Eksodas 28 - Bislama Bible Revised 2012

Spesel klos blong pris(Eksodas 39.1)

1Nao Hae God i talem long Moses se, “Moses. Taem yu gobak, bambae yu singaot brata blong yu Eron wetem ol pikinini blong hem, Nadab, mo Abihu, mo Eleasara, mo Itamara, yu tekemaot olgeta long olgeta laen* ya blong yufala, blong bambae olgeta oli pris,* oli wok blong mi.

2Bambae yufala i somap ol spesel klos blong pris blong brata ya blong yu. Ol klos ya i blong flasemgud hem, mo blong mekem ol man oli tinghevi long hem.

3Bambae yu singaot olgeta man ya we mi mi givim save long olgeta blong somap klos, yu talem long olgeta blong oli somap ol klos ya blong hem, blong yufala i save putumap hem i tabu, i pris blong mi.

4Bambae yu talem long olgeta blong oli somap wan spesel paos blong hangem long jes blong hem, wetem wan efod,* mo wan longfala kot, mo wan spesel sot blong hem we bambae oli flasemgud, mo wan spesel hat blong hem mo wan longfala strap blong hem we bambae oli wokem long kaliko. Bambae oli somap ol klos ya blong brata blong yu wetem ol pikinini blong hem, blong oli save kam pris blong mi, oli mekem wok blong mi.

5Ol man ya oli mas tekem waet kaliko ya linen* we i beswan blong somap ol klos ya, mo bambae oli mas yusum tred we i blu, mo tred we i pepol, mo tred we i red, mo tred ya we oli wokem long gol blong flasem.”

Klos ya efod(Eksodas 39.2-7)

6Mo Hae God i talem se, “Klos ya efod,* bambae ol man ya oli mas wivim long gudfala tred ya linen* we i waet, wetem tred we i blu, mo tred we i pepol, mo tred we i red, mo tred we oli wokem long gol, mo bambae oli wokem ol pija long hem blong flasem.

7Efod ya bambae i gat tu strap long hem, wan long wan saed, wan long wan saed, we tufala i pas antap long solda blong pris* blong fasem.

8Mo bambae oli wokem wan strap blong hem bakegen long sem tred ya yet, we bambae i haf blong efod ya nomo, we i blong fasem long bel.

9Mo bambae oli tekem tu gudfala ston ya kanilyan,* blong katem ol nem blong ol pikinini blong Jekob* i go long tufala,

10i stat long fasbon, i go kasem lasbon, we sikis nem i stap long wan, sikis i stap long wan.

11-14Bambae yu mas putum wok ya long han blong wan man we i waes gud blong wok long ston, nao bambae hem i katem ol nem long tufala ston ya, mo i wokem tufala ples long gol, i putum tufala ston ya i fas gud long tufala. Bambae hem i yusum gol we i klin gud blong wokem tufala ples blong holem ston ya, mo i wokem ol smol jen tu long gol ya, i tantanem olgeta blong mekem tu smol rop long hem blong fasem tufala ples blong holem ston ya long tufala strap blong klos ya. Nao bambae hem i putum tufala ston ya wanwan long tufala strap blong solda blong klos ya, blong soemaot ol twelef laen* blong yufala. Nao long fasin ya, oltaem nomo, taem we Eron i kam long fes blong mi, bambae hem i stap karem nem blong ol laen ya blong yufala long solda blong hem, blong mi mi stap tingbaot yufala oltaem.”

Spesel paos we hae pris i hangem long jes blong hem(Eksodas 39.8-21)

15Mo Hae God i talem se, “Bambae ol man ya oli mas wokem wan spesel paos tu we Eron bambae i stap hangem long jes blong hem. Long paos ya, bambae i gat tufala ston ya Yurim* mo Tumim*, we hem bambae i save yusum blong faenemaot tingting we mi mi wantem blong yufala i folem. Taem oli wokem paos ya, ol tred blong wivim bambae i sem mak long ol tred ya we oli yusum blong wivim klos ya efod.* Mo ol pija tu we bambae oli wokem long hem blong flasem bambae i sem mak long ol pija we bambae oli wokem long efod ya.

16Bambae oli benem kaliko ya blong wokem paos ya, nao bambae i skwea we bigfala blong hem i moa long twanti sentemeta.

17-21Bambae oli tekem twelef gudfala ston blong flasem paos ya, nao long ol twelef ston ya, bambae oli katem nem blong ol twelef pikinini blong Jekob,* we wan i go long wan, wan i go long wan, blong soemaot ol twelef laen* ya blong yufala. Mo bambae oli wokem twelef ples long gol, nao oli putum ol twelef ston ya oli fas gud wanwan long olgeta. Nao bambae oli somap olgeta long paos ya, we bambae oli stap long fo laen. Long fas laen, bambae oli putum trifala ston ya rubi,* mo topas,* mo ganet,* mo long seken laen bambae oli putum trifala ston ya emeral,* mo safaea,* mo onikis,* mo long namba tri laen, bambae oli putum trifala ston ya takwoes,* mo agat,* mo ametis,* mo long namba fo laen, bambae oli putum trifala ston ya kalsedoni,* mo kanilian,* mo jaspa.*

22Nao bambae oli wokem ol smol jen long gol we i klin gud, nao oli tantanem blong mekem tu smol rop long hem, blong hangem paos ya.

