Aesea 29 - Bislama Bible Revised 2012

Ol samting we bambae i kasem taon ya Jerusalem

1-2Bakegen, Profet Aesea i talemaot we Hae God i talem long ol man Jerusalem se, “Olgeta. !Sore tumas long yufala! !Sore tumas long taon ya blong yufala! !Hem i olta blong mi, be bambae i lus! !King Deved i kam mekem ples blong hem long taon ya, be taon ya bambae i lus! Yufala i stap mekem ol lafet* blong mekem wosip insaed long taon ya we naoia nem blong hem, ‘Olta D blong God.’ Be bambae wan no tu yia i pas, mi bambae mi kam spolem taon ya, mo ol man blong mi bambae oli krae, oli stap singaot bigwan, mo taon ya bambae i kam olsem olta D we oli kilim anamol long hem finis, nao blad i stap olbaot long hem.

3Mi bambae mi kam mekem faet agens long taon ya blong yufala. Bambae mi mekem we ol enemi oli kam hivap raon long taon ya, mo bambae oli hivimap graon i goraon long hem, mo oli wokem ol samting blong stanap long hem, blong oli save faet agens long yufala.

4Nao taon ya bambae i kam olsem devel blong wan dedman we oli berem* hem finis. Bambae hem i stap long graon, be bambae i stap tok i kam, we voes blong hem i narafala, from we graon ya i stap blokem hem.”

5-6Nao profet i talem long ol man Jerusalem* se, “Olgeta. Hae God i gat olgeta paoa, mo bambae hem i kam wantaem nomo long taem we yufala i no tingbaot, mo bambae hem i sevem yufala. Taem hem i kam, tanda bambae i faerap, mo graon bambae i seksek. Hem bambae i tekem ren i kam wetem bigfala win, mo bambae hem i laetem wan faea we bambae i kakae evri samting. Ol man blong ol narafala kantri we bambae oli kam mekem faet long yufala, Hae God bambae i tekemaot olgeta, olsem we win i tekemaot smok blong graon. Hem bambae i tekemaot ol strong man blong faet blong olgeta, olsem we win i tekemaot makas blong wit,* i karem i go.

7Naoia, taon ya i karem nem ya ‘Olta blong God’, be long taem ya, olgeta soldia blong ol narafala kantri we oli kam blong mekem faet agens long hem, mo olgeta samting blong faet blong olgeta, wetem ol narafala samting we oli karem, bambae oli lus evriwan olsem drim, bambae oli lus olsem samting we man i ting se i luk long tudak.

8Ol soldia ya bambae oli kam olsem man we i hanggri tumas, nao i drim se i stap kakae, be i wekap we i stap hanggri yet. Bambae oli kam olsem man we klosap i ded long tosta, nao i drim se i stap dring, be i wekap we trot blong hem i drae yet.”

Tok blong wekemap ol man

9Mo Profet Aesea i talem long ol man blong hem se, “Olgeta. !Yufala i gohed! !Yufala i kam krangke! !Yufala i kam blaen! !Yufala i kam drong, mo yufala i folfoldaon we yufala i no dring wan samting nating!

10Rom 11.8Hae God i mekem finis we ae blong yufala i hevi, mo yufala i rere blong slip ded olgeta. Wok blong ol profet, olgeta oli ae blong yufala, mo oli hed blong yufala, be Hae God i fasem ae ya blong yufala, mo i kavremap hed ya blong yufala, blong yufala i no save lukluk.

11Ol vison* we ol profet bambae oli luk, hem bambae i haedem mining blong olgeta, blong yufala i no save luk. Ol vison ya, bambae oli olsem buk* we i sat, i fas strong. Sipos yu tekem buk olsem, yu givim long man we i save rid, mo yu askem long hem blong i ridimaot long yu, bambae hem i talem se, ‘Mi mi no save mekem, from we oli fasemtaet buk ya, nao mi no save openem.’

12Mo sipos yu givim long man we i no save rid, mo yu askem long hem blong i ridimaot long yu, bambae hem i talem long yu se, ‘Sore, be mi mi no save rid.’

