Sam 7 - Bislama Bible Revised 2012

Prea we man i mekem taem hem i stap long trabol(Sing ya, Deved i wokem. Hem i prea long Hae God long sing ya from trabol we Kus, wan man long laen* blong Benjamin* i mekem long hem.)(Tok i go long Hae God.)

1Hae God.

Yu yu God blong mi.

Mi mi kam long yu blong haed long yu.

Plis yu sevem mi,

yu tekemaot mi long han blong

olgeta we oli stap ronem mi.

2Sipos no,

bambae oli kam karem mi mi go long wan ples

we i no gat man i save sevem mi,

nao bambae oli terem bodi blong mi

long ol smosmol pis

olsem we laeon i mekem long kakae blong hem.

3Hae God,

yu yu God blong mi.

Fasin blong mi i stret nomo.

4Mi mi no mekem i nogud

long fren blong mi

we i mekem i gud long mi,

mo enemi blong mi

we i no spolem mi,

mi mi no mekem i nogud long hem.

5Sipos mi bin mekem wan long ol samting ya,

i gud yu letem ol enemi blong mi oli kam,

oli ronem mi gogo oli kasem mi,

oli kilim mi gogo oli flatem mi,

oli spolem mi gogo oli livim mi mi ded olgeta.

6Hae God.

Ol enemi blong mi oli stap kros long mi.

Mi mi wantem blong yu yu halpem mi.

Plis yu kam,

yu blokem olgeta,

yu kros long olgeta,

yu agensem olgeta.

Yu yu wantem ol man oli mekem stret fasin.

7Plis yu tekem olgeta man

oli kam wanples long fes blong yu,

nao yu sidaon long jea blong yu long heven,

yu jajem olgeta.

8Hae God,

yu yu stap jajem olgeta man,

yu yu save we mi mi stret man,

mi no save giaman.

Plis yu lukluk gud long fasin ya blong mi,

yu givhan long mi.

9 Rev 2.23 Yu yu God we fasin blong yu i stret nomo,

yu yu stap jajem ol tingting blong mifala

mo ol samting we mifala i wantem.

Plis yu blokem ol rabis fasin blong ol man nogud,

blong oli no spolem mifala,

mo yu mekem ol stret man oli stanap strong.

(Tok i go long ol man.)

10God i stap blokemgud mi

olsem wan sil.*

Hem i stap sevem olgeta

we oli stap obei long hem.

11God i wan stret jaj.

Olgeta we oli stap mekem nogud,

oltaem hem i stap jajem olgeta

se oli mas panis.

12Sipos olgeta ya oli no jenisim fasin blong olgeta,

God bambae i sapenem naef blong faet blong hem.

Hem i taetem string blong bonara blong hem finis,

i mekem i rere.

13Hem i holem finis ol samting blong faet blong hem,

we i blong kilim man i ded.

Ara blong hem we i gat faea long en blong hem,

hem i pulumrere finis

blong i sut long hem.

14!Yufala i luk!

Ol man nogud oli stap tingting

blong mekem ol rabis fasin.

Oli stap plan blong mekem trabol

nao oli gohed,

oli stap giagiaman long ol man.

15Be ol hol we oli digim

blong kasem ol narafala man,

olgeta oli foldaon long hem bakegen.

16Ol rabis fasin we oli stap mekem

i kasem olgeta bakegen,

mo fasin blong olgeta blong spolem man

i spolem olgeta nomo.

17Hae God, hem i hae we i hae.

Mi mi stap sing blong presem hem,

mo mi stap talem tangkiu long hem,

from we hem i stap jajem man

long stret fasin.