem ol hos wetem ol hafkas* dongki blong olgeta, mo ol kamel, mo ol dongki, mo ol narafala anamol blong olgeta, we oli stap long ol ples we ol enemi ya oli putumap ol haos tapolen blong olgeta long hem.”

Olgeta man bambae oli kam long Jerusalem blong mekem wosip

16 Lev 23.39-43 Nao Profet Sekaraea i talem se, “Hae God i gat olgeta paoa, mo hem i King blong olgeta man. Nao ol man blong ol narafala kantri we oli stap laef yet, long evri yia, bambae oli stap kam long Jerusalem* blong mekem wosip long hem. Mo bambae oli stap mekem Lafet* blong ol Wansaed Haos long ples ya.

17Sipos ol man blong wan kantri oli no wantem kam long Jerusalem blong mekem wosip long Hae God, bambae hem i no moa save sanem ren i kam long kantri blong olgeta.

18Mo sipos ol man Ijip oli no wantem kam blong mekem Lafet blong ol Wansaed Haos, sik ya we bambae Hae God i letem i kasem ol narafala kantri we oli no wantem kam long lafet ya, bambae i kasem olgeta tu.

19Panis ya nao, bambae i kasem ol man Ijip, mo ol man blong ol narafala kantri we oli no wantem kam blong mekem lafet ya.

20“Long taem ya, ol bel we oli fasem i stap hang long ol strap blong ol hos, be bambae ol man oli save raetem tok ya long olgeta, se ‘Bel ya i tabu, i blong Hae God’. Mo ol sospen we oli stap long haos* blong Hae God, be bambae oli kam tabu, stret olsem ol besin ya we oli stap klosap long olta.

21Mo olgeta sospen blong ol man Jerusalem mo blong ol narafala man Juda,* bambae oli tabu, oli blong Hae God. Ol man bambae oli save yusum olgeta long taem blong mekem wosip, blong kukum ol mit blong ol sakrefaes. Hae God i gat olgeta paoa, mo long taem ya, ol bisnesman bambae oli no moa save mekem bisnes bakegen long haos ya blong hem.”