Sam 73 - Bislama Bible Revised 2012

BUK TRI(Sam 73—89)God i stap mekem ol stret fasin(Sing ya, Asaf i wokem.)(Tok i go long ol man.)

1Tru,

God i gud tumas long yumi ol laen* blong Isrel,*

we tingting blong yumi i klin gud.

2Be mi,

klosap tingting blong mi

i no moa stap long hem,

bilif blong mi klosap i lus,

3from we taem mi luk ol man nogud ya

we ol samting long laef blong olgeta

oli stap ron gud nomo,

mo oli stap praod from,

mi mi jalus long olgeta.

4Olgeta ya oli no stap harem nogud

long bodi blong olgeta,

oli no stap sik,

bodi blong olgeta i strong olwe nomo.

5Oli no stap harem nogud

olsem ol narafala man,

oli no stap kasem trabol

olsem we olgeta ya oli stap kasem.

6Olgeta oli stap praod tumas from,

mo fasin ya blong praod blong olgeta

i olsem jen we oli stap hangem long nek blong olgeta,

mo fasin blong olgeta blong faet

i olsem klos blong olgeta.

7Oltaem ol rabis samting i stap kamaot

long tingting blong olgeta,

mo oltaem maen blong olgeta

i fulap long ol rabis plan.

8Oli stap laf long ol narafala man,

mo oli stap tokbaot ol samting nogud.

Oli praod tumas,

mo oli stap mekem plan blong mekem i nogud

long ol narafala man.

9God i stap long heven,

be oli stap tok nogud long hem,

mo oli stap mekem flas blong olgeta,

se oli bos long ol man long wol.

10Nao ol man blong God tu

oli stap folem olgeta,

mo oli bilif tumas long olgeta samting ya

we ol man ya oli stap talem.

11Ol man nogud ya oli talem se,

“!God i hae we i hae,

be hem bambae i no save samting ya!

!Hem i no save faenemaot ya!”

12Hemia nao fasin blong olgeta.

Olgeta oli gat plante samting,

mo oltaem oli stap tekem plante samting moa.

(Tok i go long God.)

13-15God.

Maet i gat man i save tok kros long yu,

i talem se, “!Yu luk!

Mi mi stap holem tingting blong mi i klin,

mi no stap mekem sin,

be hemia i blong nating nomo.

Oltaem yu yu stap mekem mi mi harem nogud,

i stat long moning, gogo i kasem long sapa.

Evri moning, yu yu stap panisim mi.”

Be sipos mi mi stap tok olsem,

hemia i min se mi mi no man blong yu.

16Mi traem tingting long ol samting ya,

be i had tumas long mi,

17gogo kasem we mi go insaed long haos* blong yu,

nao mi jes luksave ol samting

we bambae i kasem ol man nogud ya.

18Bambae yu yu putum olgeta

long ol ples we i glis,

bambae yu mekem olgeta oli foldaon,

oli kam nogud olgeta.

19Bambae yu spolem olgeta kwiktaem nomo,

bambae oli godaon long ples we i nogud olgeta.

20Masta,

bambae olgeta oli olsem drim,

we long moning i lus.

Taem yu yu girap,

olgeta ya bambae oli lus wantaem nomo.

21Taem we oli spolem tingting blong mi,

mo oli mekem mi mi harem nogud tumas,

22mi mi krangke, mi olsem anamol nomo,

i strong blong mi save tingting blong yu.

23Be oltaem mi mi stap klosap long yu,

mo yu stap holem mi long han blong mi.

24Yu yu stap lidim mi

long ol toktok blong yu,

mo biaen, bambae yu ona long mi,

yu tekem mi mi go stap wetem yu.

25God,

i no gat wan samting long heven

we mi mi save putum tingting blong mi i stap long hem,

yu nomo.

!Mo from we yu yu God blong mi,

i no moa gat wan samting long graon ya tu

we mi save putum tingting blong mi i stap long hem!

26Tingting blong mi

mo bodi blong mi i save kam slak,

be yu yu paoa blong mi,

yu nomo we mi mi wantem

oltaem long laef blong mi.

27-28Hae God, yu yu God blong mi,

mo yu yu Masta* blong mi.

Ol man we oli lego yu,

mi mi savegud se bambae oli lus.

Olgeta ya we oli no moa holem promes

we oli mekem wetem yu,

yu bambae yu spolem olgeta.

Taem we mi mi kam stap klosap long yu,

mi harem se i gud tumas long mi.

Yu yu sefples blong mi,

yu yu stap blokem mi,

mo oltaem

bambae mi mi stap talemaot

olgeta samting we yu yu mekem.