Sam 27 - Bislama Bible Revised 2012

Sing blong presem Hae God(Sing ya, Deved i wokem.)(Tok i go long ol man.)

1Hae God, hem i laet blong mi,

mo hem i stap sevem mi.

Mi bambae mi no save fraet long man.

Hae God i strong ples blong haed blong mi.

Bambae mi no save fraet.

2Ol enemi blong mi mo ol badfren blong mi

oli man nogud,

nao taem oli kam blong faet long mi,

mo blong traem kilim mi,

olgeta oli stambol, oli foldaon.

3Nating sipos wan bigfala grup blong ol soldia

oli kam hivap raon long mi,

be bambae mi no save fraet.

Nating sipos ol enemi blong mi

oli kam faet long mi,

be bambae mi trastem God yet.

4Mi mi askem wan samting long Hae God,

wan samting nomo we mi mi wantem.

Mi wantem tumas blong mi save stap

long haos* blong hem

oltaem long laef blong mi,

blong mi stap lukluk ol gudgudfala fasin blong hem,

mi stap tingting gud long olgeta,

mo blong mi save askem long hem

blong i lidim mi oltaem.

5Long taem blong trabol

hem bambae i lukaot gud long mi.

Bambae hem i haedem mi

insaed long Haos Tapolen blong hem.

Bambae hem i mekem mi mi stap gud

olsem we mi stap antap long wan bigfala ston

we i hae we i hae.

6Nao bambae mi winim ol enemi blong mi

we oli stap raon long mi.

Mo bambae mi go long Haos Tapolen blong Hae God,

mi mekem sakrefaes long hem

we mi mi glad tumas,

mi stap singsingaot bigwan from.

Bambae mi singsing,

mi presem hem.

(Tok i go long Hae God.)

7Hae God.

Plis yu lesin long mi

taem mi singaot i kam long yu.

Plis yu sore long mi, yu ansa long mi.

8Hae God, sipos yu talem se,

“Yu kam,

yu mekem wosip long mi,”

bambae mi mi glad, mi kam.

9Plis yu no haedem fes blong yu long mi.

Mi mi man blong wok blong yu

we oltaem yu stap halpem mi.

Plis yu no kros long mi,

yu no pusumaot mi

blong mi gowe long yu.

God, oltaem yu yu stap sevem mi,

plis yu no lego mi.

10Hae God.

Papa mo mama blong mi,

maet tufala i save lego mi,

be yu, oltaem nomo

bambae yu stap lukaot gud long mi.

11Hae God,

plis yu tijim mi long ol fasin blong yu.

Plis yu lidim mi mi go long rod

we i sef,

from we ol enemi blong mi oli plante tumas.

12Plis yu no livim mi mi stap

long han blong ol enemi blong mi.

Olgeta oli stap kam faet long mi

long ol giaman toktok,

mo ol strong tok blong mekem mi mi fraet.

(Tok i go long ol man.)

13Mi mi savegud

we bambae mi stap gogo mi luk

we Hae God bambae i mekem i gud tumas long mi

long laef ya we yumi stap long hem naoia.

14Yumi mas trastem Hae God,

mo yumi mas bilif long hem.

Yumi no mas letem tingting blong yumi i foldaon,

oltaem yumi mas trastem hem.