Prija 4 - Bislama Bible Revised 2012

1“Nao mi lukluk bakegen long ol fasin nogud we i stap gohed long wol ya, we ol man we oli gat paoa oli stap mekem i strong tumas long ol narafala man. Oli stap spolem olgeta, mo oli stap mekem olgeta oli harem nogud, we oli stap krae from, be i no gat man i save givhan long olgeta. Ol man raonabaot oli stap talem se, ‘No, mifala i no save mekem wan samting blong givhan long yufala, from we ol man ya oli strong tumas.’

2Nao mi luk se olgeta we oli ded finis oli laki, oli stap gud, i winim olgeta we oli stap laef yet.

3Be ol man we oli no bon yet oli laki moa, i winim olgeta we oli ded finis, wetem olgeta we oli stap laef, from we oli no luk ol fasin nogud blong ol man ya we oli stap spolem ol narafala man long wol ya.

Ol hadwok blong yumi i blong nating nomo

4“Mo mi luk tu, stamba blong fasin ya we ol man oli stap wok strong blong kasem plante samting. Oli stap wok strong olsem from we oli jalus tumas long ol narafala man we oli stap raonabaot long olgeta, oli wantem tumas blong winim olgeta. Be fasin ya tu i blong nating nomo. Hemia i olsem we man i stap resis olbaot nomo.

5Oli stap talem se fasin ya we man i no wantem wok, i wantem stap nomo olsem, hemia i krangke, bambae man olsem i hanggri gogo i ded.

6Maet tok ya blong olgeta i tru lelebet, be mi mi luk se i nomata we yumi no gat plante samting, be sipos tingting blong yumi i stap gud, yumi no wari, hemia i winim fasin ya we yumi stap hadwok tumas oltaem, be yumi no winim wan samting nating. Fasin ya i olsem we yumi stap resis olbaot nomo.

7“Mo long laef ya, mi mi luk wan narafala samting tu we i krangke.

8Samtaem i gat man we i no gat brata blong hem, mo i no gat pikinini blong hem tu, hem wan nomo i stap, be i stap wok strong oltaem nomo. Nating we hem i gat plante samting, be neva hem i save talem se i naf, oltaem i stap wantem moa. Neva hem i save spel blong harem gud lelebet long ol samting ya we hem i gat. ?Be ol samting ya bambae i blong hu? Fasin ya i blong nating nomo, mo i wan fasin we i stap mekem man i harem nogud oltaem nomo.

9“Fasin ya we tu man i stap joen wanples blong mekem wan wok, hem i moa gud, i winim we wan man nomo i stap wok, from we wok i save gohed gud moa.

10Sipos wan long tufala i foldaon, narawan i save givhan long hem blong i girap bakegen. Be sipos wan man we i stap hem wan nomo, taem hem i foldaon, i nogud olgeta, from we i no gat man blong givhan long hem.

11Long koltaem, sipos tu man i slip wanples, bambae tufala i save stap wom, be wan man nomo i no save stap wom olsem.

12Plante taem, wan enemi i save kam we wan man nomo i no save winim, be tu man i save joen blong winim hem. Mo rop ya we oli tantanem tri rop i go wanples, hem i no save brok kwik.

Nem ya king i blong nating nomo

13“Sipos king i kam olfala tumas, nao i no moa save harem ol waestok we ol man blong hem oli stap givim long hem, bambae i moa gud oli tekem wan yang boe we i gat hed, oli putumap hem i kam king.

14Nating we fastaem, yang boe ya i stap long kalabus, no i puaman we i no gat nem nating, be bambae i moa gud, i winim olfala king ya.

15Mo mi luk we olgeta man olbaot long kantri olsem bambae oli glad moa long yang boe ya we i tekem ples blong olfala king.

16Mo nating we king i stap rul long hamas man, be sipos hem i ded, bambae i no gat wan long ol man blong hem, we bambae i stap glad long ol samting ya we hem i mekem. Hae nem ya king i blong nating nomo. I olsem we man i stap resis olbaot nomo.