Eksodas 37 - Bislama Bible Revised 2012

Bejalehel i wokem Bokis ya we i Saen blong Promes blong Hae God(Eksodas 25.10-22)

1Nao Bejalehel i tekem wud ya kasis,* i wokem Bokis ya we i Saen blong Promes* blong Hae God. Longfala blong Bokis ya i kasem wan handred fiftin sentemeta, mo bigfala blong hem i kasem klosap seventi sentemeta mo hae blong hem tu i kasem klosap seventi sentemeta.

2Long insaed blong hem mo long afsaed blong hem, hem i blokem ol wud blong hem long gol we i klin gud, i beswan, mo i wokem wan smol strap tu long gol, i goraon long hem bakegen long saed blong hem antap blong flasem.

3Mo hem i wokem fo ring blong hem long gol, mo hem i hangem ol fo ring ya long ol fo leg blong Bokis ya, tu long wan saed, tu long wan saed.

4Mo hem i wokem tu stik blong karem long wud ya kasis, mo i blokem tufala long gol,

5nao i pusum tufala i gotru long ol fo ring ya, wan long wan saed, wan long wan saed.

6Lid blong Bokis ya we i Ples we Hae God i stap Tekemaot Sin blong ol man blong hem, hem i wokem long gol we i klin gud, i beswan. Longfala blong hem i kasem wan handred fiftin sentemeta, mo bigfala blong hem i kasem klosap seventi sentemeta.

7-8Hem i hamarem gol long tufala en blong Lid ya, blong wokem tu pija blong jerubim* long hem we tufala i stanap, wan long wan en, wan long nara en, we tufala i haf blong Lid ya nomo.

9Hem i mekem we tufala pija ya i stap lukluk i go long tufala, mo we tufala i pusum wing blong tufala i kam long tufala, nao wing blong tufala i kavremap Bokis ya antap.

Bejalehel i wokem Tebol blong Bred(Eksodas 25.23-30)

10Nao Bejalehel i wokem Tebol blong Bred tu long wud ya kasis.* Longfala blong hem i kasem ova long naenti sentemeta, mo bigfala blong hem i kasem klosap fifti sentemeta, mo hae blong hem i kasem klosap seventi sentemeta.

11Hem i blokem ol wud blong hem long gol we i klin gud, i beswan, mo i wokem wan smol strap i goraon long hem bakegen long saed blong hem antap blong flasem.

12Long top blong Tebol ya, hem i wokem wan rel i goraon long hem blong holem ol bred, we hae blong rel ya i kasem ova long seven sentemeta. Mo hem i wokem wan narafala smol strap tu long gol i goraon long rel ya blong flasem.

13Hem i wokem fo ring blong Tebol ya long gol, mo i hangem olgeta long ol fo kona blong hem, klosap long ol leg blong hem,

14-15long saed blong hem antap, klosap long rel ya we i blong holem bred. Mo hem i wokem tu stik blong karem Tebol ya long wud ya kasis, mo i blokem tufala tu long gol. Nao hem i pusum tufala i gotru long ol ring ya, wan long wan saed, wan long wan saed.

16Mo hem i wokem olgeta samting blong yusum long Tebol ya long gol we i klin gud, i beswan. Hemia ol plet mo besin blong hem, wetem ol kap mo botel blong hem, we oli blong yusum blong kafsaedem waen blong givim i go long Hae God.

Bejalehel i wokem Ples blong Putum Laet(Eksodas 25.31-40)

17-24Nao Bejalehel i wokem Ples blong Putum Laet we i gat ples blong putum seven laet long hem, mo blong wokem samting ya wetem ol seven laet blong hem, mo ol narafala samting blong hem, hem i tekem toti faef kilo gol we i klin gud, i beswan. Ples ya blong Putum Laet, hem i hamarem wan pis gol nomo blong wokem stamba blong hem wetem stik blong hem, mo ol han blong hem, mo ol pija blong flaoa wetem ol haf blong ol flaoa ya we oli blong flasem. Stik blong samting ya i gat sikis han blong hem, we oli kamaot tutu long hem, tri long wan saed, tri long wan saed, mo stik ya i gat fo pija blong flaoa blong tri ya amon,* wetem olgeta haf blong flaoa ya, blong flasem. Long stik ya, aninit long trifala ples we tufala han i kamaot, i gat pija blong stamba blong flaoa ya, mo ol han ya wanwan oli gat tri pija blong flaoa ya wetem ol haf blong hem, blong flasem olgeta. Evri haf blong samting ya, i stat long stamba blong hem, i go kasem ol han blong hem mo ol haf blong flaoa ya we i blong flasem, be hem i hamarem long wan pis gol nomo. Mo hem i yusum haf gol ya we i stap blong wokem ol seven laet ya, mo blong wokem ol pinses mo ol plet we ol pris* bambae oli yusum blong lukaot long ol laet ya.

Bejalehel i wokem Olta blong Bonem Insens(Eksodas 30.1-5)

25Nao Bejalehel i tekem wud ya kasis* bakegen, i wokem Olta* blong Bonem Insens long hem. Olta ya i skwea, we bigfala blong hem i kasem klosap fifti sentemeta, mo hae blong hem i kasem ova long naenti sentemeta. Antap long ol fo kona blong Olta ya, i gat samting olsem hon* blong buluk, we oli haf blong Olta ya nomo.

26Nao hem i blokem top blong Olta ya wetem ol fo saed blong hem mo ol fo hon ya blong hem we i stap long ol kona blong hem long gol ya we i klin gud i beswan, mo i wokem wan strap long gol i goraon long hem.

27Mo hem i wokem tu ring long gol, i hangem tufala wanwan long tu saed blong hem, aninit long strap ya we i goraon long hem. Tufala ring ya i blong holem tu stik blong karem Olta ya.

28Mo hem i wokem tufala stik ya blong karem Olta long wud ya kasis, mo i blokem tufala tu long gol.

Bejalehel i wokem tabu oel mo insens(Eksodas 30.22-38)

29 Eks 30.22-38 Nao hem i wokem tabu oel ya we i blong makemaot ol samting we i blong Hae God, mo i wokem insens* ya we i klin gud, i gat gudfala smel blong hem. Tufala samting ya, hem i wokem tufala long fasin ya we oli stap folem blong miksim ol samting blong wokem senta.