Aesea 39 - Bislama Bible Revised 2012

Sam man Babilonia oli kam long Jerusalem(2 King 20.12-19)

1Nao long taem ya, king blong Babilonia, King Merodak Baladan, we i pikinini blong King Baladan, hem i harem we King Hesekia i bin sik, mo i kam oraet bakegen, nao i sanem ol man blong hem oli karem wan leta wetem wan presen i kam long hem.

2Nao King Hesekia i glad tumas blong luk ol man ya, mo i soemaot long olgeta, ol gudgudfala samting we hem i gat. Hem i tekem olgeta oli go luk ol silva mo ol gol blong hem, mo ol lif blong putum long kakae blong mekem i tes gud, mo ol gudfala senta, mo olgeta samting blong faet blong hem. Olgeta oli luk olgeta samting we hem i putumgud olgeta oli stap long haos blong hem, mo oli luk olgeta samting tu long evri ples olbaot long kingdom blong hem, gogo i no moa gat wan samting nating i stap we hem i no soemaot long olgeta.

3Nao biaen, Profet Aesea i kam luk hem, i askem long hem se, “King. ?Ol man ya oli kam wea? ?Oli talem wanem long yu?”

Mo king i talem se, “O, yu no wari. Olgeta oli kam long Babilonia ya. Ples blong olgeta i longwe tumas long yumi.”

4Nao profet i askem bakegen se, “?Be oli stap lukluk wanem insaed long haos blong yu?”

Mo hem i talem se, “Oli luk evri samting. I no gat wan samting nating i stap we mi no soemaot long olgeta.”

5Nao profet i talem long hem se, “!Oraet, yu harem tok blong Hae God! Hem i gat olgeta paoa, mo hem i talem se,

6‘Hesekia. I gat taem i stap kam we bambae evri samting insaed long haos blong yu, wetem olgeta samting we ol bubu blong yu bifo oli putumgud i stap kam kasem tede, bambae ol man Babilonia oli kam karemaot evriwan i go long ples blong olgeta. Bambae i no gat wan samting nating i stap.

7Dan 1.1-7; 2 King 24.10-16; 2 Kron 36.10Bambae oli karemaot sam long ol pikinini we bambae oli kamaot biaen long yu, oli go longwe, mo bambae oli mekem natamap* long olgeta, blong oli go wok insaed long haos blong king blong olgeta.’ ”

8Be King i luk we tok ya i min se oltaem long laef blong hem, bambae hem i stap gud nomo, nao hem i talem se, “Tok ya we Hae God i givim long yu, hem i gud nomo.”