Jeremaea 16 - Bislama Bible Revised 2012

Hae God i gat plan blong laef blong Profet Jeremaea

1Nao Profet Jeremaea i talemaot we Hae God i toktok long hem bakegen i talem se,

2“Jeremaea. Bambae yu no mas mared, mo yu no mas gat pikinini long ples ya.

3Bambae mi talemaot long yu olgeta samting we bambae i kasem ol papa mo mama, mo ol pikinini blong olgeta we oli bon long ples ya.

4Olgeta ya bambae oli ded long faet, mo long hanggri, mo long ol sik we i nogud we i nogud. Mo bambae i no gat man i stap blong krae from olgeta mo blong berem olgeta. Bambae ol dedbodi blong olgeta oli stap olbaot long graon, olsem sitsit blong buluk. Mo bambae ol pijin, mo ol wael anamol oli stap kakae olgeta.

5“Bambae yu no mas go insaed long haos we ol man oli stap krae long dedman long hem. Mo yu no mas harem nogud wetem olgeta. Bambae yu no mekem olsem, from we mi bambae mi no moa givim pis blong mi long ol man ya blong mi, mo bambae mi no moa save soemaot we mi mi lavem olgeta, mo we mi gat sore long olgeta.

6Olgeta we oli rijman, wetem olgeta we oli puaman, bambae oli ded long kantri ya, mo bambae i no moa gat man i stap blong krae long olgeta, mo blong berem olgeta. Mo bambae i no moa gat man i stap blong katkatem bodi blong hem, mo blong pulum resa long hed blong hem, blong soemaot we hem i harem nogud long olgeta ya.

7Sipos wan man i lusum wan famle blong hem, nating we papa no mama blong hem, be bambae i no moa gat man i stap blong go stap wetem hem blong tufala i kakae, blong hem i save harem gud, no blong givim waen long hem blong leftemap tingting blong hem bakegen.

8“Bambae yu no mas go insaed long haos we ol man i stap mekem lafet long hem. Yu no mas joen long olgeta blong kakae mo dring wetem olgeta.

9Jer 7.34; 25.10; Rev 18.23Mi mi talem olsem, from we long ples ya, bambae man i no moa save harem noes blong ol man we oli stap glad, mo ol noes blong ol lafet blong mared. Yufala we i stap laef naoia, bambae yufala i save luk samting ya stret long ae blong yufala. Mi mi Hae God, mi God blong yufala ol laen* blong Isrel.* Mi mi gat olgeta paoa, mo hemia tok blong mi.

10“Taem yu talemaot ol samting ya long olgeta, bambae oli askem long yu se, ‘?Hae God i God blong yumi, be from wanem hem i panisim yumi i strong tumas olsem? ?Mo wanem samting nogud we yumi mekem agens long hem?’

11Nao bambae yu talemaot long olgeta we mi mi talem se, ‘Ol bubu blong yufala bifo, oli gowe long mi, oli go mekem wosip long ol narafala god, mo oli stap mekem wok blong olgeta. Olgeta oli lego mi, oli no obei long ol tok blong mi.

12Be yufala i mekem i nogud moa, i winim ol bubu blong yufala. Yufala evriwan i stronghed mo i man nogud, mo yufala i no obei long mi.

13Nao from samting ya, mi bambae mi sakemaot yufala i gowe long kantri ya, yufala i go stap long narafala kantri we yufala mo ol bubu blong yufala bifo, yufala i no save. Taem yufala i go stap long ples ya, bambae long dei mo long naet, yufala i stap mekem wok blong ol narafala god ya nomo, mo bambae mi mi no save givhan long yufala nating.’ ”

Olgeta we oli stap wok slef long narafala kantri bambae oli kamhom bakegen

14Nao Profet Jeremaea i talemaot we Hae God i talem se, “I gat dei i stap kam we ol man bambae oli no moa talem se, ‘Hae God i laef, i stap we i stap, mo hem i God we i tekemaot ol man blong hem long Ijip bifo, mo long fes blong hem, ol tok ya i tru.’

15Be bambae oli talem se, ‘Hae God i laef, i stap we i stap, mo hem i God we i tekemaot ol man blong hem long kantri ya long not mo long ol narafala kantri we hem i mekem olgeta oli go stap olbaot long hem, nao i tekem olgeta oli kambak long kantri blong olgeta bakegen, mo long fes blong hem, ol tok ya i tru.’ Mi bambae mi tekem olgeta i kambak bakegen long stret ples blong olgeta, we mi bin givim long ol bubu blong olgeta bifo. Mi mi Hae God, mo hemia tok blong mi.”

Bigfala panis we bambae i kam kasem olgeta

16Mo Profet Jeremaea i talemaot we Hae God i talem se, “Olgeta. Mi bambae mi sanem tok i go long ol man, blong oli kam pulum yufala, olsem we man i pulum fis. Mo bambae mi sanem ol man blong lukaot mit long bus, blong oli go lukaot yufala olbaot long ol hil, mo long ol hol long ston.

17Bambae mi mekem olsem, from we mi mi luk olgeta samting we yufala i stap mekem. I no gat wan samting nating i haed long fes blong mi, mo oltaem mi stap luk ol sin blong yufala.

18Bambae mi dabolem panis blong yufala from ol sin blong yufala, from we yufala i mekem kantri ya blong mi i kam doti long fes blong mi, long ol aedol blong yufala we oli no gat laef, oli olsem dedbodi nomo. Mo yufala i fulumapgud kantri ya blong mi long ol rabis god ya blong yufala.”

Profet Jeremaea i trastem Hae God se bambae hem i harem prea blong hem

19Nao Profet Jeremaea i prea, i talem se, “Hae God. Yu nomo yu stap blokemgud mi, mo yu stap givim paoa long mi. Taem trabol i kam kasem mi, yu yu stap givhan long mi. Olgeta man blong evri ples long wol bambae oli kam long yu, oli talem se, ‘Ol bubu blong mifala bifo, oli gat ol giaman god nomo we oli no save givhan long olgeta nating.

20Plante man oli ting se oli save wokem ol god blong olgeta, be ol god ya we ol man oli mekem oli no prapa god, oli blong nating nomo.’ ”

21Nao profet i talemaot we Hae God i talem se, “Mi bambae mi mekem ol man blong ol narafala kantri oli save we mi mi strong, mo mi gat paoa, nao bambae oli savegud we mi mi Hae God.”