13 Mat 15.8,9; Mak 7.6,7 “Hae God i talem long mi se, ‘Aesea. Ol man ya oli stap talem se oli stap mekem wosip long mi, be ol tok ya blong olgeta i blong nating nomo, tingting blong olgeta i stap longwe tumas long mi. Fasin blong mekem wosip blong olgeta i stap folem ol rul blong man nomo, wetem ol fasin blong bifo, we olgeta oli stap talem baehat.

141 Kor 1.19From samting ya, bambae mi mi mekem olgeta oli sek. Bambae mi stap mekem ol samting blong sapraes, we i blong sapraes tru. Nao bambae i klia we ol waes man ya oli no gat hed, mo ol waes blong olgeta i no save givhan long man.’ ”

Tok we ol man oli save putum tingting blong olgeta i stap long hem

15Mo Profet Aesea i tok long olgeta we oli stap traem haedem ol plan blong olgeta blong Hae God i no luk, i talem se, “Olgeta. !Sore tumas long yufala! !Bambae yufala i lus! Yufala i stap wokem ol rabis plan blong yufala long fasin blong haed, mo yufala i ting se bambae i no gat man i save luk yufala, mo i no gat man i save faenemaot ol samting we yufala i stap mekem.

16Aes 45.9; Rom 9.20Be tingting ya blong yufala i stap kafsaedem evri samting. ?Wanem i hae moa, graonpot, no man we i wokem? ?Olsem wanem? !Samting we man i wokem i no save tokbak long man se, ‘!Yu yu no wokem mi!’! !Samting we man i wokem i no save talem long hem se, ‘!Yu yu no save fasin ya we yu stap mekem!’!

17“Tingting blong man olsem, hem i olsem olfala tok we i talem se, ‘!I no longtaem, ples blong ol bigbigfala tri olbaot long hil bambae i kam ples blong garen, mo ol ples blong garen blong yumi bambae i kam ples blong ol bigbigfala tri!’

18-19“Yumi ol laen* blong Isrel,* mo Hae God i God blong yumi. Hem i tabu, mo hem nomo i save mekem yumi glad. Long dei ya we bambae i kam, ol man we sora blong olgeta i fas, bambae oli save harem man i ridim buk, mo ol blaen man we oli bin stap long tudak, bambae oli openem ae blong olgeta, oli lukluk. Ol puaman, mo ol man ya we ol narafala man oli stap spolem olgeta, bambae hem i mekem olgeta oli harem gud, oli glad, from we oli joen long hem.

20Be long dei ya, ol man we oli stap spolem ol narafala man, oli stap mekem olgeta i stap daon, mo ol man we oli no save tinghevi long Hae God, oli stap jikim hem, olgeta ya bambae oli finis, bambae oli lus olgeta. Hem bambae i flatemgud olgeta man nogud evriwan.

21Hem bambae i spolem olgeta we oli stap talem ol giaman toktok blong spolem nem blong narafala man, mo olgeta we oli stap blokem man we i mekem kot blong i no panisim ol man blong brekem loa, mo olgeta we oli stap giaman blong blokem stret man we i go long kot, blong i no save win.

22“Yumi ol laen blong Isrel, mo Hae God i God blong yumi. Hem nao i God we i sevem Ebraham, i tekemaot hem long trabol, i mekem hem i fri. Mo hem i talem long yumi se, ‘!Ol man blong mi! Bambae yufala i no moa save sem bakegen, mo fes blong yufala bambae i no moa save kam nogud from.

23Taem yufala i luk ol pikinini we mi bambae mi givim long yufala, bambae yufala i talemaot wantaem nomo we mi mi God blong yufala, mo mi mi tabu, fasin blong mi i stret gud olgeta. Bambae yufala i fraet long mi, mo bambae yufala i ona long mi.

24Olgeta we oli krangke bambae oli lanem rod blong savegud mi, mo olgeta we oltaem oli stap tok smosmol agens long mi, bambae oli glad blong man i kam tijim olgeta long fasin blong mi.’ ”