Jajes 5 - Bislama Bible Revised 2012

Singsing blong Debora mo Barak

1Long sem dei ya, Debora mo Barak, tufala i wokem wan singsing, nao tufala i sing long hem. Tok blong singsing ya i talem se,

2“!Olgeta!

!Yumi evriwan

i laen* blong Isrel*!

!Oltaem yumi mas presem Hae God!

Taem ol lida blong yumi oli girap,

olgeta oli strong blong mekem faet,

mo yumi evriwan i glad,

yumi obei long olgeta.

3!Ol king!

!Yufala i lesin!

!Ol haeman!

!Yufala i lesin gud!

Bambae mi mi kilim gita,

mi sing long wan singsing.

Hae God i God blong mifala,

mo mi bambae mi presem hem.

(Tok i go long Hae God.)

4-5

6“Long taem blong Samgara,

we papa blong hem Anat,

mo long taem blong Jael,

ol treda oli no moa pastru

long kantri ya blong yumi,

mo ol man blong wokbaot oli stap pasraon long ol smosmol rod nomo.

7Debora.

Long taem ya,

ol vilej blong yumi oli stap nating,

i no moa gat man i stap long olgeta,

gogo yu yu girap,

yu kam olsem mama blong mifala.

8Long taem ya we yumi girap,

yumi jusumaot ol niufala god

blong yumi,

be yumi stap pulum faet nomo

i kam long ples ya blong yumi.

Nating we foti taosen soldia blong

yumi i stap,

be i no gat wan long olgeta

we i stap karem spia blong hem,

mo sil* blong hem,

nao i rere blong faet.

9Oltaem nomo,

tingting blong mi i stap glad

from ol lida ya blong yumi,

mo from ol man ya blong yumi

we oli glad blong obei long olgeta.

!Oltaem yumi mas presem Hae God!

10“Yufala we i stap sidaon

long ol flas dongki ya we i waet,

mo yufala we i stap sidaon

long ol gudfala sarel,

mo yufala we i stap wokbaot long

leg nomo

blong go long evri ples,

yufala i mas talemaot

nius blong samting ya.

11!Olgeta!

!Yufala i lesin!

Ol man blong storian ya

we oli stap hivap raon long wel

oli stap tokbaot nius ya

we Hae God i win bigwan,

mo we ol man blong yumi

oli win gud long faet.

“Long taem ya,

ol soldia blong Hae God oli aot

long ol taon blong olgeta,

oli wokbaot i kam.

12Oli talem se, ‘!Debora!

!Yu girap!

!Yu lidim mifala!

!Yu go fastaem!

!Yu sing!

!Yu lidim mifala!

!Barak!

Ol man ya we yu holem olgeta

long taem blong faet,

yu tekem olgeta,

yu lidim olgeta i go.’

13“Long taem ya,

olgeta we tingting blong olgeta

i stap strong long Hae God

oli aot longwe,

oli kam joen long ol lida blong olgeta.

Ol man blong Hae God,

oli kam biaen long hem,

mo oli rere finis blong faet.

14Olgeta oli aot long distrik ya

Efrem,*

oli kamdaon long bigfala levelples

long medel blong ol hil,

oli biaen long ol laen blong

Benjamin.*

Ol komanda blong olgeta blong

distrik ya Makiri

oli aot long ples blong olgeta oli kam,

mo ol komanda blong distrik ya Sebulun

oli aot long ples blong olgeta oli kamdaon.

15Ol lida blong olgeta blong distrik ya Isakara,

oli kam wetem Debora.

Mo ol man blong olgeta tu oli kam

biaen long Barak,

oli resis blong kamdaon long level ples ya.

Be ol laen blong Ruben*

oli gat tu tingting,

nao oli no kam.

16?Be from wanem olgeta oli stap nomo

wetem ol sipsip blong olgeta?

?Weswe?

Ating oli wantem stap nomo

blong lesin long ol man ya

we oli stap blu bambu

blong singaot ol sipsip blong

olgeta i kam.

Yes, i tru,

olgeta ya oli seraot,

nao oli no save talem

se bambae oli kam.

