1Nao Profet Amos i talem se, “Ol laen* blong Isrel.* !Yufala we i stap long tabu hil ya Saeon,* we yufala i gat gudfala laef, mo yufala i ting se evri samting i oraet nomo, sore tumas long yufala! !Mo yufala ol man Sameria,* we yufala i harem se yufala i stap gud, sore tumas long yufala! !Yufala i hae moa, i winim ol narafala man long kantri ya Isrel, we hem i wan strong kantri, mo ol man blong yufala oli stap kam long yufala blong yufala i givhan long olgeta, be sore tumas long yufala!
2Yufala i stap leftemap tingting blong ol man blong yufala long tok ya se, ‘I gud yufala i traem go luk taon ya Kalnei, mo yufala i go luk bigfala taon ya Hamat, mo biaen, yufala i go luk bigfala taon ya Gat long Filistia. Bambae yufala i luksave wantaem nomo. Ol man blong ol ples ya oli no strong olsem yumi ya long Isrel, mo long Juda.* Ol graon blong olgeta ya oli no bigwan, olsem ol graon ya blong yumi.’
3Be yufala i no wantem talemaot se i gat dei i stap kam we ol man blong faet bambae oli kam flatemgud yumi. Ol fasin ya blong yufala i stap pulum dei ya i kam klosap moa.
4“!Yufala ya we yufala i stap lafet olwe nomo, sore tumas long yufala! Yufala i stap ledaon long ol bed ya blong yufala we oli flasemgud long tut blong elefen, mo yufala i stap kakae mit blong ol yang buluk mo sipsip, we praes blong ol samting ya i antap tumas, be sore tumas long yufala.
5Yufala i wantem tumas blong kam man blong wokem singsing, olsem King Deved ya bifo, mo oltaem yufala i stap plei long ol gita blong sing long ol singsing ya.
6Yufala i stap yusum ol bigbigfala panikin blong dring waen, mo yufala i stap yusum ol gudgudfala oel blong ravem long bodi blong yufala. Be yufala i no stap harem nogud nating from kantri ya Isrel we bambae i kasem panis, i kam nogud olgeta.
7Nao from samting ya, yufala ya nao bambae i faswan blong go wok slef* long narafala kantri. Mo ol lafet blong yufala we yufala i stap harem gud long hem, bambae i finis olgeta.
8“Hae God, Masta* blong yumi, hem i gat olgeta paoa, mo hem i mekem wan strong promes* finis blong panisim yufala. Hem i talem se, ‘Ol man Isrel. Fasin ya blong yufala we yufala i stap flas tumas, mi mi no laekem nating, mi agens long hem. Ol gudgudfala haos ya blong yufala, mi mi no glad nating long olgeta. Bigfala taon ya we i kaptel blong yufala wetem olgeta samting we i stap long hem, mi bambae mi putum olgeta evriwan i go long han blong ol enemi blong yufala.’ ”
9Nao profet i talem se, “Sipos i gat ten man oli go haed long wan haos, be olgeta ya bambae oli ded evriwan.
10Nao sipos wan man olsem i ded, mo wan famle blong hem i kam wetem man blong berem dedman, blong tufala i berem hem, maet famle ya blong dedman i save singaot se, ‘!E! ?Olsem wanem? ?I gat man i stap yet wetem yu, no i no gat?’ Nao sipos man ya i talem se, ‘!No, i no gat!’, be famle blong dedman ya bambae i talem se, ‘Ssss. Yu stap kwaet. Yumi no mas talem nem blong Hae God. I nogud hem i harem yumi.’
11“Yufala i mas save. Sipos Hae God i tok strong, bambae ol bigbigfala haos oli folfoldaon oli smas, mo ol smosmol haos bambae oli brobrok olbaot.
12Yufala i traem tingbaot. ?Samtaem, yufala i luk we hos i stap resis long ol sap ston? ?Samtaem yufala i luk we man i go digim solwota blong planem garen blong hem long hem? Neva man i save mekem samting ya. Be hemia nao ol samting we yufala i stap mekem. Ol stret fasin, yufala i tanem i kam olsem posen, mo ol stret fasin blong mekem wok blong kot, yufala i tanem i kam krangke olgeta.
13“Oltaem yufala i stap bigmaot, yufala i stap talem se yufala i holem taon ya Lodebara finis. Oltaem yufala i stap tok flas se, ‘Mifala i strong, mifala i winim ol man blong taon ya Kanaem finis.’
14“Be Hae God i gat olgeta paoa, mo hem i talem se, ‘Ol man Isrel. !Yufala i lesin! Mi bambae mi tekem ol soldia blong narafala kantri oli kam winim yufala, nao bambae oli holem evri haf blong kantri ya blong yufala, i stat long ples ya we rod i gotru long ol hil, long Hamat long not, i go olwe kasem reva ya Araba, long saot.’ ”
Who We AreWhat We EelieveWhat We Do
2025 by iamachristian.org,Inc All rights reserved.
