Sam 17 - Bislama Bible Revised 2012

Prea blong man we i no mekem samting nogud(Sing ya, Deved i wokem. Hemia i wan prea.)(Tok i go long Hae God.)

1Hae God.

Mi mi stap long trabol.

Plis yu harem krae blong mi,

yu stretem trabol ya

long fasin we i stret.

Plis yu lesin long mi,

yu givhan long mi,

yu harem prea blong mi,

from we mi mi no man blong giaman.

2Plis yu jajem trabol ya,

yu talemaot we mi mi stret,

from we yu nao yu save fasin we i stret.

3Yu yu save tingting blong mi.

Yu bin kam long mi long naet,

yu faenemaotgud laef blong mi,

mo yu faenem we mi mi no laekem fasin nogud nating.

Mi mi no save tok nogud

4olsem we ol narafala man oli stap mekem.

Oltaem mi stap obei long tok blong yu,

nao mi no save folem ol fasin blong faet.

5Oltaem mi stap folem rod blong yu,

mo neva mi lusum rod ya.

6God, mi mi prea long yu

from we yu yu stap harem mi.

Plis yu lesin i kam,

yu harem ol tok blong mi.

7Yu soemaot gudfala fasin ya blong yu

we oltaem yu lavem man tumas,

yu sevem mi.

Taem mi stap klosap long yu,

mi mi sef,

ol enemi blong mi oli no save spolem mi.

8Plis yu blokem mi,

yu lukaot gud long mi,

olsem we yu stap lukaot gud

long ae blong yu nomo.

Yu blokemgud mi,

olsem we woman faol

i stap blokemgud ol pikinini blong hem

long wing blong hem.

9Sipos yu mekem olsem,

bambae ol man nogud

oli no save kam faet long mi.

Ol enemi blong mi

oli stap kam hivap raon long mi

blong kilim mi.

10Oli stap tok flas

we oli no gat sore nating.

11Naoia, weples we mi mi stap long hem,

be oli stap kam raon long mi,

oli stap lukaot janis blong daonem mi.

12Oli olsem laeon,

oli stap wet long mi.

Oli wantem terem bodi blong mi

blong brebrekem long ol smosmol pis.

13Hae God, plis yu kam

yu faet long ol enemi ya blong mi,

yu winim olgeta.

Plis yu tekem naef blong faet blong yu,

yu faet long olgeta,

yu tekemaot mi long han blong olgeta.

14Ol man ya oli gat olgeta samting

we oli wantem long laef blong olgeta.

Plis yu sevem mi,

yu tekemaot mi long han blong olgeta,

mo yu panisim olgeta.

Plis yu mekem we oli harem nogud

long ol panis ya we yu putumrere finis

blong givim long olgeta.

Mi wantem we panis ya bambae i naf

blong kasem ol pikinini blong olgeta,

mo blong kasem ol pikinini

blong ol pikinini blong olgeta tu.

15Be mi mi no mekem samting nogud,

nao from samting ya,

taem mi mi wekap,

bambae mi save luk yu,

mo bambae mi glad tumas,

from we bambae mi stap wetem yu.