Hosea 9 - Bislama Bible Revised 2012

Profet Hosea i talemaot panis we ol man Isrel bambae oli kasem

1Nao Profet Hosea i talem long ol man Isrel* se, “Olgeta. Bambae yufala i no stap mekem lafet oltaem, olsem we ol hiten man ya oli stap mekem. Yufala i mas lego fasin ya. Hae God i God blong yumi, be yufala i gowe finis long hem, mo tingting blong yufala i no moa stap strong long hem nating. Olbaot long kantri ya, yufala i stap salem yufala long god ya Bal,* olsem we woman blong rod i stap salem hem long ol man. Mo yufala i laekem tumas ol gudfala kakae blong garen ya we yufala i ting se hem i stap pem yufala long hem.

2Be bambae i no longtaem yufala i no moa gat kakae mo olifoel* mo waen blong yufala, olgeta samting ya bambae i finis evriwan.

3Graon ya i blong Hae God, be from rabis fasin ya blong yufala, bambae yufala i no moa save stap long hem. Bambae yufala i gobak long Ijip bakegen, mo bambae yufala i go stap long kantri ya Asiria, we bambae yufala i stap kakae ol kakae ya we i tabu blong yufala i kakae.

4Taem we yufala i stap long ol kantri ya, neva bambae yufala i gat waen blong givim i go long Hae God. Mo neva bambae yufala i gat anamol blong mekem sakrefaes i go long hem. Ol kakae blong yufala bambae i mekem yufala i kam doti long fes blong hem, olsem kakae ya blong mekem lafet blong dedman. Ol kakae olsem bambae i blong fulumap bel blong yufala nomo, i tabu blong yufala i tekem blong givim i go long Hae God.

5Long taem blong mekem ol lafet* ya we oli tabu, oli blong hem, bambae yufala i sem bigwan, from we yufala i no save mekem.

6Taem bigfala trabol ya i kamtru, bambae yufala i go wanwan, be ol man Ijip bambae oli kam hivimap yufala wanples. Bambae ol man Memfis we i kaptel blong Ijip, oli kam berem yufala wetem ol gudgudfala samting blong yufala we yufala i wokem long silva. Nao bus bambae i kam kavremap ples blong yufala, ropnil bambae i kavremapgud ol haos blong yufala.”

7 Ol sin ya blong yufala, bambae Hae God i no save fogetem, bambae hem i mas givim panis long yufala from.”

Frut blong sin blong ol man Isrel

10 Nam 25.1-5 Nao Profet Hosea i talemaot we Hae God i talem se, “Ol man Isrel.* Bifo, taem mi mi jes luk ol bubu blong yufala fastaem, olgeta oli gud tumas, oli olsem ol gudgudfala grep* we man i faenem long draeples we i no ples blong hem. Long taem ya, olgeta ya oli olsem ol fas kakae blong figtri* we oli jes raep. Be biaen, oli kam long ples ya, nao oli go long hil ya Peoro, mo oli stat mekem wosip long god ya Bal.* Oli stap mekem gogo, fasin blong olgeta i kam nogud we i nogud, i olsem fasin blong Bal ya we oli laekem hem tumas.

11Yufala i karem hae nem from ol bubu ya blong yufala fastaem, be bambae yufala i lusum. Nem ya bambae i flae i go olsem pijin. Bambae yufala i no moa save gat pikinini blong yufala. Ol woman blong yufala bambae oli no moa save gat bel.

12Mo sipos yufala i gat ol pikinini blong lukaot long olgeta, be mi bambae mi kilim olgeta oli ded, bambae i no gat wan i stap. Taem mi mi lego yufala, ol samting we bambae oli kam kasem yufala bambae oli nogud we i nogud.”

13Nao profet i prea i talem se, “Hae God. Naoia mi luk we ol enemi blong mifala oli stap ronem ol pikinini blong mifala, oli stap kilim olgeta i ded.

14?Wanem stret samting we mi save askem, blong yu mekem long mifala? I moa gud yu mekem we ol woman blong mifala oli no moa save karem pikinini, mo yu mekem we titi blong olgeta i kam drae.”

15Mo profet i talemaot bakegen we Hae God i talem se, “Yes. Olgeta ya, ol rabis fasin ya we oli stap mekem i stat bifo finis long Gilgal. Nao i stat long taem ya, mi mi no moa wantem luk olgeta. Mo from samting ya, mi bambae mi ronemaot olgeta long kantri ya blong mi. Bambae mi no moa lavem olgeta from we oltaem nomo ol lida blong olgeta oli stap girap agens long mi.

16Olgeta ya oli olsem wan smol tri we rus blong hem i drae evriwan finis, i no moa save karem kakae. Bambae oli no moa save gat pikinini. Mo sipos oli bonem ol pikinini blong olgeta we oli lavem olgeta tumas, be mi bambae mi kilim olgeta oli ded bakegen.”

Hae God bambae i panisim ol man Isrel

17Nao Profet Hosea i talem long ol man Isrel* se, “Olgeta. God ya blong yumi we mi mi stap wok blong hem, bambae hem i tanem baksaed long yufala, from we yufala i no save harem tok blong hem. Yufala i man blong hem, be bambae yufala i stap go wanwan olbaot long evri ples.