Esikel 41 - Bislama Bible Revised 2012

1-2Nao man ya i tekem mi, mitufala i go insaed long Rum we i Tabu, we hemia rum ya long medel olgeta. Doa blong hem i stap stret long medel, mo hem i makem doa ya, mo bigfala blong hem i kasem faef meta, mo tik blong wol i kasem tri meta. Mo hem i makem rum ya insaed, mo bigfala blong hem i kasem ten meta, mo longfala blong hem i kasem twanti meta.

3Nao man ya i go insaed long rum ya we i insaed olgeta. Doa blong hem tu i stap stret long medel, mo hem i makem doa ya, mo bigfala blong hem i kasem tri meta, mo tik blong wol i kasem wan meta.

4Nao hem i makem rum ya we i insaed olgeta. Rum ya i skwea, we ol fo saed blong hem wanwan i kasem ten meta. Rum ya i stap biaen long Rum we i Tabu, mo hem i talem se, “Hemia Rum ya we i Tabu we i Tabu.”

Ol rum long saed blong ol wol blong haos blong Hae God

5-6Nao man ya i makem tik blong ol wol insaed long haos* blong Hae God, mo tik blong hem i kasem tri meta. Mo long afsaed blong ol wol blong haos ya, i gat narafala haf blong haos ya bakegen we i joen long wol ya, mo i gat tri stori blong hem. Long olgeta stori ya wanwan, i gat toti smosmol rum, we bigfala blong olgeta wanwan i kasem tu meta. Afsaed blong haos ya, ol wol blong hem long stori ya daon i tik, mo long seken stori i kam tin lelebet, mo long las stori antap i kam tin moa. Long fasin ya, i gat ples long wol, we ol floa blong tufala stori ya antap i save slip gud long hem, we oli no go insaed long wol.

7Mo from samting ya, ol rum long stori daon oli smol, mo ol rum long stori long medel oli bigwan lelebet, mo ol rum long stori antap oli bigwan moa. Nao sipos man i stap afsaed, i luk wol blong haos ya, bambae hem i ting se tik blong hem i sem mak nomo, i stat long botom kasem antap. Afsaed long ol rum ya, i gat ol step i go antap long trifala stori ya, blong man i save wokbaot i go antap long hem.

8-11Afsaed blong ol rum ya, tik blong wol blong olgeta i kasem tu meta haf, mo i gat doa i go insaed long ol rum ya long saed i go long not blong haos ya, mo doa i go insaed long ol rum ya long saed i go long saot. Mo mi luk we i gat wan floa i goraon afsaed long haos ya, we oli wokem long ston we man i save wokbaot long hem. Hae blong floa ya i kasem tri meta, mo i level gud wetem fandesen blong ol rum ya we oli joen long wol blong haos ya. Floa ya, bigfala blong hem i kasem tu meta haf. Nao long medel blong tufala haos blong ol pris* mo floa ya we i goraon long haos blong Hae God, i gat wan yad bakegen i goraon long haos ya, we bigfala blong hem i kasem ten meta.

Bigfala haos we i stap long saed i go long wes

12Long haos* blong Hae God, long en blong yad blong hem long saed i go long wes, i gat wan haos we longfala blong hem i kasem foti faef meta mo bigfala blong hem i kasem toti faef meta. Mo ol wol blong hem, tik blong olgeta wanwan i kasem tu meta haf.

Ol mak blong haos blong Hae God mo yad blong hem

13Nao man ya i makem afsaed blong haos* ya blong Hae God, mo longfala blong hem i kasem fifti meta. Mo i stat long baksaed blong haos ya i gokros long yad ya, i go kasem baksaed blong narafala haos ya long saed i go long wes, mo hem tu i kasem fifti meta.

14Mo i makem fran blong haos ya blong Hae God wetem yad ya long tufala saed blong hem, mo hem tu i kasem fifti meta.

15Mo i makem longfala blong haos ya we i stap long saed i go long wes wetem wol long tufala saed blong hem, mo hem tu i kasem fifti meta.

Ol samting blong haos blong Hae God

Rum ya blong go insaed long haos* blong Hae God, mo Rum we i Tabu, mo Rum ya we i Tabu we i Tabu,

16oli blokem ol wol blong olgeta long ol plang, i stat long floa, i go antap kasem ol windo. Mo ol windo ya tu, oli wokem ol sata blong hem long plang, blong oli save blokem.

17Mo insaed long haos ya, ol wol blong hem, i stat long botom i go bitim doa i go antap, oli kavremap evriwan

18long ol pija blong ol pamtri* mo ol jerubim* we oli katem. Oli katem pija blong pamtri, finis oli katem pija blong jerubim, finis pamtri bakegen, finis jerubim bakegen, gogo oli finisimgud ol wol blong ol rum ya. Ol jerubim ya wanwan oli gat tu fes,

19we wan i fes blong man we i lukluk i go long pamtri narasaed, mo narawan i fes blong laeon we i lukluk i go long narafala pamtri narasaed. Ol pija ya oli goraon long ol wol,

20i stat long floa, i go bitim ol doa i go antap.

21Mo ol pos blong doa blong Rum ya we i Tabu oli skwea.

Olta we oli wokem long wud

Nao long fran blong doa blong Rum ya we i Tabu we i Tabu, i gat wan samting we mi luk olsem

22wan olta we oli wokem long wud. Hae blong hem i kasem wan meta haf, mo bigfala blong hem i kasem wan meta. Ol kona blong hem mo stamba blong hem wetem ol saed blong hem, oli wokem olgeta long wud. Nao man ya i talem long mi se, “Tebol ya, hem i stanap long fes blong Hae God.”

Ol doa blong haos blong Hae God

23Nao i gat wan doa long en blong rod ya we i go long Rum we i Tabu, mo narawan long en blong rod we i go insaed long Rum ya we i Tabu we i Tabu.

24Tufala doa ya wanwan, tufala i gat tu dabol doa we i open long medel, we wan saed i gat tu doa we i gat hinsis long medel, mo wan saed i gat tu doa we i gat hinsis long medel.

25Mo i gat ol pija blong ol pamtri* mo ol jerubim* we oli katem long ol doa blong Rum we i Tabu, olsem olgeta ya we oli katem long ol wol. Mo i gat wan vranda we oli wokem long wud, i stap long doa blong rum ya blong go insaed long haos* blong Hae God.

26Long ol saed blong rum ya, i gat ol windo, mo oli flasem ol wol blong hem long ol pija blong pamtri.