Job Sotfala stori blong buk ya - Bislama Bible Revised 2012

Sotfala stori blong buk yaBuk ya JOB, i wan stori blong wan gudfala man we hem i stap harem nogud tumas from bigfala trabol we i kasem hem. Hem i lusum olgeta pikinini blong hem wetem olgeta samting blong hem, mo wan rabis sik i stap spolem hem, i mekem we ol man oli no wantem kam klosap long hem. Man we i raetem buk ya i putum stori ya long tri haf, we long fas haf, Job wetem ol fren blong hem oli stap tokbaot ol trabol ya blong hem, mo long seken haf, olgeta oli stap tokbaot fasin blong God long laef blong man, mo long las haf, God i kamtru long Job, i toktok wetem hem.Ol fren blong Job oli stap talemaot long hem we oli bilif se hem i stap harem nogud from we laef blong hem i no stret long fes blong God. Olgeta oli bilif se oltaem God i stap mekem i gud long gudfala man, be i stap panisim man we i mekem i nogud, taswe Job i stap harem nogud, from we hem i stap mekem sin. Be Job i no glad long toktok ya. Hem i harem se i no stret blong hem i kasem panis we i nogud olsem, from we hem i wan gudfala man, mo fasin blong hem i stret. Hem i no save from wanem God i letem trabol olsem i kam kasem man olsem hem, taswe hem i askem long God blong i talemaot risen blong trabol ya blong hem, be bilif blong hem i no foldaon. Hem i wantem se God i mas talemaot we hem i wan stret man long fes blong hem, mo ol man oli mas ona long hem bakegen from we hem i wan gudfala man.Nao taem God i tok, hem i no givim ansa long ol kwestin blong Job, be hem i luksave we Job i bilif long hem, nao i stap talemaot paoa blong hem mo waes blong hem long Job, blong openem tingting blong hem. Ol toktok ya i daonemgud Job, nao Job i talemaot we God i hae we i hae. Fastaem, hem i kros tumas, mo i stap sakem ol rabis toktok i go long God, be taem God i tok, hem i tanem tingting blong hem, mo i mekem tingting blong hem i stap daon.Las haf blong buk ya i talemaot we Job i kasem gudfala laef bakegen olsem bifo, mo we i kam rij we i rij i winim fastaem. God i tok strong long ol fren blong Job, from we oli traem talemaot fasin blong God, be oli no savegud fasin blong hem, nao oli stap giaman nomo. Job nomo i luksave we fasin blong God i hae moa, i winim tingting blong ol man ya we oli stap talem se trabol ya blong hem i min se God i stap panisim hem from ol sin blong hem.Ol stori we i stap long buk yaStamba blong stori ya 1.1—2.13

Job wetem ol fren blong hem 3.1—31.40

Job i tok from we i harem nogud 3.1-26

Fas toktok blong Job wetem ol fren blong hem 4.1—14.22

Seken toktok blong olgeta 15.1—21.34

Nambatri toktok blong olgeta 22.1—27.23

Waes i kamaot long God nomo 28.1-28

Las toktok blong Job 29.1—31.40

Tok blong Elihu 32.1—37.24

Hae God i givim ansa long Job 38.1—42.6

En blong stori ya 42.7-17