Hosea 12 - Bislama Bible Revised 2012

1Olgeta samting we yufala i stap mekem, i stat long moning, i go kasem long sapa, oli blong nating nomo. Oli stap spolem yufala nomo. Yufala i stap pasraon long baksaed blong ol fren blong yufala blong spolem olgeta bakegen, mo oltaem yufala i stap mekem faet, we yufala i stap kilkilim yufala. Yufala i stap saenem ol promes wetem king blong Asiria blong wok wanples wetem hem, mo yufala i stap mekem bisnes wetem ol man Ijip.”

2Nao profet i talem long ol man Isrel se, “Olgeta. Hae God i gat poen agens long ol man Juda, be bambae hem i panisim yufala tu from ol rabis fasin ya we yufala i stap mekem. Bambae hem i givim stret pei long yufala from ol samting nogud ya we yufala i stap mekem.

3Jen 25.26

Jen 32.24-26Bifo, taem olfala bubu ya blong yumi Jekob* wetem Esao, tufala i stap yet long bel blong mama blong tufala, tufala i stap faet tumas, mo taem Jekob i kam bigfala, oltaem hem i stap faet agens long God.

4Jen 28.10-22Wan taem, hem i faet agens long wan enjel,* mo i winim enjel ya. Hem i krae long fes blong enjel ya mo i askem long hem blong i blesem hem. Nao taem hem i stap long Betel, God i kamtru long hem, mo i toktok wetem hem.

5God ya, hem i Hae God, mo hem i gat olgeta paoa. Mo taem yumi mekem wosip long hem, yumi mas singaot hem se “Hae God”.

6Yumi ya, yumi ol laen* blong Jekob, mo yufala i mas tanem tingting blong yufala, yufala i kambak long God blong yumi bakegen. Tingting blong yufala i mas stap strong long hem, yufala i mas folem ol stret fasin, mo yufala i mas wet blong luk ol samting we hem bambae i mekem blong sevem yufala.”

Hae God bambae i jajem ol man Isrel

7Nao Profet Hosea i talemaot we Hae God i talem se, “Ol man Isrel.* Yufala i sem mak nomo long ol man Kenan,* yufala i man blong stil. Yufala i wantem tumas blong yusum skel* we i blong giaman blong ravem ol man.

8Yufala i stap talem se, ‘Naoia yumi kam rijman finis. Yumi gat plante samting we yumi wantem. ?Hu bambae i tok agens long yumi, se yumi kam rijman long fasin we i no stret?’

9Lev 23.42,43Be mi mi Hae God, mi God blong yufala, we bifo, taem ol bubu blong yufala oli stap long Ijip, mi mi tekemaot olgeta oli kam. Mo mi bambae mi fosem yufala, blong yufala i slip long haos tapolen bakegen, olsem we ol bubu ya blong yufala bifo, oli stap mekem long draeples.

10“Bifo, mi mi stap toktok long ol profet, mo mi stap soemaot ol vison* long olgeta, nao oli stap talemaot ol samting ya blong wekemap yufala.

11Nating we mi stap mekem olsem, be plante long yufala oli stap mekem wosip yet long ol narafala god ya long Gilead. Be olgeta we oli stap mekem olsem, bambae oli ded evriwan. Oltaem, yufala i stap kilim ol bul long Gilgal, yufala i stap bonem blong mekem sakrefaes. Ol olta ya blong yufala bambae oli brobrok, oli folfoldaon evriwan, oli kam olsem ol hip ston nating nomo, olbaot long open ples.”

12 Jen 29.1-20 Nao profet i talem se, “Bifo, bubu ya blong yumi Jekob* i ronwe i go stap long kantri ya Mesopotemia. Long ples ya, hem i go stap wok blong wan man, blong i save tekem wan dota blong hem, mo i stap lukaot long sipsip blong man ya bakegen, blong i save tekem narafala dota blong hem.

13Eks 12.50,51Biaen, Hae God i sanem wan profet blong i go tekemaot ol laen blong olfala ya, blong oli no moa wokslef* long Ijip, mo profet ya i stap lukaot gud long olgeta.

14Yumi ya, yumi laen blong olgeta, be naoia yufala i mekem Hae God i kros we i kros tumas. Yufala i stap kilim ol man oli ded, be hem bambae i givimbak fasin ya long yufala long fulmak blong hem. Bambae hem i panisimgud yufala, from we yufala i mekem bigfala sem long nem blong hem.”