Dutronome 26 - Bislama Bible Revised 2012

Ol presen long fas kakae blong garen

1Nao Moses i talem se, “Olgeta. Mi mi talem long yufala evriwan se Hae God i God blong yumi, mo long taem ya we bambae yufala i holem kantri ya we hem bambae i givim long yufala, mo yufala i stap gud long hem,

2Eks 23.19bambae yufala evriwan wanwan i mas fulumap wan basket long ol fas kakae blong olgeta garen* blong yufala, mo yufala i mas tekem i go long ples blong mekem wosip we Hae God bambae i jusumaot, mo we nem blong hem bambae i stap oltaem long hem.

3Nao yufala evriwan i mas go luk pris* ya we bambae i stap wok long taem ya, mo yufala wanwan i mas talem long hem se, ‘Hae God i God blong yumi, mo naoia, mi mi wantem soemaot long hem we mi mi stap finis long kantri ya we hem i promes* long ol bubu blong yumi bifo, se bambae i givim long yumi.’

4“Nao pris ya bambae i tekemaot ol basket long han blong yufala, i go putumdaon olgeta long fran blong Olta blong Hae God.

5Nao long fes blong Hae God, bambae yufala wanwan i mas talemaot ol tok ya se, ‘Hae God. Olfala bubu blong mifala bifo, hem i wan laen* blong Aram we i no gat graon blong hem, oltaem i stap muv, i aot long wan ples, i go stap long narafala ples. Hem i tekem ol famle blong hem oli go stap long Ijip, mo taem oli go, oli no plante, be taem oli stap long ples ya gogo, oli kam plante we plante, mo oli gat paoa.

6Be long taem blong mifala, ol man Ijip oli mekem i nogud tumas long mifala, oli stap fosem mifala blong mifala i wok slef* long ples blong olgeta.

7Be yu yu God blong ol bubu blong mifala bifo, mo mifala i krae i go long yu blong yu yu givhan long mifala, mo yu yu harem krae blong mifala. Yu yu luk we oli stap mekem i strong tumas long mifala, mo oli stap spolem laef blong mifala long fasin we i no stret nating, nao mifala i stap harem nogud tumas.

8Be yu yu strong we yu strong, paoa blong yu i bigwan tumas, nao yu yu kam tekemaot mifala, yu mekem mifala i fri. Long taem ya, yu yu mekem ol merikel mo ol samting blong sapraes, mo ol wok blong yu i mekem we ol man oli fraet, oli seksek.

9Yu yu tekem mifala i kam long ples ya, mo yu givim gudfala kantri ya long mifala, we ol kakae blong hem oli gudfala tumas, mo oli stap gru gud oltaem.

10Hae God. Yu yu mekem we garen blong mi i karem kakae, mo naoia, mi mi tekem ol fas kakae blong hem, mi kam givim long yu.’

“Long fasin ya nao, bambae yufala wanwan i mas putum basket blong yufala long fes blong Hae God, mo yufala i mas bodaon, yufala i mas mekem wosip long hem long ples ya.

11“Hae God i God blong yumi, mo oltaem, yufala i mas glad, yufala i mas harem gud long ol gudgudfala samting ya we hem i stap givim long yufala, wetem ol famle blong yufala. Mo sipos yufala i mekem lafet* blong hem, ol pris mo ol Livaet* wetem ol strenja we oli stap wetem yufala oli mas joen long lafet ya.

12 Dut 14.28,29 “Nao evri yia, bambae yufala i mas seraot olgeta kakae we i kamaot long ol garen blong yufala i go long ten hif, mo yufala i mas tekemaot wan hif, we i taet* blong yufala. Nao evri tri yia, bambae yufala i mas givim taet ya i go long ol Livaet, wetem ol strenja, mo ol pikinini we papa blong olgeta i ded, mo ol wido. Yufala i mas mekem fasin ya, blong bambae ol man olsem long olgeta ples blong yufala bambae oli no save sot long kakae. Hae God i God blong yumi, mo taem yufala i mekem fasin ya,

13bambae yufala i mas kam long fes blong hem, mo yufala i mas talem long hem se, ‘Hae God, yu yu God blong mi. Taet ya we mi mi putum, i tabu, i blong yu, mo i no moa gat wan haf blong hem nating i stap yet long haos blong mi. Mi mi givim evriwan i go long ol Livaet, wetem ol strenja, mo ol pikinini we papa blong olgeta i ded, mo ol wido, olsem we yu talem finis long mi blong mi mekem. Mi mi obei gud long ol tok blong yu from fasin blong givim taet, mo mi no fogetem wan long olgeta.

14Mi mi no mekem wan samting blong spolem taet ya. Taem mi stap krae from dedman, mi no kakae wan pis nating blong taet ya, mo taem mi no klin long fes blong yu, mi livim i stap, mi no mekem wan samting long hem. Mo mi no tekemaot samfala tu blong givim olsem presen from dedman. Hae God, mi mi obei gud long yu, mo mi folemgud olgeta fasin blong givim taet olsem we yu yu talem.

15Yu yu stap antap long heven, long tabu ples blong yu. Plis yu lukluk i kamdaon long mifala, yu blesem mifala, mo yu blesem gudfala kantri ya tu we yu givim long mifala olsem we yu promes long ol bubu blong mifala bifo, se bambae yu givim.’ ”

Moses i finisim longfala toktok blong hem

16Nao Moses i talem long olgeta se, “Hae God i God blong yumi, mo tede, hem i talem long yufala se yufala i mas obei long olgeta loa blong hem. From samting ya, yufala i mas obei gud long hem long olgeta tingting blong yufala.

17Tede, yufala i talemaot we hem i God blong yufala, mo yufala i promes se bambae yufala i obei long hem, mo yufala i holemstrong olgeta loa blong hem, mo yufala i mekem olgeta samting we hem i talem long yufala.

18Eks 19.5; Dut 4.20; 7.6; 14.2; Taet 2.14; 1 Pita 2.9Mo bakegen, tede, hem i talemaot we yufala i man blong hem, olsem we hem i promes* finis, mo we hem i lavem yufala, mo i talem long yufala se bambae yufala i mas obei long olgeta loa blong hem.

19Hem bambae i mekem yufala i kam plante moa, mo yufala i kam strong moa i winim olgeta narafala man we oli stap long wol ya. Nao oltaem, bambae yufala i mas presem hem mo yufala i mas leftemap nem blong hem i go antap. Bambae yufala i tabu, yufala i man blong hem nomo, stret olsem we hem i promes finis.”