Esikel 33 - Bislama Bible Revised 2012

HAE GOD BAMBAE I LEFTEMAP OL LAEN BLONG ISREL BAKEGEN(33.1—39.29)Hae God i putumap Profet Esikel blong i kam wan wajman(Esikel 3.16-21)

1Nao Hae God i toktok long mi bakegen,

2i talem se, “Man blong wol ya. Yu talem long ol man blong yu we mi mi talem se, ‘Oltaem, taem mi sanem faet i kam long wan kantri, ol man blong hem oli mas jusumaot wan long olgeta blong i kam wajman.

3Mo taem man ya i luk we ol enemi oli stap kam, hem i blu pupu blong mekem ol man oli rere.

4Sipos wan man i harem pupu, be i no tingting long hem, nao ol enemi oli kam, oli kilim hem i ded, hemia i fol blong hem nomo,

5from we hem i harem pupu ya blong wonem ol man, be hem i tingting nating long hem. Sipos hem i bin obei long pupu ya, bambae hem i ronwe, i sevem laef blong hem, be hem i no mekem.

6Be sipos wajman ya i luk ol enemi oli stap kam, mo hem i no blu pupu blong wonem ol man, nao ol enemi ya oli kam kilim wan man i ded we sin blong hem i stap long hem yet, bambae mi mekem wajman ya i karem panis from ded blong man ya.

7“Man blong wol ya. Long fasin ya mi mi mekem yu yu wajman blong ol laen* blong Isrel.* Mo ol tok we mi stap givim long yu blong wonem olgeta, yu yu mas givim long olgeta.

8Mi save talem long wan man nogud se hem i mas ded. Nao sipos yu yu no tok long hem, blong hem i jenisim laef blong hem blong i sevem laef blong hem, nao hem i ded long sin blong hem, be bambae mi mekem yu yu karem panis from ded ya blong hem.

9Be sipos yu tok long wan man nogud blong hem i no moa mekem sin, be hem i no lesin, hem bambae i ded long sin blong hem, be yu, bambae mi sevem laef blong yu.”

Olgeta man oli mas lukaot gud long laef blong olgeta

10Nao Hae God i talem long mi se, “Man blong wol ya. Yu talem long ol laen* blong Isrel* se, ‘Yufala i stap talem se, “?Bambae mifala i save laef olsem wanem? Ol fasin nogud blong mifala oli olsem wan hevi samting we mifala i stap karem. Nao mifala i bunbun we klosap mifala i ded from.’ ”

11Yu talem long olgeta we mi mi talem se, ‘Ol laen blong Isrel. Mi mi Hae God, mi Masta* blong yufala, mo mi laef, mi stap we mi stap. Mo mi mi talem stret long yufala, se long nem blong mi, mi mi no glad nating blong luk wan man nogud i ded long sin blong hem. Mi wantem luk we hem i tanem tingting blong hem, i lego ol sin blong hem, nao bambae i laef i stap. Yufala i mas finis long ol rabis fasin ya we yufala i stap mekem. ?From wanem yufala i wantem ded?

12“ ‘Sipos wan stret man i mekem sin, ol stret fasin we hem i bin mekem i no save sevem hem. Mo sipos wan man nogud i tanem tingting blong hem, i lego rabis fasin blong hem, bambae hem i no save kasem panis from ol rabis fasin ya we hem i bin mekem. Mo sipos wan stret man i stat mekem sin, ol stret fasin we hem i bin mekem i no save sevem laef blong hem.

13Nao sipos mi talem long wan stret man, se bambae hem i stap laef, be hem i stap putum tingting blong hem long ol stret fasin we hem i bin mekem se oli naf blong sevem hem, nao hem i stat mekem sin, bambae mi no save tingbaot ol gudfala samting ya we hem i bin mekem. Bambae hem i mas ded from ol sin ya blong hem.

14Mi mi save tok long wan man nogud blong wonem hem. Mi save talem long hem se hem i mas ded. Be sipos hem i tanem tingting blong hem, i no moa mekem sin, i mekem ol samting we i stret mo i gud,

15nao hem i givimbak ol samting blong puaman we i holem fastaem from lon we hem i givim long puaman ya, mo i givimbak ol samting we hem i bin stilim, mo i no moa stap mekem sin, i folem loa ya we i givim laef, hem bambae i no save ded.

16Bambae mi fogivim hem, mi tekemaot ol sin ya we hem i bin mekem, nao bambae hem i stap laef, from we hem i stap mekem ol samting we i stret mo i gud.

17“ ‘Yufala i stap talem se fasin blong mi i no stret, be fasin blong yufala nao i no stret.

