Josua 14 - Bislama Bible Revised 2012

Olgeta oli seraot ol graon long narasaed Jodan Reva long wes

1Olgeta graon long kantri ya Kenan* we i stap long saed blong Jodan Reva long wes, fasin we Josua olgeta oli folem blong seraot ol graon ya i go long ol laen* blong olgeta i olsem. Eleasara we i Hae Pris,* wetem Josua, we papa blong hem Nun, mo ol lida blong ol famle blong olgeta oli seraot olgeta graon i go long ol man we oli no gat graon blong olgeta yet.

2, se wanem graon bambae i go long ol naen laen blong olgeta, wetem narafala haf blong laen blong Manase,* we oli no gat graon blong olgeta yet.

3-4Nam 32.33; 34.14,15; Dut 3.12-17Olgeta graon long narasaed long Jodan Reva long is, Moses i bin seraot olgeta bifo finis i go long tu narafala laen blong olgeta wetem narafala haf ya blong laen blong Manase. Josef ya bifo, hem i gat tu pikinini boe blong hem, we nem blong tufala Manase mo Efrem,* nao ol laen ya blong Josef oli seraot long tu laen, folem tufala pikinini ya blong hem. Be ol laen blong Livae* oli no kasem graon blong olgeta, oli kasem ol taon nomo blong oli stap long hem, we i gat ples tu blong ol buluk mo ol sipsip mo ol nani blong olgeta oli stap long hem.

5Eleasara olgeta oli seraot ol graon ya, stret olsem we Hae God i talem long Moses bifo.

Josua i givim ples ya Hebron i go long Keleb wetem ol laen blong hem

6 Nam 14.30 Nao wan dei, sam man long laen* blong Juda,* oli kam luk Josua long Gilgal. Wan long olgeta ya, nem blong hem Keleb, we papa blong hem Jefune, we i laen blong Kenas. Hem i talem long Josua se, “Bifo, long taem ya we yumi stap long Kadesbanea, Hae God i givim wan tok long saed blong yumitufala long Moses, man blong wok blong hem. ?Olsem wanem? ?Yu yu stap tingbaot tok ya yet?

7-8Nam 13.1-30Long taem ya we Moses i sanem yumi blong yumi kam lukluksave ol ples ya, mi mi gat foti yia finis. Mo taem yumi gobak, ol narafala man ya we oli bin kam wetem yumi oli mekem ol man oli fraet, be ol ripot we mi mi givim long hem oli stret gud, from we Hae God i God blong mi, mo mi mi stap obei long hem oltaem.

9Nam 14.24Mo from samting ya, Moses i mekem wan strong promes long mi wetem ol pikinini blong mi se, ‘Hae God i God blong yumi, mo yu yu stap obei long hem oltaem. From samting ya, graon ya we yu yu purumbut long hem long taem ya, bambae yu wetem ol pikinini blong yu, yufala i holem i blong yufala.’

10Be i stat long taem ya we Hae God i givim tok ya long Moses kam kasem tede, foti faef yia i pas finis. Promes ya i kamaot long taem ya we yumi stap wokbaot long draeples yet. Be Hae God i holem mi mi stap laef kam kasem tede, olsem we hem i promes. Naoia, mi mi gat eitifaef yia finis,

11be mi mi strong yet, sem mak olsem long taem ya bifo we Moses i sanem yumi. Mi mi naf blong go long faet mo blong mekem ol narafala samting olsem.

12From ol samting ya, i gud yu givim ol ples blong hil ya long mifala olsem we Hae God i promes long taem ya. Long taem ya, yumi harem ol ripot se i gat ol larikenman i stap we oli laen blong Anak,* mo ol taon blong olgeta oli bigfala, we oli gat ol bigbigfala stonwol i goraon long olgeta. Be sipos Hae God i wantem olsem, bambae hem i save stap wetem mi, nao bambae mi save ronemaot olgeta, olsem we hem i talem.”

13Nao Josua i blesem hem, mo i givim taon ya Hebron long hem, blong i holem i blong hem.

14Hem i kasem ples ya i blong hem, from we Hae God i God blong olgeta, mo oltaem hem i stap obei gud long hem. Mo i kam kasem tede, taon ya i stap yet long han blong ol laen blong hem.

15Fastaem, nem blong taon ya, Kiriataba, we i min se “Taon blong Aba”, we Aba i stamba blong ol larikenman we oli laen blong Anak ya bifo, be biaen, oli putum nem blong taon ya se Hebron.

Nao biaen oli no moa go mekem faet bakegen, oli gat pis.