Job 8 - Bislama Bible Revised 2012

Bildad i tok

1Nao Bildad i talem se,

2“?Olsem wanem?

?Tok blong yu i finis nao?

Ol tok ya blong yu i olsem win nomo.

3Neva God i save gowe long stret fasin,

blong mekem samting we i no stret.

Oltaem nomo,

hem i stap mekem ol fasin

we i stret gud.

4!Mi mi talem stret long fes blong yu!

!Ol pikinini ya blong yu

oli mekem sin ya!

Taswe God i givim panis ya long olgeta

we i stret blong oli kasem.

5Hem i gat olgeta paoa.

Mo i gud yu luk long hem,

yu askem long hem

blong i givhan long yu.

6Sipos laef blong yu i klin,

mo ol tok blong yu i tru,

hem bambae i givhan long yu.

Olgeta samting ya we yu yu gat fastaem,

bambae hem i givim jenis blong olgeta long yu.

7Mo taem yu luk ol gudgudfala samting ya

we hem bambae i givim long yu,

ol samting ya we oli lus

bambae oli olsem nating nomo.

8“I gud yu lukluk i gobak

long ol waestok ya blong bifo,

wetem ol trutok ya

we ol bubu blong yumi oli lanem,

yu traem tingbaot olgeta.

9Yumi ya i blong yestedei nomo,

yumi no save wan samting nating.

Laef blong yumi long wol ya

i olsem sado nomo, we i pas i go.

10I gud yu lesin long ol waestok

blong ol bubu ya blong yumi.

Yu mas harem ol samting

we oli talem blong yumi lanem.

11“Longlongfala gras blong

wota i no save gru

long ples we i no gat wota long hem.

Neva yumi save faenem long draeples.

12Mo sipos wota i drae,

bambae hem i faswan blong ded.

Hem i save ded we i sotsotfala yet,

i no naf blong yumi wokem wan

samting long hem.

13Ol man we oli no moa tingbaot God,

oli stap lus kwiktaem nomo,

olsem gras ya.

Mo taem oli no bilif long hem,

ol samting we tingting blong olgeta

i stap strong long hem

oli stap lus long sem fasin.

14Bilif blong ol man olsem i no strong,

i olsem tred nomo,

mo i save brok isi nomo

olsem nes blong spaeda.

15Sipos man i lei long nes blong spaeda,

bambae i no save holem hem.

Mo sipos man i hang long tred nomo,

bambae hem i mas foldaon.

16“Ol man nogud oli stap kam strong kwiktaem,

olsem rabis gras long niufala garen,

we taem san i strong gud,

i kavremap ples kwiktaem nomo.

17Ol rus blong gras ya

oli goraon long ol bigfala ston,

mo oli holemtaetgud olgeta.

18Be sipos man i pulumaot gras ya,

bambae i no gat man

i save luksave ples blong hem.

19Laef blong wol ya nomo i save mekem

ol man nogud oli glad,

be blong smoltaem nomo,

biaen, ol narafala man oli kam,

oli tekem ples blong olgeta.

20“Be God i no save lego olgeta

we tingting blong olgeta i stap long hem,

mo hem i no save givhan long ol man

we fasin blong olgeta i nogud.

21Bambae hem i mekem yu

yu laf bigwan bakegen,

mo bambae yu stap singsingaot

from we yu yu glad.

22Be olgeta we oli no laekem yu

oli agens long yu,

bambae hem i mekem olgeta

oli sem.

Olgeta ya oli man nogud,

mo ol hom blong olgeta

bambae oli lus.”