17Ol laen blong Gad*

oli stap nomo

narasaed Jodan Reva i go.

Mo ol laen blong Dan*

oli stap nomo

long ol sip blong olgeta.

Mo ol laen blong Asere*

oli stap nomo long ples blong olgeta,

daon klosap long solwota.

18Be ol laen blong Sebulun,*

wetem ol laen blong Naftali,*

olgeta oli girap,

oli kam blong mekem faet,

we oli rere nomo

blong lusum laef blong olgeta.

19“Ol king blong ol man Kenan*

oli girap,

oli kam mekem faet

long ples ya Tahanak,

klosap long springwota ya long Megido.

Olgeta oli kam faet long ples ya,

be oli no winim wan gudfala samting nating

blong karem i gobak.

20Ol sta ya long skae tu

oli stap joen long faet ya.

Taem oli stap muf long rod blong

olgeta,

be oli stap faet agens long

Siseraha olgeta.

21Long taem ya,

Kison Reva i stap ron bigwan,

we paoa blong hem i strong tumas,

nao i brumumaot olgeta i go.

“Oltaem bambae mi stap wokbaot

blong go long faet,

we bambae mi no fraet nating.

22“Long taem ya, ol hos blong olgeta,

oli resis i kam.

Mi mi harem noes blong olgeta,

we oli stap purumpurumbut long

graon.

23“Wan enjel blong Hae God

i talem long mi se,

‘Yu mas singaot* trabol i kam

long ol man Meros ya

blong spolem olgeta.

Yu mas singaot bigfala trabol i kam

blong meksave olgeta

we oli stap long ples ya,

from we olgeta ya

oli no wantem kam soldia blong Hae God,

oli no wantem faet long saed blong he blong givhan long hem.’

24“Woman ya Jael,

we i woman blong Heba ya

we i laen blong Ken,

God i blesem hem,

i mekem hem i harem gud moa,

i winim ol narafala woman ya

we oli stap long ol haos tapolen blong olgeta.

25Man ya Siseraha i askem wota long hem,

be hem i givim melek long hem.

Hem i givim nambawan melek long hem,

long wan besin we i gudfala tumas.

26Be biaen,

hem i tekem wan sotfala stik

we i sap gud

we i blong taetem rop blong haos tapolen long hem,

mo i holem wan gudfala hama

long raethan blong hem,

nao i planem stik ya,

long hed blong Siseraha,

mo i hamarem gogo,

i brekem bun blong hed blong hem

i gotru.

27Nao Siseraha i foldaon

klosap long leg blong woman ya,

mo i slip long ples ya.

Hem i stap slip long graon,

long ples ya we hem i foldaon long hem

we i ded olgeta.

28“Mama blong Siseraha ya

i stap lukluk long windo,

i stap wet blong hem i kambak.

Hem i stap askem se,

‘?From wanem pikinini blong mi

i stap tektaem tumas olsem?

Naoia i let tumas finis.

?From wanem ol kat blong hem

oli no save kambak kwik?

?From wanem ol hos blong hem

oli slo tumas?’

29-30Mo ol woman blong wok blong hem

we oli waes gud

oli talem long hem se,

‘No, olgeta oli stap hivimap ol

gudgudfala samting yet

we oli winim long faet,

mo oli stap seraot olgeta,

mo oli stap seraot ol gel,

we tu gel i blong wan soldia,

tu gel i blong wan soldia.

Ating hem i faenem

wan gudfala klos blong hem,

we bambae i karem i kam,

mo i faenem ol klos

we oli gat gudfala kala

we i naf blong yu yu werem.

!Yu no wari!

!Bambae i kam yet ya!’

Nao hem i stap toktok hem wan,

i stap taltalem ol tok ya bakegen

plante taem.

(Tok i go long Hae God.)

31“Hae God.

Prea blong mitufala,

we olgeta enemi blong yu

bambae oli ded long sem fasin ya nomo,

we Siseraha i ded long hem,

mo we ol fren blong yu

bambae oli saen olsem san

we i jes kamaot long moning.”

Nao biaen kantri ya i stap kwaet nomo, ol man oli no moa mekem faet, mo oli stap olsem gogo kasem foti yia.