Esta 2 - Bislama Bible Revised 2012

Esta i kam kwin

1Nao biaen, longtaem lelebet, taem King Sekses i no moa kros, hem i tingbaot samting ya bakegen we Kwin Vasti i bin mekem long hem, mo niufala loa ya blong hem we i bin talemaot agens long hem.

2Nao from samting ya, sam long ol advaesa blong hem we oli stap klosap long hem oltaem, oli kam talem long hem se, “King. I gud yu sanem ol man blong yu oli go lukaot sam yang gel we oli naes, mo we oli no save man yet.

3Yu save putumap sam haeman long evri provins, long olgeta kantri we yu yu stap rul long hem, nao yu save talem long olgeta blong oli faenem ol yang gel olsem, oli tekem olgeta i kam long taon ya Susa, blong oli kam stap long haos, blong oli kam woman blong yu. Nao bambae yu putum olgeta long han blong Hegae, man ya blong wok blong yu we i stap lukaot long ol narafala gel ya long haos blong yu. Hem bambae i stap lukaot long olgeta, mo bambae i stap givim ol gudfala oel long olgeta we i blong ravem long bodi blong olgeta blong mekem olgeta oli naes moa.

4Nao biaen, sipos yu luk wan long olgeta we yu laekem hem tumas, bambae yu save putumap hem i kam kwin, blong tekem ples blong Kwin Vasti.”

Nao king i harem se tok ya i gud tumas, mo hem i mekem olsem.

5Nao i gat wan laen blong Isrel long taon ya Susa, we nem blong hem Modekae. Hem i pikinini blong Jaere, we i kamaot biaen long Simei, we hem i kamaot biaen long Kis we i wan laen blong Benjamin bifo.

62 King 24.10-16; 2 Kron 36.10Fastaem, taem we King Nebukadnesa blong Babilon i kam mekem faet long King Jehoeakin blong Juda long Jerusalem, nao i winim hem, mo i tekem hem wetem ol man blong hem oli go wok slef* long ples blong hem, be wan olfala blong Modekae ya i wan long olgeta.

7Nao Modekae i gat wan sista blong hem we nem blong hem Esta, we long lanwis blong ol laen blong Isrel, nem blong hem Hadasa. Mo hem i wan gudfala gel we i naes we i naes. Mo taem papa mo mama blong gel ya tufala i ded, Modekae i adoptem hem.

8Nao ol man blong king oli talemaot tok ya blong hem olbaot long olgeta kantri we hem i stap rul long hem, nao oli stap tekem plante gel i kam long taon ya Susa, oli putum olgeta long ples blong king. Mo oli tekem Esta tu i go wetem olgeta. Long ples ya, man ya Hegae we i stap lukaot long haos blong ol gel, hem i stap lukaot long olgeta.

9Nao man ya i laekem Esta tumas, we olgeta tingting blong hem i stap long hem. Mo kwiktaem nomo, hem i tekem ol gudfala oel i kam, i givim long hem blong i stap ravem long bodi blong hem, mo i stap givim ol spesel kakae long hem. Nao i putum hem long wan nambawan rum insaed long haos ya blong ol gel, mo i jusumaot seven gel long haos blong king, blong oli stap wok blong hem.

10Nao Esta i no talemaot we hem i wan laen blong Isrel, from we Modekae i toktok long hem finis blong i no talemaot.

11Be evri dei nomo, Modekae i stap wokbaot i go i kam long fran blong yad blong haos ya, blong luk se Esta i stap gud no olsem wanem, mo blong faenemaot ol samting we i stap hapen long hem.

12Nao long wan fulyia, ol gel ya oli stap gohed blong wokem ol fasin ya blong mekem bodi blong olgeta i naes. Long sikis manis, oli stap putum oel we oli miksimap wetem gudfala senta ya mir,* mo long sikis manis bakegen, oli stap putum oel we oli miksimap wetem gudfala senta ya balsam.* Nao biaen, man ya i stap tekem ol gel ya wanwan oli go stap wetem king.

13Taem wan gel i rere blong i aot long haos blong olgeta blong go stap wetem king, hem i save werem ol nambawan klos we hem i luk se i gud.

14Nao hem i go stap wetem king long naet, mo long moning, oli tekem hem i go stap wetem ol narafala woman blong king long haos ya blong olgeta, we man ya Sahasgas i stap lukaot long hem. Sahasgas ya, hem i wan man blong wok blong king, we i stap lukaot long ol narafala woman ya blong king. Nao biaen, gel ya i no moa save go luk king bakegen. Be sipos king i laekem gel ya tumas, hem i save talem nem blong hem, nao oli save tekem hem i kam luk hem bakegen.

15-18Nao long namba seven yia we King Sekses i stap rul, long manis ya Tebet* we i namba ten manis long kalenda blong olgeta, i taem blong oli tekem gel ya Esta blong i go stap wetem king. Gel ya i naes we i naes, ol man we oli luk hem oli laekem hem tumas. Nao long taem ya, hem i putum ol klos ya nomo we Hegae, man ya we i stap lukaot long haos blong ol gel i talem long hem blong i putum. Nao hem i go luk king, mo taem king i luk hem, hem i laekem hem tumas, we olgeta tingting blong hem i go long hem nomo, i winim ol narafala gel ya. Nao hem i putum hat blong kwin long hed blong hem, mo i putumap hem i kam kwin, i tekem ples blong Kwin Vasti. Nao long taem ya, king i mekem wan bigfala lafet blong ona long woman ya blong hem, Kwin Esta, mo hem i singaot ol minista blong hem wetem ol narafala haeman blong hem oli kam long lafet ya. Mo long taem ya, hem i stap givimaot ol gudgudfala presen i go long ol man, olsem we i stret blong king i givim, mo i talemaot se ol man blong olgeta kantri ya we hem i stap rul long hem, bambae oli gat holede.

Esta ya, hem i dota blong wan olfala, we nem blong hem Abihael, we i lus finis, nao Modekae we i wan pikinini blong Abihael ya hem i adoptem hem.

Modekae i sevem laef blong King Sekses

19Nao long seken taem we oli tekem ol gel ya oli kam wanples bakegen, king ya i putumap Modekae i kam wan minista blong hem, we i gat ofis blong hem long doa* blong bigfala stonwol blong yad blong haos blong king.

20Be Esta i no talemaot nating we hem i wan laen* blong Isrel,* from we i stap holem tok ya blong Modekae yet, we i talem se bambae hem i no talemaot long wan man. Hem i stap obei long Modekae stret olsem we i stap obei long hem bifo, long taem ya we hem i smol gel yet, mo i stap long han blong hem.

21Long taem ya we Modekae i stap wok long ofis blong hem, i gat tu man blong wok blong king i stap we nem blong tufala, Bigtana mo Teres. Tufala i stap gad long doa blong haos blong king, be tufala i kros long king, nao tufala i stap mekem plan blong kilim hem i ded.

22Be taem Modekae i save samting ya, hem i go talem long Kwin Esta, nao kwin i go talemaot long king.

23Nao taem ol man blong king oli lukluk long bisnes ya, oli faenemaot se samting ya i tru. Nao oli holem tufala ya, oli tekem tufala i go long ples blong kilim man, mo oli hangem tufala i ded. Nao king i talem long olgeta blong oli raetemdaon ripot blong samting ya. Mo long fes blong hem olgeta oli raetemdaon long buk* blong ol ripot blong ol samting we i stap hapen long ol kantri ya we hem i stap rul long hem.