Aesea 25 - Bislama Bible Revised 2012

Sing blong presem Hae God

1Nao Profet Aesea i prea, i talem se,

“Hae God.

Yu yu God blong mi.

Oltaem bambae mi presem yu,

mi stap leftemap nem blong yu.

Yu yu stap mekem ol samting,

we taem man i luk,

i sapraes tumas from.

Longtaem we longtaem finis,

yu yu mekem ol plan blong yu,

mo yu mekem tingting blong yu

i stap strong long olgeta,

gogo yu mekem olgeta oli kamtru.

2Ol bigbigfala taon,

be yu yu mekem olgeta oli brobrok,

oli kam nogud olgeta.

Ol bigfala stonwol blong olgeta

we i blong blokem ol enemi blong olgeta,

be yu yu brekemdaon evriwan.

Ol haos blong king blong ol enemi blong mifala,

oli lus evriwan finis,

mo neva bambae taon ya blong olgeta

i save stanap bakegen.

3Nao from ol samting ya,

ol man blong ol kantri ya we oli gat paoa,

bambae oli presem yu.

Ol man blong ol bigbigfala taon ya

we fasin blong olgeta i strong tumas,

bambae oli fraet long yu,

oli ona gud long yu.

4Oltaem ol puaman

wetem ol man we oli no gat paoa

oli stap ronwe blong kam haed long yu,

mo sipos oli trabol,

bambae oli save stap gud long yu.

Mo sipos i gat badtaem,

be yu yu save blokemgud olgeta,

mo sipos i gat bigsan,

be yu yu save givim sed long olgeta.

Ol enemi blong mifala oli no gat sore,

mo oli stap kam mekem faet long mifala,

olsem win mo ren long koltaem,

5no olsem draetaem long draeples.

Be yu yu satem maot blong olgeta,

yu blokem olgeta blong oli no moa singaot,

olsem we klaod i blokem san,

i mekem ples i no moa hot.”

Hae God i stap mekemrere wan bigfala lafet

6Nao Profet Aesea i talem long ol man blong hem se, “Olgeta. Hae God i gat olgeta paoa, mo long tabu hil ya Saeon,* hem bambae i mekemrere wan bigfala lafet blong yumi, we bambae i singaot ol man blong ol narafala kantri long wol blong oli kam joen. Long lafet ya, bambae yumi kakae ol nambawan kakae, mo yumi dring ol waen we i beswan.

7Naoia, yufala wetem ol narafala man ya, yufala evriwan i stap harem nogud, yufala i stap krae, be long lafet ya, wantaem nomo, bambae hem i tekemaot ol samting ya, nao bambae yufala i no moa harem nogud, bambae yufala i glad.

81 Kor 15.54; Rev 7.17; 21.4Hae God i Masta* blong yumi, mo long taem ya, hem bambae i mekem we ded bambae i go lus olgeta. Bambae hem i ravemaot wota blong ae blong yufala, mo bambae i tekemaot sem we yufala evriwan i stap kasem. Hem i Hae God, mo hemia tok blong hem.

9“Taem ol samting ya oli kamtru, ol man bambae oli talem se, ‘!Hae God i God blong yumi! Yumi stap trastem hem, mo hem i sevem yumi. Oltaem yumi stap trastem hem, mo yumi save harem gud, yumi save glad, from we hem i sevem yumi.’ ”

Hae God bambae i panisim ol man Moab

10 Aes 15.1—16.14; Jer 48.1-47; Esik 25.8-11; Amos 2.1-3; Sef 2.8-11 Bakegen, Profet Aesea i talem long ol man blong hem se, “Olgeta. Hae God bambae i blokemgud tabu hil ya Saeon,* i lukaot gud long hem. Mo bambae hem i flatemdaon ol man Moab, olsem we buluk i purumbut long gras, i flatemdaon olbaot, gogo i paspas wetem sitsit blong hem.

11Bambae olgeta oli stap sakem han blong olgeta, olsem we man i stap traehad blong swim blong goso, be hem bambae i tekemaot praod blong olgeta, i mekem olgeta oli sem, nao han blong olgeta bambae i slak, oli no moa save mekem wan samting.

12Ol taon blong olgeta oli gat ol bigbigfala stonwol we oli hae we i hae i goraon long olgeta, we oli save go haed insaed long olgeta long taem blong faet, be hem bambae i brekemdaon ol stonwol ya, we bambae oli foldaon olgeta kasem graon.”