23Mo bambae oli wokem tu ring long gol, oli fasem tufala long tufala kona blong paos ya antap,

24mo oli fasem tufala rop ya long tufala ring ya.

25Nao bambae oli fasem narafala en blong tufala rop ya i go long tufala ples blong holem ston ya we i stap finis long tufala strap blong efod we i pas long solda, blong paos ya i save hang long fran blong efod ya.

26Mo bambae oli wokem tu ring long gol bakegen, oli fasem tufala long tufala kona blong paos ya daon, long baksaed blong hem.

27Bambae oli wokem tu narafala ring bakegen long gol, oli fasem tufala long fran blong efod, be daon, klosap long ples we gudfala strap ya blong hem i stap.

28Nao bambae oli tekem tu rop we i blu, oli fasem tufala ring ya long paos daon i go fas long tufala ring ya long efod, blong paos ya bambae i save sidaon gud antap long strap blong efod, i no muvmuv olbaot.

29“Nao sipos Eron i go insaed long Rum ya we Tabu, bambae hem i hangem paos ya we i gat nem blong ol twelef laen ya blong yufala i stap long hem. Nao from samting ya, oltaem bambae mi mi stap tingbaot yufala.

30Nam 27.21; Dut 33.8; Esra 2.63; Neh 7.65Nao tufala spesel ston ya Yurim mo Tumim, bambae yufala i putum tufala i stap long paos ya we bambae hem i hangem long jes blong hem, nao taem hem i kam stanap long fes blong mi, be oltaem bambae hem i karem tufala samting ya. Oltaem, taem hem i kam stanap long fes blong mi, bambae hem i hangem spesel paos ya, blong i save yusum tufala ston ya blong faenemaot tingting we mi mi wantem blong yufala i folem.”

Ol narafala spesel klos blong pris(Eksodas 39.22-31)

31Mo Hae God i talem se, “Bambae ol man ya oli mas wokem spesel kot blong Eron, we i blong putum fastaem, efod* biaen. Kot ya, bambae oli wivim long tred ya nomo we i blu.

32Bambae oli wokem we i wan pis nomo, we i gat hol blong nek long medel, mo bambae oli mas wivim wan gudfala baesbaending blong putum i goraon long nek ya, blong i no brok.

33-34Bambae oli wokem ol pija blong frut blong grenadin* long tred we i blu, mo tred we i pepol, mo tred we i red, mo bambae oli wokem ol smosmol bel long gol. Nao olbaot long en blong kot ya daon, bambae oli hangem wan bel, wan pija, wan bel, wan pija, gogo i goraon.

35Nao oltaem, taem Eron i mekem wok blong hem, bambae hem i werem kot ya. Nao taem hem i kam insaed long Rum ya we i Tabu blong stanap long fes blong mi, mo taem i goaot bakegen, ol bel ya bambae oli krae, mo bambae mi mi harem. Sipos hem i no mekem olsem, bambae mi mi kilim hem i ded.

36“Mo bambae oli mas tekem smol gol we i klin gud, i beswan, blong wokem smol brasplet* long hem. Bambae oli hamarem i flat gud, nao bambae oli katem tok ya long hem se, ‘Man ya, hem i tabu, i blong Hae God.’

37Mo bambae oli tekem rop we i blu, oli fasem brasplet ya long hem blong i hang long fran blong spesel hat ya we Eron bambae i werem.

38Nao bambae hem i werem brasplet ya long fored blong hem, blong soemaot se sipos i gat samting i rong long wan presen we yufala i givim i kam long mi, be hem nao bambae i karem blem blong samting ya. Bambae hem i mas werem brasplet ya oltaem, blong mekem rod blong mi mi save tekem olgeta presen we bambae yufala i givim i kam long mi.

39“Mo bambae oli mas wivim spesel sot tu blong hem, long gudfala tred ya linen,* we i waet, mo bambae oli somap spesel hat blong hem mo spesel strap blong hem tu long kaliko ya. Mo bambae oli somap ol pija long strap ya blong hem blong flasem.

40“Mo bambae oli mas wokem ol sot mo ol strap mo ol hat olsem blong ol pikinini blong hem tu, blong flasemgud olgeta mo blong mekem ol man oli tinghevi long olgeta.

41Nao taem yu putumap brata ya blong yu wetem ol pikinini blong hem, bambae yu tekem ol klos ya, yu go givhan long olgeta blong oli putum. Mo bambae yu kafsaedem tabu oel i go long hed blong olgeta blong putumap olgeta, mo blong mekem olgeta oli tabu, oli pris* blong mi.

42“Mo bambae ol man ya oli mas somap ol bigfala kalsong blong olgeta tu. Ol kalsong ya bambae oli mas longfala blong blokemgud olgeta.

43Eron wetem ol pikinini blong hem bambae oli pris, mo oltaem, taem oli kam insaed long Haos Tapolen ya blong mit wetem mi, no oli kam klosap long Olta ya we i stap long Rum we i Tabu blong mekem wok blong olgeta, bambae oli mas werem ol kalsong ya. Sipos no, bambae oli ded. Hemia i wan rul we bambae i stap olwe, mo Eron wetem ol pikinini blong hem mo olgeta we bambae oli kamaot biaen long hem bambae oli mas holem olwe, gogo i no save finis.”