Jeremaea 47 - Bislama Bible Revised 2012

Hae God i tok agens long ol man Filistia

1 Aes 14.29-31; Esik 25.15-17; Joel 3.4-8; Amos 1.6-8; Sef 2.4-7; Sek 9.5-7 Nao taem king blong Ijip i no kam faet agens long Gasa yet, Hae God i givim tok blong hem long Profet Jeremaea bakegen we i tok agens long ol man Filistia.

2Nao profet i talemaot we hem i talem se,

“Jeremaea.

!Yu luk!

I gat bigfala wota i aot long not,

i stap ron i kam,

olsem reva we i ron bigwan.

Bambae wota ya i kavremap kantri ya,

wetem olgeta samting we i stap long hem.

Bambae hem i kavremap olgeta taon,

wetem ol man we oli stap long ol ples ya.

Ol man ya bambae oli singaot

blong man i kam givhan long olgeta,

mo olgeta man long wol

bambae oli krae we oli krae.

3Bambae oli harem noes blong ol hos

we oli stap resis,

mo noes blong ol kat blong faet,

wetem bigfala noes blong ol wil blong

ol kat we oli ron.

Ol pikinini we oli stap long haos,

ol papa blong olgeta

bambae oli no save go karemaot olgeta,

from we bambae oli seksek tumas,

nao han blong olgeta i no moa gat paoa.

4-6Naoia, taem i kam finis

blong mi mi spolem olgeta man Filistia.

Olgeta ya oli kamaot long Krit bifo,

we ol ples blong olgeta i klosap long solwota,

mo mi bambae mi kilim olgeta evriwan.

Ol man long taon ya Gasa

bambae oli stap harem nogud,

mo ol man long taon ya Askelon

bambae oli stap kwaet,

oli no moa save toktok.

Bambae mi mekem olsem,

blong bambae oli no moa save givhan

long tufala taon ya Taea mo Saedon long Fonisia.

Yu yu stap singaot bigwan se,

‘Be Hae God.

?Olgeta we oli no ded,

bambae oli harem nogud

gogo kasem wetaem?

Naef blong faet blong yu

bambae i stap kakae olgeta,

gogo kasem wetaem?

Plis yu putumgud i stap,

blong i spel gud long ples blong hem.’

7?Be bambae i spel gud olsem wanem?

!Mi mi givim wok long hem finis

we hem i mas mekem!

Mi mi givim tok long hem finis

blong i kilim ol man Askelon,

wetem ol man we oli stap klosap long solwota.”