18Sipos wan stret man i no moa folem ol stret fasin, i stat mekem ol rabis fasin, hem bambae i mas ded from.

19Be sipos wan man nogud i tanem tingting blong hem, i lego ol sin blong hem, mo i mekem ol samting we i stret mo i gud, hem bambae i no save ded.

20Be yufala i stap talem se fasin blong mi i no stret. Bambae mi jajem yufala wanwan, stret long fasin blong yufala.’ ”

Nius i kamtru we ol enemi oli spolemgud Jerusalem(Esikel 3.24-27; 24.27)

21 2 King 25.3-10; Jer 39.2-8; 52.4-14 Nao long namba twelef yia blong yumi we yumi stap wok slef* long Babilonia, long namba ten manis,* long namba faef dei blong hem, i gat wan man we hem i ronwe long Jerusalem,* i kam talemaot long mi se, “!Ol enemi oli flatemgud Jerusalem finis!”

22Be fastaem, taem man ya i no kamtru yet, long naet mi harem paoa blong Hae God i kam long mi. Nao long moning blong hem, taem man ya i kam luk mi, Hae God i mekem tang blong mi i no moa fas, nao mi save toktok bakegen.

Ol sin blong ol laen blong Isrel

23Hae God i Masta* blong yumi, mo hem i toktok long mi long wan vison bakegen,

24i talem se, “Man blong wol ya. Ol man we oli stap long ol taon ya blong yufala we ol enemi oli spolem finis, oli stap talem se, ‘Olfala Ebraham ya bifo, hem wan nomo, be God i givim olgeta graon long kantri ya long hem. Be naoia yumi plante tumas, mo olgeta graon ya i blong yumi.’

25-26“Be yu mas talem long olgeta we mi mi talem se, ‘Ol fasin blong yufala i nogud we i nogud. Oltaem yufala i stap kakae mit we i gat blad long hem yet, mo yufala i stap mekem wosip long ol aedol. Yufala i stap trastem naef blong faet blong yufala, mo yufala i stap kilim man i ded, mo yufala evriwan i stap slip wetem ol woman blong ol narafala man. ?From wanem yufala i ting se i stret blong yufala i stap holem graon ya i blong yufala? !Yufala i no gat raet nating blong holem graon ya i blong yufala!

27“ ‘Mi mi Hae God, mi Masta blong yufala, mo mi laef, mi stap we mi stap. Mo naoia, mi mi tok blong wekemap yufala. Mi mi talem stret long yufala, se long nem blong mi, yufala ya we i stap long ol taon ya, bambae yufala evriwan i ded long faet. Mo yufala we i stap afsaed long taon, mi bambae mi givim yufala long ol wael anamol, nao bambae oli kilim yufala, oli kakae yufala. Mo yufala we i stap haed long ol hil, mo long ol hol blong ston, bambae yufala evriwan i ded long wan rabis sik.

28Yufala i stap trastem paoa blong kantri ya blong yufala, mo yufala i stap flas from, be mi bambae mi mekem paoa ya i finis olgeta. Bambae mi mekem kantri ya i kam nogud olgeta, we bambae i no gat wan gudfala samting i stap long hem. Ol hil ya blong hem, bambae oli kam nogud olgeta we bambae i no moa gat man i pas long olgeta bakegen.

29Mo taem mi panisim yufala from ol sin blong yufala, mo mi mekem kantri ya i kam nogud olgeta, we bambae i no gat wan gudfala samting i stap long hem, bambae yufala evriwan i savegud we mi mi Hae God.”

Ol samting we profet i talem bambae oli kamtru

30Nao Hae God i talem long mi se, “Man blong wol ya. Ol man blong yu oli stap go wanples long saed blong ol stonwol blong taon, mo long ol doa blong ol haos blong olgeta, oli stap tokbaot yu. Oli stap taltalem long olgeta se, ‘Ale, yufala i kam. Yumi go harem tok we Hae God i wantem talem long yumi.’

31Nao oltaem ol man blong mi oli stap kam hivap raon long yu blong oli harem ol samting we bambae yu talem, be oli no stap mekem ol samting we yu yu talem long olgeta blong oli mekem. Long maot blong olgeta oli stap talem se oli glad long tok blong yu, be tingting blong olgeta i stap strong nomo long ol samting we oli save win long hem.

32Oli stap luk yu olsem we yu wan man we i stap plei long gita, i stap singsing long ol sing blong switat, mo voes blong hem i naes we i naes. Oli stap lesin long ol tok blong yu, be oli no obei long hem nating.

33Ol tok blong yu bambae i mas kamtru, mo taem i kamtru, bambae olgeta oli savegud we i gat wan profet i stap wetem olgeta.”