Eksodas 13 - Bislama Bible Revised 2012

Ol fasbon pikinini boe blong ol laen blong Isrel oli tabu, oli blong Hae God

1Nao Hae God i talem long Moses se,

2Nam 3.13; Luk 2.23“Moses. Yufala i laen* blong Isrel,* mo from samting ya, ol fasbon pikinini boe blong yufala wetem ol fasbon pikinini man blong ol anamol blong yufala oli tabu, oli blong mi, mo yufala i mas givim olgeta evriwan i kam long mi.”

Lafet blong Bred we i No Gat Is long hem

3Nao Moses i talem long olgeta se, “Evri yia, bambae yumi mas tingbaot dei we yumi aot long Ijip, ples we yufala i stap wok slef* long hem, from we long dei ya, Hae God i tekemaot yumi long ples ya long bigfala paoa blong hem. Nao long dei ya, bambae yumi no kakae bred* we i gat is long hem,

4from we long dei ya nao, long manis ya Abib,* yumi aot long Ijip yumi kam.

5Hae God i bin mekem promes* long ol bubu blong yumi bifo, se bambae i givim kantri ya long yumi, we i blong ol laen* blong Kenan,* wetem ol laen blong Het, mo ol laen blong Amoro,* mo ol laen blong Hivi,* mo ol laen blong Jebus. Kantri ya, graon blong hem i gud tumas, oltaem i stap karem fulap kakae, mo sipos hem i tekem yumi i go stap long kantri ya, evri yia, long manis ya,

6bambae yumi mas stap kakae bred* ya nomo we i no gat is long hem, gogo kasem seven dei. Mo long namba seven dei ya, bambae yumi mas mekem lafet blong ona long hem.

7Long ol seven dei ya, bambae yumi no mas kakae bred we i gat is long hem, mo bambae yumi mas sakemaot olgeta is wetem ol bred we i gat is long hem i gowe long olgeta ples blong yumi.

8Taem yumi stat blong mekem lafet ya, bambae yumi mas talemgud long ol pikinini boe blong yumi, we yumi stap mekem lafet ya blong tingbaot ol samting ya we Hae God i bin mekem long yumi taem yumi aot long Ijip.

9Nao lafet ya bambae i kam olsem string we yumi fasem long han blong yumi, no memori we yumi fasem long fored blong yumi. Nao bambae yumi no fogetem Hae God, oltaem bambae yumi stap stadi long ol loa blong hem, mo yumi stap ridimaot olgeta baehat, from we hem nao i tekemaot yumi long Ijip long bigfala paoa blong hem.

10Evri yia, long stret taem blong hem, bambae yumi mas mekem lafet ya.”

Ol fasbon pikinini boe blong ol laen blong Isrel oli blong Hae God

11Mo Moses i gohed, i talem se, “Hae God bambae i tekem yumi i go long kantri blong ol laen* blong Kenan,* mo bambae i givim kantri ya long yumi, olsem we hem i promes* finis long ol olfala bubu blong yumi bifo. Nao taem yumi go stap long kantri ya,

12Eks 34.19,20; Luk 2.23oltaem bambae yumi mas givim olgeta fasbon pikinini boe blong yumi i go long hem. Mo yumi mas save we ol fasbon pikinini man blong ol anamol tu blong yumi oli blong hem.

13Be sipos dongki blong yumi i gat fasbon pikinini blong hem we i man, bambae yumi mas givim smol sipsip i go long Hae God olsem jenis blong hem, blong pemaot smol dongki ya i blong yumi bakegen. No sipos yumi no wantem pemaot, bambae yumi mas brekem nek blong hem blong kilim i ded. Be olgeta fasbon pikinini boe blong yumi, oltaem bambae yumi mas pemaot olgeta bakegen oli blong yumi.

14Nao samtaem, sipos ol pikinini boe blong yumi oli askem long yumi se, ‘?Yumi stap mekem ol samting ya from wanem?’, bambae yumi mas talem long olgeta se, ‘Ol samting ya i blong makem taem ya we mifala i stap wok slef* long Ijip, nao Hae God i kam long bigfala paoa blong hem, i tekemaot mifala long ples ya.

15Long taem ya, king blong Ijip i stap mekemhed, i no wantem letem mifala i goaot. Nao Hae God i kilim olgeta fasbon pikinini boe blong ol man Ijip, wetem ol fasbon pikinini man blong ol anamol tu blong olgeta oli ded. Nao blong tingbaot samting ya, yumi stap mekem sakrefaes long Hae God long ol fasbon pikinini man blong ol anamol blong yumi, mo yumi stap pemaot ol fasbon pikinini boe blong yumi long hem, blong oli blong yumi bakegen.’

16Nao fasin ya bambae i kam olsem string we yumi fasem long han blong yumi, no memori we yumi fasem long fored blong yumi. Nao bambae yumi no fogetem we Hae God i kam, mo long bigfala paoa blong hem, hem i tekemaot yumi long Ijip.”

God i kam long klaod mo long faea blong lidim ol man blong hem

17Nao taem king blong Ijip i letem olgeta i go, nating we rod ya we i folem solwota i pastru long Filistia i sotfala, be God i no lidim olgeta i go long rod ya. Hem i save se sipos hem i mekem olsem, maet oli luk we i gat faet, nao oli tanem tingting blong olgeta, oli ronwe i gobak long Ijip.”

18Nao from samting ya, hem i lidim olgeta oli pasraon long narafala rod we i gotru long draeples blong go long Red Si. Mo taem oli stap go, oli stap rere oltaem blong faet.

19 Jen 50.25; Jos 24.32 Nao bifo, taem we Josef i stap laef yet, hem i bin tok rere long ol pikinini blong hem se, “Sipos God i tekemaot yufala long ples ya, bambae yufala i mas karem ol bun blong mi i go wetem yufala.” Mo hem i mekem olgeta oli mekem strong promes blong mekem olsem. Mo from samting ya, Moses i karem ol bun blong hem i go wetem olgeta.

20Nao olgeta oli aot bakegen long Sukot, oli go putumap ol haos tapolen blong olgeta long Etam, klosap long bigfala draeples ya saed i kam.

21Long dei, oltaem Hae God i stap go fastaem long olgeta long wan bigfala klaod we i stanap stret, blong i soemaot rod long olgeta, mo long naet, hem i stap go fastaem long olgeta long wan bigfala faea we i stanap stret, we i stap givim laet long rod blong olgeta. Nao long fasin ya, oli save wokbaot long dei mo long naet.

22Long dei, oltaem bigfala klaod ya i stap go fastaem long olgeta, mo long naet, oltaem bigfala faea ya i stap go fastaem long olgeta.