1Hae God i Masta* blong yumi, mo hem i toktok long mi bakegen long wan vison, i talem se,
2Rev 20.8“Man blong wol ya. Yu talemaot tok blong mi we mi mi talem agens long King Gogo, we i king blong ol laen blong Mesek, mo ol laen blong Tubal, long kantri ya Magog.
3Yu talemaot we mi mi talem se, ‘!King Gogo! !Mi mi enemi blong yu!
4Bambae mi hukum maot blong yu long huk, mi tanemraon yu, mi pulum yu wetem ol soldia blong yu, yufala evriwan i kam. Olgeta soldia blong yu oli plante we plante. I gat olgeta we oli wokbaot, mo olgeta we oli ron long hos, mo olgeta evriwan oli werem ol klos blong faet blong olgeta, mo oli karem sil* mo naef blong faet blong olgeta.
5Ol man Pesia wetem ol man Itiopia mo ol man Libia bambae oli kam wetem yu, mo olgeta evriwan bambae oli karem sil mo oli putum hat blong faet blong olgeta.
6Mo ol soldia blong kantri ya Goma, wetem ol soldia blong kantri ya Betogama daon long not we long not olgeta, mo ol man blong ol narafala kantri tu, olgeta evriwan bambae oli kam wetem yu.
7Yu mas mekemrere ol soldia blong yu blong oli stanbae oltaem, mo yu mas lukaot gud long olgeta blong oli obei long yu.
8Bambae plante yia i pas, nao biaen, bambae mi talem long yu blong yu kam insaed long kantri ya Isrel,* yu kam long ol hil, yu faet agens long ol man blong hem. Kantri ya, mi bin tekemaot ol man blong hem we oli stap long plante narafala kantri, mi tekem olgeta oli kambak long hem bakegen, mo naoia oli stap gud, oli no moa tingbaot faet, mo oli no fraet nating. Ol hil ya blong kantri ya oli bin stap nating nomo longtaem, mo naoia ol man blong hem oli stap gud nomo, oli sef.
9Bambae yu wetem ol soldia blong yu mo ol man blong ol narafala kantri we bambae oli go wetem yu, yufala i go faet blong spolem ples blong olgeta olsem wan hariken, mo bambae yufala i kavremapgud ples ya olsem klaod.’ ”
10Mo hem i talem long mi se, “Yu talem long king ya we mi mi talem se, ‘Long taem ya we tok ya blong mi i kamtru, bambae yu wokemaot wan plan long tingting blong yu. Plan ya bambae i nogud we i nogud,
11we yu talem se, “Naoia bambae mi go insaed long wan kantri we i no gat man blong givhan long ol man blong hem, mi faet agens long olgeta. Olgeta ya oli no man blong faet, oli stap gud nomo long ol taon ya we oli no gat stonwol i goraon long olgeta blong blokem olgeta.
12Ol taon ya, bifo, ol enemi oli bin spolem olgeta, oli brobrok i stap, be olgeta oli aot long ol narafala kantri, oli kambak long ples ya, mo naoia oli gat ol anamol blong olgeta, mo oli gat plante narafala samting. Kantri ya blong olgeta i stap long medel blong wol, long ples ya we ol man oli stap pas long hem blong go long ol narafala kantri, mo bambae mi go faet agens long olgeta, mi go karemaot olting blong olgeta.”
13“ ‘King Gogo. Long taem ya, ol man Seba mo ol man Dedan mo ol bisnesman blong ol taon blong Spen bambae oli askem long yu se, ‘?Olsem wanem? ?Yu yu mekemrere ol soldia blong yu finis blong go faet? ?Yu wantem karemaot olting blong kantri ya i blong yu? Mifala i luk se yu yu wantem karemaot silva mo gol mo ol anamol mo ol narafala samting, oli blong yu nomo.’ ”
14Nao hem i sanem mi mi go luk king ya blong talem long hem se, “Long taem ya we ol man ya blong mi oli stap gud nomo, bambae yu girap,
15yu aot long ples blong yu daon long not we long not olgeta, nao yu lidim wan bigfala kampani blong ol soldia we oli strong tumas, wetem ol soldia ya we oli kamaot long ol narafala kantri we olgeta evriwan oli ron long hos, yu kamtru long ples ya.
16Nao bambae yufala i kam faet agens long ol man ya blong mi, we yufala i plante we plante, olsem bigfala klaod blong ren we i kavremap olgeta ples. Mo taem we dei ya i kamtru, bambae mi sanem yu yu go insaed long kantri ya blong mi, blong soemaot long ol man blong ol narafala kantri we mi mi Hae God. Mo ol samting we bambae mi yusum yu blong mekem, bambae i soemaot long olgeta we mi mi tabu.
17Bifo, mi stap yusum ol profet we oli man blong mi, blong talemaot se long fiuja, bambae mi tekem wan man i kam blong mekem faet agens long ol man blong mi. Mo yu nao man ya. Mi mi Hae God, mi Masta blong yufala, mo hemia tok blong mi.”
God bambae i panisim King Gogo18Mo long vison ya, Hae God we i Masta* blong yumi, i toktok long mi bakegen i talem se, “Long dei ya we bambae King Gogo i kam faet agens long ol man blong kantri ya Isrel,* mi bambae mi kros we mi kros.
19Olgeta ya oli man blong mi nomo, mo from samting ya, mi mi talemaot we long paoa blong kros blong mi, long dei ya, graon blong kantri ya bambae i seksek we i bitim mak.
20Mo olgeta fis, mo olgeta pijin, mo olgeta anamol, ol bigbigwan mo ol smosmolwan, mo olgeta man blong wol ya bambae oli fraet, oli seksek long fes blong mi. Ol bigbigfala hil bambae oli brobrok, oli folfoldaon, mo bambae graon long ol klif i brobrok i kamdaon, mo ol stonwol bambae oli brobrok nogud olgeta.
21Bambae mi mekem plantekaen trabol i kam long king ya, we bambae i mekem hem i fraet we i fraet. Bambae ol man blong hem oli stap kilkilim olgeta bakegen long naef blong faet blong olgeta.
22Mo bambae mi mekem olgeta oli ded long sik mo long faet. Mo bambae mi mekem we bigfala ren wetem ston blong aes,* mo faea wetem salfa,* i folfoldaon long hem wetem ol soldia blong hem, mo long ol man ya blong ol narafala kantri we oli joen long hem. Hemia nao panis we bambae mi givim long olgeta.
23Nao long fasin ya bambae mi soemaot long ol man blong olgeta kantri we mi mi tabu mo mi gat olgeta paoa. Nao bambae oli savegud we mi mi Hae God. Mi mi Masta blong yufala, mo hemia tok blong mi.”
Who We AreWhat We EelieveWhat We Do
2025 by iamachristian.org,Inc All rights reserved.
