Ol Proveb 20 - Bislama Bible Revised 2012

1Sipos yu dring tumas waen, hemia bambae i mekem yu yu mekem tumas noes, mo i mekem yu yu krangke. Fasin ya we man i dring gogo i drong, hem i wan krangke fasin.

2Sipos king i kros, i gud yu ronwe long hem, olsem we yu ronwe long laeon we i rere blong kakae yu. Sipos yu wantem ded, yu go mekem king i kros.

3Man we i no gat hed i save statem rao isi nomo, be man we i wantem stret fasin i no save go klosap long fasin olsem.

4Man we i les blong planem garen blong hem long stret taem blong hem, hem bambae i no gat kakae blong hem.

5Ol tingting blong man i olsem wota long wel we i godaon we i godaon, be man we i save luksave ol had samting, hem i save faenemaot ol tingting olsem.

6Ol man oli stap talem se tingting blong olgeta bambae i stap strong oltaem long ol fren blong olgeta, be sipos yu traem lukaot man olsem, bambae yu no save faenem.

7Pikinini we papa blong hem i wan stret man we i stap folem ol stret fasin, bambae hem i save harem gud.

8Oltaem king i stap sidaon long ples blong jajem man, i stap skelem ol toktok, mo hem i save faenemaot wantaem nomo ol samting we i no stret.

9I no gat wan man nating we i save talem se, “Tingting blong mi i no save jajem mi, sin blong mi i lus finis.”

10Hae God i no laekem nating man we i stap jenisim bol blong skel blong giaman long ol man, mo i stap yusum meta we mak blong hem i no stret, hem i agens long hem.

11Nating we smol pikinini nomo, be ol samting we hem i mekem i stap soemaot fasin blong hem. Sipos hem i no save giaman, mo fasin blong hem i stret, bambae yu save wantaem nomo.

12Hae God i mekem ae long yumi blong yumi save lukluk, mo i mekem sora blong yumi blong yumi save lesin.

13Sipos yu stap slip oltaem, bambae yu kam puaman. Be sipos yu stap wok had oltaem, bambae yu gat plante kakae.

14Taem we man i pem samting, hem i save talem se praes blong samting ya i hae tumas, be taem hem i gobak long haos blong hem, oltaem hem i stap bigmaot se praes blong samting ya we i pem i gud we i gud.

15Sipos yu savegud samting we yu stap tokbaot, save ya blong yu i wan samting we i gud tumas, i winim gol mo ol flas ston ya rubi.*

16Sipos wan man i mekem kaon long yu, mo narafala man i promes blong pemaot ol kaon ya be i no savegud man ya, hem i krangke nomo. Sipos hem i mekem olsem, i moa gud yu holem ol klos blong hem fastaem, gogo i pemaot kaon ya.

17Ol samting we yu kasem long fasin we i no stret, maet yu stap glad long hem olsem wan gudfala kakae, be biaen, bambae yu harem olsem we maot blong yu i fulap long sanbij.

18Yu no hareap blong go long faet we yu no mekem wan gudfala plan fastaem. Yu mas go sidaon wetem ol advaesa blong yu blong oli givhan long yu, nao biaen, bambae yu save win long evri samting.

19Man we i stap go talem ol tok olbaot we i spolem nem blong narafala man, hem i no man blong holem ol tok haed. Man we i stap toktok tumas, i nogud blong go klosap long hem.

20Man we i tok nogud long papa no mama blong hem, bambae hem i ded, mo i go long ples we i tudak olgeta.

21Sipos yu faenem i isi blong winim plante samting blong mekem yu yu kam rijman, ol samting ya bambae oli no save givhan gud long yu.

22Yu no mas givimbak samting nogud long man we i mekem i nogud long yu. Yu mas trastem Hae God nomo, nao hem bambae i save stretem samting ya.

23Hae God i no wantem nating man we i stap jenisim bol blong skel blong giaman long ol man, hem i agens long man olsem.

24Hae God i makemaot finis ol rod blong laef blong yumi wanwan we bambae yumi folem, mo i no gat man i save wokemaot se laef blong hem bambae i pas long weples.

25Sipos yu wantem mekem promes blong givim presen i go long Hae God, be yu mas tingting gud fastaem. Sipos no, biaen, maet yu harem nogud from.

26King we i waes, hem i save faenemaot man we i stap mekem samting nogud, mo bambae i panisim hem we i no gat sore.

27Tingting blong yumi i olsem laet blong Hae God we i stap saen long evri haf blong laef blong yumi. Hem i stap soemaot long yumi wanem i stret mo wanem i no stret, mo yumi no save haed long hem.

28Sipos king i stap rul long stret fasin, we i no save giaman mo i stap mekem i sem mak nomo long evri man, bambae hem i save rul longtaem.

29Oltaem yumi glad blong luk ol yangfala, from we bodi blong olgeta i strong, mo yumi stap tinghevi long ol olfala, from we hea blong olgeta i waet.

30Sipos oli kilim man long wud, no oli wipim hem long wip, hemia i save stretem fasin nogud blong hem, mo i save mekem hem i kam wan gudfala man.