1Nao long taem ya we ol soldia blong Asiria oli stap yet long Juda,* King Hesekia i sik we i sik, we klosap i ded. Nao Profet Aesea i go luk hem, i talemaot tok blong Hae God long hem. Hem i talemaot we Hae God i talem se, “Hesekia. I gud yu stretem ol bisnes blong yu, from we bambae yu yu ded, yu no save kam oraet bakegen.”
2Nao king i tanem fes blong hem i go long wol blong haos, mo i prea, i talem se,
3“Hae God, plis yu tingbaot mi. Oltaem mi stap wok blong yu long olgeta paoa blong mi, mo long olgeta tingting blong mi. Oltaem nomo, mi stap traehad blong mekem olgeta samting we yu yu wantem.” Nao hem i stap krae we i krae, from we i harem nogud tumas.
4Nao profet i aot, i stap wokbaot blong gobak long haos blong hem, be taem hem i stap yet long yad ya we ol haos blong king i goraon long hem, Hae God i talem long hem se,
5“Yu gobak, yu go luk king bakegen. Hem i king blong ol man blong mi, mo yu go talemaot long hem we mi mi talem se, ‘Mi mi Hae God, mi God blong olfala bubu ya blong yu bifo, King Deved. Mi mi harem prea blong yu, mo mi luk we yu harem nogud tumas, yu stap krae. Bambae mi mekem yu yu kam oraet bakegen, nao biaen long tri dei, bambae yu save kam long haos blong mi.
6Mo bambae mi mekem yu yu stap gogo kasem fiftin yia bakegen, mo bambae mi tekemaot yu, mo taon ya Jerusalem,* long han blong king blong Asiria. Nem blong mi i stap long taon ya, mo mi bin mekem promes* long King Deved, man blong wok blong mi bifo, se bambae mi blokem taon ya i stap gud, mo from samting ya, bambae mi mi lukaot gud long hem.’ ”
7Nao profet ya i gobak long king, mo i talem long ol man blong wok blong king blong oli go tekem sam frut blong figtri,* oli wokem wan plasta long hem, oli putum long boela blong king, blong bambae i kam gud.
8Nao king i askem long hem se, “?Olsem wanem? ?Wanem saen we bambae mi save luk, blong soemaot se Hae God bambae i mekem mi mi kam oraet bakegen, mo biaen long tri dei bambae mi save go long haos blong hem?”
9Mo profet i talem se, “Hem bambae i givim wan saen long yu, blong soemaot we bambae hem i holem promes blong hem. ?Yu luk sado ya we i stap long ol step ya, i stap muv i go? ?Oraet, naoia yu wantem sado ya i gohed, i go ten step, no yu wantem hem i arier, i kambak ten step?”
10Mo king i talem se, “!I isi nomo blong mekem hem i gohed i go ten step! !Yu mekem hem i arier, i kambak ten step!”
11Nao profet i prea long Hae God, mo Hae God i mekem sado ya i arier, i kambak ten step. Ol step ya blong haos, hemia ol step we King Ahas i bin wokem bifo.
Sam man Babilonia oli kam long Jerusalem(Aesea 39.1-8)12Nao long taem ya, king blong Babilonia, King Merodak Baladan, we papa blong hem King Baladan, hem i harem we King Hesekia i bin sik, nao i sanem ol man blong hem oli karem wan leta wetem wan presen i kam long hem.
13Nao King Hesekia i glad tumas blong luk ol man ya, mo i soemaot long olgeta, olgeta gudgudfala samting we hem i gat. Hem i tekem olgeta oli go luk ol silva mo ol gol blong hem, mo ol lif blong putum long kakae blong mekem i tes gud, mo ol gudfala senta, mo ol samting blong faet blong hem. Olgeta oli luk olgeta samting we hem i putumgud olgeta i stap long haos blong hem, mo oli luk olgeta samting tu long evri ples olbaot long kingdom blong hem, gogo i no moa gat wan samting nating i stap we hem i no soemaot long olgeta.
14Nao biaen, Profet Aesea i kam luk hem, i askem long hem se, “King. ?Ol man ya oli kam wea? ?Oli talem wanem long yu?”
Mo king i talem se, “O, yu no wari. Olgeta oli kam long Babilonia ya. Ples blong olgeta i longwe tumas long yumi.”
15Nao profet i askem bakegen se, “?Be oli stap lukluk wanem insaed long haos blong yu?”
Mo hem i talem se, “Oli luk evri samting. I no gat wan samting nating i stap we mi no soemaot long olgeta.”
16Nao profet i talem long hem se, “!Oraet, yu mas harem tok blong Hae God! Hem i talem se,
172 King 24.13; 2 Kron 36.10‘Hesekia. I gat taem i stap kam we bambae evri samting insaed long haos blong yu, wetem olgeta samting we ol bubu blong yu bifo oli putumgud i stap kam kasem tede, bambae ol man Babilonia oli kam karemaot evriwan i go long ples blong olgeta. Bambae i no gat wan samting nating i stap.
182 King 24.14,15; Dan 1.1-7Bambae oli karemaot sam long olgeta ya we bambae oli kamaot biaen long yu, oli go longwe, mo bambae oli mekem natamap* long olgeta, blong oli go wok insaed long haos blong king blong olgeta.’ ”
19Be king i luk we tok ya i min se oltaem long laef blong hem, bambae hem i stap gud nomo, nao hem i talem se, “Tok ya we Hae God i givim long yu, hem i gud nomo.”
King Hesekia i ded(2 Kronikel 32.32-33)20Ol narafala samting we King Hesekia i mekem, wetem ol strong samting we hem i mekem long taem blong faet, mo ol ripot blong fasin we hem i wokem wan wel, mo i wokem wan longfala paep insaed long graon blong pulum wota i kam insaed long taon ya Jerusalem,* ol man oli raetemdaon evriwan long buk ya we nem blong hem Ol Stori blong Laef blong ol King blong Juda*.
21Mo taem hem i ded, pikinini blong hem Manase i tekem ples blong hem i kam king.
Who We AreWhat We EelieveWhat We Do
2025 by iamachristian.org,Inc All rights reserved.
