Sing Blong Solomon 6 - Bislama Bible Revised 2012

1Nao ol woman ya oli talem long hem se,

“?Yu yu naes moa,

yu winim ol narafala woman,

be man blong yu i stap wea?

Yu traem talemaot long mifala weples hem i go,

blong mifala i save halpem yu blong faenem hem.”

2Nao woman ya i talem se,

“Hem i go spel long gudfala ples blong hem,

we ol tri ya balsam* oli stap gru long hem.

Hem i stap harem gud long ples ya,

mo i stap tekem ol flaoa blong lili.

3Man ya, hem i blong mi,

mo mi mi blong hem.

Hem i stap lidim ol sipsip blong hem,

oli pas long ples blong waelflaoa

blong oli tekem kakae.”

4Nao man i talem se,

“Daling,

yu yu naes we yu naes.

Taem mi luk yu,

mi harem gud tumas,

olsem we mi stap luk taon ya Tijaha.

Taem mi lukluk i kam long yu,

mi glad tumas,

olsem we mi stap luk gudfala taon ya Jerusalem.*

Taem mi luk yu, mi sek gud,

olsem we mi sek long ol soldia

we oli leftemap flaeg,

oli maj i go long faet.

5Plis yu tanem fes blong yu,

yu no lukluk mi.

Ae blong yu i stap spolemgud tingting blong mi.

Hea blong yu i stap muvmuv olbaot,

olsem ol nani we oli stap jamjam,

oli stap kamdaon long hil long Gilead.

6Ol tut blong yu oli waet gud

olsem sipsip we man i jes katemaot hea blong hem,

nao i wasem bodi blong hem i waet gud.

I no gat wan long ol tut blong yu i foldaon,

olgeta evriwan oli sem mak nomo,

mo oli stret gud.

7Nating we kaliko i blokem fes blong yu,

be kala blong hem i stap saenaot i kasem mi.

8Mi mi king,

mo mi gat sikisti woman blong mi,

we oli kwin,

mo eiti narafala woman blong mi,

mo ol yang gel we oli plante we plante,

we man i no save kaontem olgeta,

be nating.

9Yu yu olsem flaoa

we i naes we i naes,

mo mi mi laekem yu tumas.

Yu yu wan dota nomo

we mama blong yu i gat,

mo hem i lavem yu moa,

i winim ol narafala pikinini blong hem.

Olgeta yang gel oli stap lukluk i kam long yu,

mo oli stap presem yu.

Ol kwin ya blong mi

mo ol narafala woman ya blong mi,

oli stap sing

blong leftemap nem blong yu.

10Olgeta oli talem se,

‘?Hu woman ya

we taem i lukluk i kam,

mifala i luk olsem we delaet i kamtru?

Hem i naes we i naes,

mo fes blong hem i saen we i saen,

olsem san mo mun.’

11Mi mi kamdaon

mi stap finis long plantesen blong tri ya amon.*

Mi kam blong luk ol yang tri

long levelples long medel blong tufala hil ya.

Mi kamdaon blong luk ol niufala lif blong grep,*

mo ol gudfala flaoa blong grenadin.*

12Naoia tingting blong mi i no moa save stap kwaet.

Mi mi olsem man blong faet

we i gat kat blong faet blong hem,

we oltaem nomo i wantem tumas

blong go long faet.

Oltaem nomo, mi mi wantem tumas

blong yumitufala i stap wanples.”

13Nao ol woman ya oli talem se,

“!Woman Sulam, yu kambak!

!Plis yu kambak!

!Mifala i wantem lukluk yu we yu danis!”

Nao woman ya i talem long olgeta se,

“?From wanem yufala i wantem lukluk mi olsem?

?From wanem yufala i wantem mekem mi mi danis,

mi kam olsem man blong wokem konset

long fes blong ol man?”