Dutronome 22 - Bislama Bible Revised 2012

1 Eks 23.4,5 “Sipos yufala i luk wan buluk no wan sipsip we i blong wan man long laen* blong yumi, we man ya i fasem, be i kamaot long rop blong hem, bambae yufala i no mas letem i ron olbaot, yufala i mas tekem i gobak long man blong hem.

2Be sipos man blong hem i stap longwe tumas, no yufala i no save se man blong hem hu, bambae yufala i mas tekem i gobak long ples blong yufala. Nao sipos man blong hem i kam lukaot, ale, bambae yufala i save givim i gobak long hem.

3Mo sipos yufala i luk wan dongki no wan klos no wan narafala samting olsem we i blong wan laen blong yumi, bambae yufala i mas mekem olsem tu long hem.

4“Mo sipos wan dongki no wan buluk blong wan laen blong yumi i foldaon i stap, bambae yufala i no mas lukluk nomo, yufala i mas go givhan long man blong hem blong leftemap anamol ya, blong mekem i stanap bakegen.

5“I tabu blong woman i werem klos blong man, mo i tabu tu blong man i werem klos blong woman. Hae God i God blong yumi, mo hem i no laekem fasin ya nating, i agens long hem.

6“Samtaem, sipos yufala i faenem nes blong pijin antap long tri no daon long graon we i gat mama blong hem i stap sidaon long eg no long pikinini blong hem, bambae yufala i no mas kilim mama blong hem.

7Yufala i save tekem pikinini blong hem, be yufala i mas letem mama blong hem i go. Sipos yufala i mekem olsem, bambae yufala i save stap longtaem, mo yufala i save gat gudfala laef.

8“Mo sipos yufala i wokem wan haos we ruf* blong hem i flat, blong man i save go spel long hem, be bambae yufala i mas mekem rel i goraon long hem. Nao sipos wan man i foldaon i ded, be bambae i no gat man i save jajem yufala from.

9 Lev 19.19 “Mo sipos yufala i gat plantesen blong rop ya grep,* bambae yufala i no mas planem sam narafala samting bakegen long plantesen ya. Sipos yufala i mekem olsem, bambae i tabu blong yufala i yusum olgeta kakae blong graon ya.

10“Bambae yufala i no mas putum yok* long buluk wetem dongki, blong tufala i wok wan ples blong digim graon.

11“Bambae yufala i no mas werem ol klos ya we oli wivim wul mo linen,* tufala i go wan ples.

12 Nam 15.37-41 “Bambae yufala i mas somap ol tasel* oli stap hanghang long ol fo kona blong ol klos blong yufala.”

Man we i jes mared be i no moa wantem woman blong hem bakegen

13Nao Moses i talem se, “Samtaem, maet wan man i mared long wan gel, be biaen hem i talem se i no moa wantem gel ya bakegen,

14nao i stap mekem giaman toktok agens long gel ya se, ‘Taem mi tekem gel ya, be narafala man i slip wetem hem finis.’

15“Sipos i gat wan toktok olsem, bambae papa mo mama blong gel ya i mas tekem sitbed ya we i gat blad long hem we tufala ya i yusum taem tufala i jes mared, mo we i soemaot we i no gat man i bin slip wetem gel ya bifo, tufala i mas karem i kam long ol lida blong taon ya, long taem blong kot.

16Nao papa blong gel ya bambae i mas talemaot long olgeta se, ‘Boe ya i kam askem gel ya long mi, blong i mared long hem, mo mi mi letem long hem, be naoia hem i no moa wantem gel ya bakegen,

17mo i stap mekem giaman toktok agens long hem. Hem i talem se taem hem i tekem gel ya, be narafala man i slip wetem hem finis. Be hemia sitbed ya we tufala i yusum, taem tufala i jes mared. !Yufala i luk! I gat blad long hem. Hemia i saen we narafala man i no bin slip wetem gel ya blong mi.’

18Nao ol lida blong taon ya bambae oli mas tekem man ya, oli mas wipim hem,

19mo oli mas mekem hem i faen long fifti taosen vatu.* Bambae hem i mas givim mane ya i go long papa blong gel ya, from we i mekem sem long wan gel we i laen* blong yumi. Mo man ya bambae i no save mekem divos long woman ya samtaem. Woman ya i woman blong hem, mo bambae i mas stap oltaem wetem hem.

20“Be sipos i no gat samting blong soemaot we man ya i giaman, ol toktok ya we hem i talem i tru nomo,

21ale, ol lida ya bambae oli mas tekem woman ya i go long doa blong haos blong papa blong hem, nao ol man blong taon ya bambae oli mas stonem hem gogo i ded, blong tekemaot rabis fasin ya i gowe long ples blong yufala. Woman ya i bin mekem wan samting we i nogud, we i nogud, mo hem i bin mekem sem long yumi evriwan. Hem i bin go slip wetem wan man long taem ya we hem i no mared yet, we i stap yet wetem papa blong hem.”

Man we i slip wetem woman blong narafala man

22Nao Moses i talem se, “Sipos yufala i luk we wan man i slip wetem woman blong narafala man, bambae yufala i mas stonem tufala, gogo tufala i ded, blong tekemaot rabis fasin ya i gowe long ples blong yufala.

23“Mo sipos yufala i luk we wan man i slip wetem wan gel we oli blokem finis se i blong narafala man, mo tufala i mekem insaed long ples blong yufala,

24bambae yufala i mas tekem tufala i go afsaed long ples blong yufala, nao yufala i mas stonem tufala gogo tufala i ded, blong tekemaot rabis fasin ya i gowe long ples blong yufala. Gel ya i mas ded, from we taem man ya i holem hem, hem i stap long medel blong ples blong yufala, we sipos hem i singaot, man i save harem blong givhan long hem, be hem i no singaot. Mo man ya i mas ded from we hem i slip wetem wan gel we oli blokem finis, se i blong narafala man.

25Be sipos wan man i holem wan gel olsem, mo i fosem hem blong i slip wetem hem long wan ples we i no gat man klosap,

26nao yufala i faenemaot, bambae yufala i mas kilim man nomo i ded, yufala i mas livim gel i stap. Bambae yufala i no mas mekem wan samting long gel ya, from we hem i no mekem wan samting nogud we i stret blong hem i ded from. Bisnes ya i fol blong man nomo, i olsem bisnes ya we man i girap hem wan, i go kilim narafala man i ded.

27Man ya i holem gel ya long ples we i no gat man klosap, mo sipos gel ya i singaot, be bambae i no gat man i save harem hem, blong givhan long hem.

28 Eks 22.16,17 “Mo sipos yufala i luk we wan man i holem wan gel we i no gat man i go long hem yet, be oli no blokem se i blong narafala man, nao i fosem gel ya blong i slip wetem hem,

29man ya i mas pem twanti faef taosen vatu* i go long papa blong gel ya. Twanti faef taosen vatu ya, hemia i stret praes blong woman. Nao bambae gel ya i woman blong man ya, from we man ya i fosem hem blong i slip wetem hem, mo man ya bambae i no save mekem divos long hem samtaem.

30 Lev 18.8; 20.11; Dut 27.20 “Mo i tabu blong man i mared long woman we fastaem i wan woman blong papa blong hem. Fasin ya bambae i mekem sem long papa blong hem.”