2 Kronikel 21 - Bislama Bible Revised 2012

1Nao King Jehosafat i ded, mo oli berem* hem long hol we oli katem long ston blong berem ol king long hem, long haf ya blong Jerusalem we nem blong hem “Taon* blong King Deved”. Nao pikinini blong hem Jehoram i tekem ples blong hem, i kam king.

King Jehoram blong Juda(2 King 8.17-24)

2King Jehoram, pikinini blong King Jehosafat blong Juda,* hem i gat sikis brata blong hem, we nem blong olgeta i olsem. I gat Asaria, mo Jehiel, mo Sekaraea, mo Asariahu mo Mikael, mo Sefatia.

3Bifo, papa blong olgeta ya i bin tekem plante gol mo silva wetem ol narafala samting we praes blong olgeta i antap, i givim i go long olgeta. Mo i putum olgeta wanwan long ol taon ya long Juda we oli gat stonwol i goraon long olgeta, blong oli stap lukaot long olgeta. Be hem i talemaot se Jehoram bambae i tekem ples blong hem, from we hem i fasbon.

4Nao taem we King Jehoram ya i stap rul gud long kantri blong hem, hem i kilim olgeta brata ya blong hem, wetem sam haeman tu blong kantri ya oli ded.

5Long taem ya we hem i kam king, hem i gat toti tu yia blong hem, nao hem i rul eit yia long kantri ya, mo hedkwota blong hem i stap long taon ya Jerusalem.*

6Be hem i stap folem ol rabis fasin blong King Ehab wetem ol narafala king ya blong Isrel* bifo, from we hem i tekem wan dota blong King Ehab i woman blong hem. Nao hem i stap mekem sin agens long Hae God,

71 King 11.36be Hae God i bin mekem wan promes* long King Deved bifo, se oltaem nomo, man we bambae i king blong ol laen* blong Isrel, bambae i man we i kamaot biaen long hem, nao from samting ya, Hae God i no glad blong kilim hem i ded.

8 Jen 27.40 Nao long taem we hem i stap rul, ol man Edom oli wantem aot long han blong ol man Juda, nao oli girap, oli kam mekem faet long olgeta, oli winim olgeta, nao oli putumap wan king blong olgeta nomo.

9Nao King Jehoram wetem ol kapten blong hem oli tekem ol kat blong faet blong olgeta, oli go blong mekem faet long ol man Edom ya. Nao long ples ya, ol man Edom oli kam hivap raon long olgeta, be long naet, olgeta oli girap, oli faet long ol man Edom gogo ol man Edom ya oli no moa save blokem olgeta, nao oli aot, oli ronwe.

10Nao i stat long taem ya, ol man Edom oli no moa stap long han blong ol man Juda, mo oli stap olsem kam kasem tede. Mo long sem taem ya, ol man blong taon ya Libnaha tu oli girap, oli kam mekem faet long ol man Juda, oli winim olgeta, nao olgeta ya tu oli aot long han blong olgeta. Ol samting ya oli stap kamtru olsem from we hem i no moa obei long Hae God we i God blong ol bubu blong hem.

11Hem i stap wokem ol ples blong mekem wosip long ol narafala god antap long ol hil olbaot long Juda, mo i stap lidim ol man Jerusalem wetem ol narafala man blong hem oli stap mekem sin agens long Hae God.

12Nao Profet Elaeja i sanem wan leta i kam long king ya we i talem se, “King, Hae God i God blong bubu blong yu King Deved, mo hem i talem se, ‘Papa blong yu, King Jehosafat, mo bubu blong yu King Asa, tufala i stap mekem ol gudfala fasin, be yu yu no folem fasin blong tufala nating.

13Oltaem yu stap folem ol rabis fasin blong ol king blong Isrel, mo yu stap lidim ol man Jerusalem wetem ol narafala man Juda oli lego mi, oli stap go biaen long ol narafala god, olsem we King Ehab mo tu pikinini ya blong hem we tufala i rul biaen long hem oli mekem long ol man Isrel. Mo yu kilim ol brata blong yu tu, we olgeta oli moa gud bitim yu.

14Nao from samting ya, bambae mi mi panisimgud ol man ya blong yu, wetem ol woman blong yu, mo ol pikinini blong yu, mo bambae mi spolem olting blong yu tu we bambae mi spolemgud olgeta.

15Mo bambae mi mekem we yu yu gat wan strong sik long bel blong yu we gat blong yu bambae i soa we i soa, mo we evri dei nomo, bambae i stap kam nogud moa gogo gat blong yu i kamaot.’ ”

16Nao i gat sam man Filistia wetem sam man Arab oli stap klosap long wan ples long solwota, we ol man Itiopia oli stap long hem. Nao Hae God i mekem we olgeta oli girap oli kam blong mekem faet long king ya.

17Oli kam long kantri ya, nao oli kam insaed long haos blong king, oli tekem olting blong hem wetem ol woman blong hem mo ol pikinini blong hem, oli karem olgeta i go long ples blong olgeta. Be lasbon pikinini boe blong hem we nem blong hem Ahasia, hem nomo oli no karem hem i go.

18Nao biaen long ol samting ya, Hae God i mekem we king i gat sik long bel blong hem, we gat blong hem i soa we i soa.

19Mo hem i stap sik bigwan olsem gogo kasem klosap tu yia, nao gat blong hem i kamaot, mo hem i stap harem nogud tumas gogo i ded. Be ol man blong hem oli no mekem bigfala faea blong soemaot we oli ona long hem, olsem we oli bin mekem long ol bubu blong hem.

20Long taem ya we King Jehoram i kam king, hem i gat toti tu yia, mo hem i rul eit yia long Jerusalem. Taem hem i ded, i no gat wan man nating i sore long hem. Oli berem* hem long wan hol long ston long haf ya blong Jerusalem we nem blong hem “Taon* blong King Deved”, be i no long beregraon blong ol king.